ЧААҶЫ-ПОЭТТЕРНІҢ КИБЕЛІСТЕРІ ТАРАДЫЛҒАН
08.05.2019
Хабарлар
Акция. Ағбанда Росреестрнің Хакасияҷа пӧлиинің паза Кадастр палатазының тоғынӌылары, Илбек Ада чаа тоозылғаннаң 74 чыл толчатханын таныхтап, пірге акция иртіргеннер.
Илбек Чиңіс кӱніне удур Хакасияның Росреестрі паза Кадастр палатазының тоғынҷылары чонға читірерге ікі лифлет тимнеп салғаннар. Оларның пірсі «Илбек Чиңіс кӱнінең! 1941 - 1945 чыллар» адалча. Анда хакас чааҷы-поэттернің сомнары пирілче паза оларның кибелістері пазыл парған. Ікінҷі лифлетте «Чиңіс» орден ниме ӱчӱн пирілчеткеннеңер, георгиевскай лентаның таниинаңар чоохталча.
Ағбанда МФЦ кінінің ізии алнында георгиевскай лента хазан салған паза пилоткалар кис салған тоғынҷылар килчеткен кізілерге лифлеттерні, георгиевскай ленталарны пир турғаннар.
Росреестрнің Хакасияңа пӧлии устанызының пресс-секретарьы Наталья Жукова акциядаңар піди чоохтаан:
- Чаадаңар асхынах нимес кибеліс пазыл парған. Піс лифлетке хакас поэттердең Михаил Кильчичаковтың кибелізін тиктең не таллап албаабыс. Пӱӱл ағаа 100 час толча нооза. Ідӧк ол Илбек Ада чаа араласчызы полча, Москваны арачылап, аар палығлатхан. Чаа соонаң драматург, актер полған, поэзиянаң тирең айғасхан. Михаил Кильчичаковтың хакас паза орыс тіллерінең кибелістер чыындылары чарыхха сыхханнар. Ол РСФСР искусствозының саблығ деятельі, Ағбан городтың аарластығ чуртағӌызы полған. Чаа ветераны III степеньніг Слава паза I степеньніг «Отечественнай чаа», «Знак Почета», «Чоннар ынархазы» орденнернең, он медальнаң сыйыхтатхан. Чарыхха сыххан «Кирі тыт» паза «Тірілген тастар» иң чахсы поэмаларына саналчалар.
Пресс-секретарь Татьяна Бородина, Михаил Кильчичаковтың чайаачызынаңар сағыстарынаң ӱлезіп, теен:
- Мағаа поэттің чайаачызы чағын. Мин аның «Я б хотел» кибелізін ӱгренерге хынғам. Ол олаңай сӧстерінең паза тирең сағызынаң хайхатхан.
Ідӧк лифлетке Николай Доможаковтың паза Геннадий Сысолятиннің кибелістері кірчелер.
Лифлеттерде георгиевскай лентадаңар хысхаҷахти пазылча. Ах чарых Георгийнің орденін II Екатерина 1769 чылда чуртасха кирген. Ол туста орыс паза туроктар чаазы парчатхан. Орденні Россия ӱчӱн махачы турысчатханнарға пирҷеңнер. Лентадағы хара ӧң ысты, сарығ чалынны таныхтапча.
«Чиңіс» орден СССР тузында чааҷы киреенде иң пӧзік сыйыхха саналҷаң. Аны 1943 чылда чуртасха киргеннер.
Автор :
Елена ЧЕЗЫБАЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде