ААЛДАҒЫЛАРҒА - НИИК ИПОТЕКА
24.03.2020
Хабарлар
Чурт сурии. Россияның аал хонии паза ас-тамах министерствозы «Аалларның пик тилізі» программа тимнебіскен. Аның ӧӧн пӧгіні - аалларзар наа чуртағӌыларны тартары паза амғы туста чуртапчатхан чонға истіг оңдайлар тӧстирі
«Аалларның пик тилізі» программаның пір чардығы - аалдағы чонға пос чуртына чидінерге полызары. Программа пис чылға кӧрілген, 2020 чылдаң тоғынча. Аны хоостыра Россельхозбанк тӧбін проценттіг аалдағы ипотека пиріп пастапча.
Россельхозбанктың Хакасиядағы пӧлиинің директоры Виктор Богушевич аалдағы ипотекадаңар толдыразынаң чоохтап пирген.
ИПОТЕКА НИМЕЕ ПИРІЛЧЕ?
Ипотека аалда пилен тура аларына алай чурт пӱдіреріне 25 чылға 5 млн салковайға теере пирілче. Аны алчатхан кізі чуртазына страховка итсе, чурт кредидін чылда 2,7 процентке пирчелер, страховка чох - чылда 3 процентке. Ипотеканы 21 - 75 частығ кізілер ал полар оңдайлығлар. Че кредитті тӧленгенҷе, 75 час аспасха кирек. Кӧзідімге, 60 частығ кізі аалдағы ипотеканы 15 чылға тӧленібізерге кирек. 70 частығларға ол пис ле чылға пирілер. Аалдағы ипотеканы алчатса, садысчатхан кізі чурт паазының 10 процентін тӧлебізерге кирек. Пастағы тӧлеге іҷе капиталынаң тузаланарға чарир. Пу ипотека кізее чуртаста пір ле хати пирілер.
ЧУРТ САДЫЗАРЫНА
Пу ипотека полызиинаң аалда пӱдірілчеткен чуртты алай пилен тураны садызып аларға чарир.
- Тузаланылған чуртты садызарға сағынзаңар, аны кӧргеннеңер акт кирек полар. Муниципалитеттің устағ-пастаа комиссия тӧстепче, хайзы тура хайдағ полғанын актта пас салча. Анда тура капитальнай полғаны, ол нимедең пӱдірілгені, кірпистең алай брустаң хайдағ хырлығ, кӧзенектіг пазыл парарға кирек. Комиссия тураның тастындағы кӧрімінеңер, чарытхы парынаңар акт пазып, анда хол салыбысча.
Устағ-пастағдағылар чир участогы пос нимес, анда сынап тура парынаңар киречілеп пасча. Анаң чурт аларға сағынчатхан кізее пирібісче. Амды піс акттар пирер оңдайларны хайығда тутчабыс, - теен Виктор Богушевич.
Аалдағы ипотека ахчазы холға пирілбинче. Ол чуртты сатхан кізінің счёдына ызылча.
Хайдағ сылтағларнаң Россельхозбанк аалдағы ипотеканы кізее пирчетсе дее, ағаа чуртты садызып аларға киліспинче? Виктор Богушевичтің чооғынаң, кирек пічіктерні чыып алза, олар Москвазар Россияның аал хонии паза ас-тамах министерствозынзар ызылчалар. Министерствоның специалисттері оларны 10 тоғынҷаң кӱн кӧрчелер паза ипотека пирерін алай пирбезін ӱзӱрчелер.
Пірееде чурт ипотека пастыра садызарына чарабинча. Андада кізее пасха чурт тілирге кирек. Ипотека пирілчетсе, садызар чуртты 90 кӱнге таап аларға кирек.
ТУРА ПӰДІРЕРІНЕ
Аалда чир участогы пар полза, анда тура пӱдіреріне пу ипотеканы алып аларға чарир. Че чир хайди даа собственностьта поларға кирек. Андағ ипотека пӱдіріг организациязы пастыра пирілче. Кӧзідімге, ипотеканың сині 2,5 млн салковай полза, пӱдіріг организациязы ол син ахчаа тураның проектін тимнеп саларға кирек. Тураны пӱдірер подряд организациязына ідӧк кирексіністер пар. Аның алынҷа туралар пӱдіреріне опыды ікі чылдаң асхынах нимес поларға паза ирткен чылның сан пирізін тимнеп саларға кирек.
Пӱдіріге алған ипотека ахчазы холға пирілбинче. Ол подряд организациязының счёдына салылча.
ИПОТЕКАНЫ АЛАР ОҢДАЙЛАР
Аалдағы ипотека 2020 чылның 17 февральынаң пиріл сыххан. Виктор Николаевичтің чооғынаң, 13 мартха теере Хакасияда аны аларына 250 сурыныс пічии кірген. Амды оларны Россияның аал хонии министерствозында кӧрчелер. Чыл пасталғаннаң Россельхозбанктың тоғынҷылары пу ипотекадаңар чонға искірігні таратчалар. Пастағы ипотеканы Орджоникидзе аймааның чуртағҷызы тузаланған чуртты садызарына алып алған. Хайди таныхтаан Виктор Богушевич, ипотеканы кічіг парыстығ даа, тынағдағы даа кізі алып алар оңдайлығ. Че андада ағаа созаёмщик кирек полар. Ипотека алчатхан кізее ӱс кізіні хоза тартарға чарир. Че оларның парыстары чахсы поларға кирек.
Аалдағы ипотека городта даа, аалда даа чурттығ кізее пирілче. Ӧӧні - садысчатхан алай пӱдірер чурт аалда ползын. Россияның пасха регионынзар кӧсчетсе, ідӧк пу ипотеканаң тузаланарға чарир.
Аалдағы ипотеканы аларға сағынчатхан кізее Россельхозбанктың пӧлиинзер айланарға кирек.
Автор :
Чоохтасхан Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде