ӦКТЕМ АТТАРНЫҢ ХЫЛЫНЫСТАРЫ
08.05.2019
Хабарлар
Ат чарызы. 1 Майда Ағбандағы ипподромда ат чарызы азылды. Анда ӧӧнінде Хакасияның паза Хызылчар крайының командалары араласты. Кибірге кір парған марығ 87-ӌі хати иртірілді.
Хазыр чил, тобырах кӧдіріп, кӱн хараан тулғапчатханға тӧӧй. Че анзы ипподромның тастында. Хайда чон чыылыс парған, анда чилнің кӱзі тың нимес, ат чарызын иртірерге сала даа харығ полбинча. Кізілернің кӧбізі пеер 1 Май демонстрациязы соонаң килглептір. Палаларның холларында аймах ӧңніг шарлар, флажоктар.
Ат чарызы пайрам кибірли азылчатханда, Хакасияның аал хонии паза ас-тамах министрі Сергей Труфанов Ағбан чуртағҷыларын, аалҷыларын чон хынчатхан спорт марии пасталчатханынаң чылығ алғыстаан. Ідӧк Сергей Иванович прайзына Хакасия пазы Валентин Коноваловтың адынаң Часхы паза Істеніс пайрамынаң алғыс сӧстерін читірген. Анаң ат чарызы пасталыбысхан.
Марығда чалаң даа ойлатханнар, ікі тегілектіг ниик хаңааҷахха кӧлілген аттар даа тимненістерін кӧзіткеннер. Улуғ кізілер, холларында программалар тудын салып, ӧктем аттарны чиңіске матап кӧӧктірчеткеннер. Іҷе-пабаларынаң, аға-ууҷаларынаң хада килген хызыҷахтар паза оолағастар аттарны тӱктері хоостыра танып, анзы прайзын ас парыбызарға кирек тіп хысхырысханнар.
- Кӧрдің, я, кӧрдің! Минің хара адым синің хызыл адыңны пір-ікі ле ас чӧрібісті! - оңнығ ла ӧрінминче пір хызыҷағас, ӧӧрезін аар-пеер ітклеп чӧрчеткен туста.
Анаң ипподромда кинетін не сым пол парған. Прайзының алнында парчатхан ӧктем пии, позының соонҷа ойлапчатхан атха ӧӧн чолны пирбин, пастағы орынға сығып аларға матап харығ полған. Хайдағ чарадығ аларлар ни марығ чарғыҷылары? Килістіре нимес сайбағ салылғанын, олар полардаң, олаңай кізілер дее кӧргеннер.
- Молекула аттығ пии, сайбағ салып, ӧӧн чолны соонҷа килчеткен атха пирбеен ӱчӱн, сыйых чох халча, - чарлапча марығның ӧӧн чарғыҷызы Мария Гураль.
Аның сӧстерін ӧрчіліг хысхырыстарнаң удурлапчалар. Іди поларға кирек. Прайзы даа чахсы кӧрген, Молекула позы оңдайынҷа ла іди пасхаҷыл хылынған. Поза пағ тутчатхан Максим
Цыгикало мында пір дее пыролығ нимес. Аннаңар даа ат чарызына хынчатханнар пазох ла программкадаң харах албиныбыстылар.
- Амды прай ниме пілдістіг. Чиит мал нооза, марығда пастағызын на араласча, - тыыда чарлапча пір ирен.
- Пу чарыста прай даа аттар ікі частығлар. Пасхазы іди кӧйтіктенминче, - чараспинчалар аннаң.
Сах андох улуғ нимес суум-саам кӧдіріл килген, талазығ пасталыбысхан. Оңарылыстығ, полғаны ла позының сағызын орта тіп санапча. Че марығ чарғыҷыларынаң талазарға тідінминчелер, постары аразынҷа ла сарысчалар. Сылтағ, тізең, кӧп нимес сахлат салғанында. Улуғ частығлар ӧӧнінде сахлатха 10 салковай салчалар. Анаң утып алғаны тынағ тузында хонҷыхтарына ізіг чей ағыл пирче. Чилліг кӱнде пір ле орында сым одырарға оой нимес, сыырығып таа пастабысчазың.
Хаҷан чалаңнар пас меетте кӧріне тӱскенде, пазох ла сахлат салчалар. Марығда пазох ла ікі частығ аттар араласчалар. Пістің андағ малны чабаға тіп адидырлар. Анзы олаңай аал хонии тоғынҷылары аттарының хулуннары. Мында, тізең, чахсы породалығ чӱгӱрік аттарның хулуннары. Оларны чалаң ойладарға алай ба ікі тегілектіг ниик хаңааҷахха кӧлерге ирте кӧніктіріп пастабысчалар. Чӱгӱрерге чайалған ікі частығ чабағалар ӧктем хылыхтарын кӧзідерге матап сіренчелер.
Аннаңар даа ипти ле чорыхнаң ойлапчатхан чабаға кизек чорыхха кірібісче. Марығ оңдайы хоостыра анзы сайбаға саналча. Че ікі частығ аттарға, сынап олар 1600 метрге ойлазалар, андағ ӱс сайбағ идерге чарадылчатханнаңар искіргеннер марығ чарғыҷылары.
Прай 11 аймах чарыс полған. Иван Миндибековтың даа, Виктор Калининнің дее, Хызылчар крайынаң килген дее аттар чиңістер тутханнар, ээлерін сабландырғаннар. Амды олар теестегі марығларға тимненчелер. Анда кем утар ни?
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы