ВЕТЕРАННАР САННЫІҒ ЛА ХАЛДЫ
14.05.2019
Хабарлар
Тамара Яковлевна МАМЫШЕВА
Илбек Чиңіс. Асхыстың культура туразында Илбек Ада чаа ветераннарын, тылда тоғынғаннарны паза чаа тузында ӧскеннерні чеестееннер.
Культура туразының фойезінде столлар салыбыстырлар. Оларның кистінзер ветераннарны одыртчалар. Кӧр килгенде, чаа ветераннарынаң ікі ле кізі - Андрей Михайлович Карамчаков, Истегі аал чӧбінең паза Антон Иннокентьевич Селигеев, Асхыстаң. Пасха столлар кистінде саңай ууҷалар.
Ветераннарны чеестеп пастабыстылар. Пилтірдегі искусство школазының олғаннары кибелістер хығырдылар, сарыннар толдырдылар. Анаң чоох пирілген Асхыс аймаа пазы Абрек Васильевич Челтыгмашевке. Ол, махачы чааҷыларны алғыстап, тылда халған ағаларның, іҷелернің матап тоғынғаннарынаңар чоохтаан. Чаа ветераннарына алынҷа сыйыхтар читіргеннер. Анаң прайзына тулуптар пирілген.
Тоғазығны аймах администрациязы иртірген, ӧӧнінде социальнай арачыланыс устанызының тоғынҷылары. Столларны салтыр «Пирамида» садығ туразының ӧмезі, устағҷызы - Елена Вадимовна Бурнакова.
Ол арада чаа палаларының пірсінең, Тамара Яковлевна Мамышеванаң, чоохтазарға киліскен. Ол мындағ ниме искір пирген: - Минің пабам - Яков Николаевич Мамышев, Сафрон аалдаң. Молотовтың адынаң колхозтаң чааға парған. Мин кічіг полғам. Пабамны Ис суға теере ӱдескебіс. Іҷем ылғапчатчаң. Ол ла тус харағым алнында кӧрінче. Уғаа сидік чуртаабыс. Мағаа кілен чӧрерге киліскенӧк. Оңнапчам, оох яблах чоннаң чыып алчатчаңмыс. Анаң ӱӱчікте салчатчаңмыс. Хара оттың чистегін, киндір пазын, ныхып, ічем ӱгрее тӧӧй ниме пызырҷаң. Ӧрке тудып, аның идін чічеңміс. Аны прайзы чеен, че піске хурсағындағы тамахты, чыып, хоорып, чиирге киліскенӧк.
Пабам чаадаң ахсах айланған. Хол салааларының пастары тохпах полған. Чоохтан полбинчатхан. Анаң чаҷында пічік пазып тіл алысчаңмыс.
Чааласчатхан туста ыырҷы, оларны пушкалардаң атып, бомбалар тастапчатханда, пабам арғызынаң хада оймахха кире сегірібістір. Хыринда бомба чара чачыраанда, оларны чирнең кӧмібістір. Тын кирек, ол чирні холнаң на хазып, хайди полза чарыхха сығып алтырлар. Хол салаалары хызыл сее палығ.
Соонаң пабам военкоматсар парған, андартын полызығ килген. Пу кизек ле чоох, че пістің ічелерібісті искенде, чаа тузында прайзы пір оңдайнаң иреелентір. Аннаңар паза мындағ хорылыстығ чаа полбазын.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы