КЕЕРКЕСТІГ ӰННЕРІНЕҢ АПТААННАР
15.05.2019
Хабарлар
Марығ. Ағбанда 12 майда «Голос-Ӱн» эстрада сарыннарының республикадағы V азых марии ирткен. Анда 5 - 18 частығ ырӌылар устарынаң сынасханнар.
Фестивальны С.П.Кадышевтің адынаң культура кіні иртірче. Пастағы туста марығда чииттер паза улуғлар араласчаңнар. Че 2018 чылдаң фестиваль оңдайлары алыс парған, амды анда олғаннар паза саарбахтар устарын кӧзітчелер. Пӱӱл «Голос-Ӱн» марығда 36 кізі араласхан: 21 ырҷы паза тӧрт чайаачы ӧме. Олар Кемеров облазынаң, Бурятия, Тува паза Хакасия республикалардаң полғаннар. Марығласчатхан улусты частары хоостыра тӧрт ӧмее чарыбысханнар: 5 - 8 частығлар, 9 -12 частығлар, 13 - 15 частығлар паза 16 - 18 частығлар. Ырҷыларға ікі сарын толдырыбызарға киректелген, пірсі хайди даа тӧреен тілінең.
Пастап сценаа иң кічіглер сыхханнар. Кӧклӧ осхас ачыныстығ Влада Чичинина «Час ханат» эстрада студиязының солизі полча. Сарынҷы хызыҷах «Кічіг туңмаңаам» паза «Кӧклӧ» ырларны прай кӧңнін салып толдырған. Ідӧк Соня Кускашева морсымнығ кӧрінген. Сонам Дамчат, школаа даа чӧрбинчетсе, кӧрігҷілерні аптирға пілче. Марыға Туваның кічіг чуртағҷызы «Танды Тува толу мен» паза «Минің армиям» сарыннарны таллап алтыр.
«Голос-Ӱн» фестивальда 9-12 частығлар ӧткін араласханнар. Он ырҷыдаң Владимир Мокану минің кӧңніме кірген. Іҷезі Татьяна Тинникованың таниинаң, 11 частығ оолах Ағбанның 7 № школазында ӱгренче, пос туста «Час ханат» эстрада студиязынзар паза олаңай кӱрес секциязынзар чӧрче. Вованың чидіглері кӧп. Кӧзідімге, пӱӱл часхызын ол Екатеринбургта ирткен чоннар аразындағы марығда III степеньніг лауреат атха турысхан. «Голос-Ӱн» фестивальда чир-суғҷыбыс «Ӱгӱ сарыны» паза «Кӱн» ырларны толдырған.
Соня Самрина хайди сарнапча! Таланттығ хызыҷах музыкант паза композитор Тамара Давлетованың холында ырлирға ӱгренче. Аны истіп, кӧрігҷілернін чӱрее-паары хайылған. Сіліг ӱнніг Мария Бабушкинаны алынҷа таныхтирға кирек. Саарбах Кемеров облазында чуртапча. Ол залдағы чонны шорларның чайаачызынан таныстырған.
Тӧртінҷі номинацияда ӱс кізі араласхан: Камила Балдан, Екатерина Кызласова паза Ориса Боргоякова. Тува ырҷызы Камила узынаң даа, кип-азаанаң даа хайхатхан. Абахай хыс, тува паза орыс чоннарның сарыннарын толдырып, кӧрігҷілерге ӧрініс сыйлаан. Итсе-де, Орисанаң Екатерина аннаң пір дее халбинчатханнар. Чир-суғҷыларыбыс ырлар пастыра тӧреен чиріне паза хакас чонға хыныстарын читіргеннер.
Ырҷылардаң 16 - 18 частығлар сценаа халғанҷызын сыхханнар. Прайзы улуғ опыттығ чайаачылар. Кӧзідімге, Регина Тоскоракова «Час ханат» ӧмеде кічігдең сығара сарнапча. Пӱӱнгі кӱнде ол - ХГУ-ның искусство институдындағы музыка колледжінің студенті. Дарья Топоеваны махтирҷыхпын. Хакас абахай фестиваль тузында «Хынғаным» паза «Adagio» сарыннарны чӱрекке теерте толдырыбысхан.
Минің кӧрізімнең, ансамбльлар марии иң хынығ ирткен. Анда устарынаң ӧӧнінде аалдағы олғаннар сынасханнар. Асхыс аймааның алнын Кызластағы «Сюрприз» ӧме алған. Аның устағҷызы Виктория Бурнакова полча. Ансамбль 2017 чылда сентябрьда тӧстелген, хысхаҷах тус аразына аның араласчылары республика синінде паза регионнар аразындағы фестивальларда устарын кӧзідерге маңнанғаннар.
Алтай аймаандағы «Торғайах» ӧменің олғаннары кізілер хайиин тартханнар. Ансамбльны Хакасия культуразының саблығ тоғынҷызы Мария Аткнина тӧстеен. Че, хомзынысха, пӱӱл саблығ ус ах чарыхтаң парыбысхан. Мария Иннокентьевнаның кӱстенізінең ӧменің репертуарында хакас сарыннар кӧп, оларны хакас таа, орыс таа палалар толдырчалар. Анзын «Голос-Ӱн» марығ киречілеен. Сергей Сартыков, Виктория Диденко паза Полина Коновалова «Часхы килді» ырны морсымнығ сарнабысханнар.
Фестивальға Бурятиядаң килген Дари Долгорованы, Дарья Дондокованы паза Долгор Сангалованы хайди даа таныхтирға кирек. Хызыҷахтар Ацагат аалдағы школа-интернатта ӱгренчеттірлер. Пос туста «Бэлигэй ошонууд» ансамбльзар сарнирға чӧрчелер. Чайаачы ӧменең Любовь Янданова устапча. Любовь Намсараевнаның чооғынаң, мының алнында ол олғаннарны Улан-Удэзер марыға ал чӧрчең, че пӱӱл ӱгренҷілерін пасха регионзар апар килерге чаратхан.
Таланттығ хызыҷахтар кӧрігҷілерні «Хонгорхон холшорхон» паза «Наранай туяа» сарыннарнаң ӧріндіргеннер. Пастағызында тӧреен чирінеңер чоохталча, ікінҷізі кӱніҷекке чарыдылған.
Халғанҷы ӧме «Час ханат» студияның араласчыларынаң пӱткен. Алина Канзычакова, Регина Тоскоракова, Ориса Боргоякова паза Ксения Тохтобина, пір ӧмее пірігіп, «Полча кӧӧленіс» паза «Артист кізі» ырларны пӧзік синде толдырғаннар.
Марығ салтарларын араласчыларға, оларның хоос устағҷыларына паза «ағырчатхан» улусха пір час сағирға киліскен. Хайди таныхтаан жюри кнезі Артур Марлужоков, олған марығларын чарғылирға сидік. Піди кӧрзең, прайзы пастағы орынға турыстығ, че чиңісчі пір ле полча. «Голос-Ӱн» фестивальның салтарлары мындағ:
III степеньніг лауреат атха Влада Чичинина, Юлия Волкова, Екатерина Кызласова паза Дарья Топоева турысханнар.
II степеньніг лауреат Сонам Дамчат, Артемий Котожеков, Ориса Боргоякова паза Регина Тоскоракова полыбысханнар.
I степеньніг лауреаттар - София Кускашева, Софья Самрина, Камила Балдан, Алина Канзычакова паза «Сюрприз» ӧме.
Гран-приге изебі чох таланттығ Владимир Мокану турысхан. Кічіг ырҷының ӧрінізі пу чир полбаан.
Пазағы «Голос-Ӱн» фестиваль тиксі Россия синінде иртер. Аннаңох кӧп ыр-сарын чайылар, олғаннар кӧрігҷілерні устарынаң хайхадарлар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы