ОЛҒАННАР - УЛУҒЛАР МАРЫҒЛАРЫНДА
26.02.2020
Хабарлар
Суғӌа чӱзерінӌе марығ. «Ағбан» спорткомплекстің суғӌа чӱзерінҷе бассейнінде Сибирьдегі федеральнай округтың (СФО) чемпионады паза первенствозы тоозыл парды
Ағбан городтың суғҷа чӱзерінҷе олған спортшколазының воспитанниктері Виктория Бекасова паза Андрей Рачинский пу марығларны иртіреріне хабасхан «Майрыхский» разрезтің аарлығ сыйыхтарына турысханнар. Разрезтің директоры Максим Виноградов Ағбанның чиит спортсменнеріне электроннай частар читірген. Андрей Рачинкий пос оңдайынаң 400 метрге чӱзерінде алтын медальнаң сыйыхтатхан, ідӧк ол, олох оңдайнаң 200 метрге чӱзіп, хола медальны холға кирген. Виктория Бекасова сыйыхтығ орынға сығарға кирек полған, че чазы читпин (ағаа ам 13 ле час), сыйых ал полбин хала парған.
Сибирьдегі федеральнай округтың регионнары аразында суғҷа чӱзерінҷе марығларның иң артых спортсменнеріне чидіглері хоостыра саналғаннар Арина Суркова, Дарья Трофимова, Арсений Десятов (Новосибирск облазы) паза Мартин Малютин (Омск облазы). СФО-ның иң кӱстіг спортсменнеріне чемпионаттың паза первенствоның аарлығ сыйыхтары читірілген.
Олар прайзы суғдағы салғахтығ чолларха уғаа табырах чӱскеннер. Кӧзідімге, Арина Суркова пос оңдайынаң 50 метрге читі спорт узынаң хада чӱскен. Андағ пӧзік титуллығ спортсменнернең кӱс сыназып, ол, 24,94 секунда салтар кӧзідіп, прайзын ас парыбысхан. Ікінҷі орында, 26,17 секунда салтар кӧзідіп, илееде соона халған Анита Грищенко (ол ідӧк Новосибирск облазынаң).
Аринаның чооғынаң, пӱӱл Токиода чайғыдағы Олимп ойыннары иртер, ол андар иртіп алар таллағ марығларына тимненче, аннаңар ағаа хайди даа пу марығларда пӧзік салтарлар кӧзідерге кирек. Ідӧк ол майда иртер Европа чемпионадында аралазарға план тутча. Арина чоннар аразындағы класстығ спорт узы полча, хайдағ даа марығларда пӧзік чидіглер кӧзідерге кӱстенче. Суғда ол - спринтер, спорт марығларында аны іди адапчалар.
Европа чемпионадында паза чайғыдағы XXXII Олимп ойыннарында аралазар піріктірілген командаа кіріп аларға кӱстенче Данил Марков (Новосибирск облазы). Ағбанда тӧрт кӱн ирткен пу марығларда Данил пис алтын медаль алған.
Чоннар аразындағы категориялығ чарғыҷы паза суғҷа чӱзерінҷе тиксі Россия федерациязының техническай делегады Юрий Жердев Сибирьдегі командалардаңар піди искірген:
- Новосибирсктең килген спортсменнер иң кӱстіг полғаннар. Оларның соона Омск паза Кемеров областьтарының командалары халғаннар. Хомзынысха, Хызылчар крайының командазы чахсы салтар кӧзіт полбады.
Пӱӱл Ағбанзар Сибирьнің кӧп саблығ спортсмені килген, анзын ідӧк Юрий Жердев таныхтаан:
- Ағбандағы марығларда хазнаның піріктірілген командазының онҷа спортсмені араласхан. Олар кӧні тимненіс тренировкаларынаң килгеннер, анзы суғҷа чӱсчен бассейннің пӧзік статузын киречілепче. Мында алтынҷы хати Сибирьнің чемпионадын паза первенствозын иртірчебіс. Ағбанда иртірілчеткен чемпионаттың паза первенствоның тархынында пастағызын на Ағбан городтың суғҷа чӱзерінҷе олған спорт школазын хыстар командазын чемпионат эстафетазында аралазарға сығарған. Улуғларның марығларына команда сығарылчатханы спорттың тимненіс сині ӧсчеткенін таныхтапча.
СФО-ның Ағбанда ирткен марығларында Сибирьнің сигіс регионының 375 спортсмені араласхан. Прай аймах синніг 210 медаль комплекті читірілген. Ин кӧп медаль Новосибирск облазының командазы утхан: 37 алтын, 27 кӱмӱс, 21 хола. Иң кӧп медаль холға кирген Арина Суркова - 10 медальның 8-і - алтын. Александра Сабитованың (Кемеров облазы) - 12 медаль, 3-і - алтын.
Иреннер аразында Мартин Малютин (Омск облазы) паза Данил Марков (Новосибирск облазы) 5-ер алтын медаль утып алғаннар. Владислав Резниченконың (Омск облазы) 3 алтын медаль.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы