АЙМАХ МЕДАЛЬЛАР САҒЫЛЫЗЫ
05.03.2019
Хабарлар
Спорт. Суғча чӱзерінӌе Сибирьдегі федеральнай округтың чемпионады паза первенствозы тоозылды. Пӱӱл анда кӧп кізі араласты. Ол пӧзік синде иртірілген.
Піс анзына кӧнік тее пардыбыс: «Ағбан» спорткомплекстегі бассейннің суу аалҷыларға уғаа килістіре пілдірче, наа чидіглерге чидерге маңат полысча. Ол даа сылтағнаң Сибирьдегі федеральнай округ (СФО) чемпионады паза первенствозы республиканың ӧӧн городында пизінңі хати иртірілді.
Хазыр оңдайда ирт турған арға-мӧрій тузында маңат тимненіс кӧзіткен, сыйыхтығ орыннарға сыххан спортсменнернің кӧксілерінде алтын, кӱмӱс, хола медальлар сағылыс турҷаңнар. Чииттернің хыринда улуғ опыттығлар даа кӧрінҷеңнер, чиңіс тутханнарны алғыстаҷаңнар.
Иң чахсы кӧзідімнерге читкеннер Омсктаң килген Мартин Малютин паза Новосибирск облазының чииттер комаңдазыңдағы Екатерина Никонова. Оларның хайзы даа тӧртер алтын медаль утып алған. 19 частығ Мартин чоннар аразындағы класстығ спорт узы полза, Екатерина часнаң аннаң кічіг спорт узы. Андағ даа полза, ол, улуғлар аразында даа марығлазып, чоннар аразындағы класстығ спорт устарын утхан. Тренерлер кӧрізінең, пу ікӧлең - СФО-ның на нимес, тиксі Россияның ізенізі.
- Чир-суғҷыларыбыс санының Фёдор Киргинековты, Дарья Афанасьеваны таныхтирӌыхпың. Фёдор пу марығ тузында спорт узы кандидадыньщ нормативн толдырыбысханы ӧріністіг. Дарья даа чиңіске парчан кӱзін салған. Ағаа 14 ле час. Аның чидіглері поларына ізенчебіс, - чоохтапча Хакасияның суғҷа чӱзерінҷе піріктірілген командазының ӧӧн тренері Сергей Бережной.
Таныхтирға кирек, Екатерина Никонова чіли, илееде спортсмен СФО-ның первенствозында даа, чемпионадында даа аралас турған. Улуғ нимес хоза танығ: СФО первенствозында 18 частығ, пастағы разрядха читкен чииттер араласханнар. Аннаңар Мартин Малютинге 19 час таа полза, ол улуғлар аразында ла араласхан.
СФО-ның чемпионады паза первенствозы тузында улуғларнаң даа, чииттернең дее чоохтазарға киліскен. Оларның хайзы даа сала ла пір ӱннең таныхтабинча: Ағбанда ибдегі ле чіли истенчелер, чиңіске парчан кӱстерін салчалар. Аалҷыларның кӧбізі пістің городта постарының кӧзідім-чидіглерінең илееде ас парыбысчатхан осхас. Ол даа сылтағнаң Хакасиязар килерге хаҷан даа тимделер.
Андағох чылығ сӧстер таапчалар тренерлер, марығ чарғыҷылары, командалар устағҷылары. Мына ниме чоохтапча Новосибирск облазының піріктірілген командазының ӧӧн тренері Константин Колесников: «Хайхастығ даа, че пістің спортсменнер Хакасиязар килерге хынчалар, нанҷы-ӧӧрелерін чӧптеп алчалар. Аннаңар даа піс пӱӱл иң кӧп спортсмен ағылғабыс - 100 артиинаң кізі. Екатерина Никонова тӧрт алтын медаль утып алғаны пасхазына уғаа маңат кӧзідім».
- Мындағ улуғ марығны пӧзік синде иртірерге оой нимес. СФО марииның финалы Ағбанда пизінҷі чылы иртірілчеткені городха ізенчеткенібісті киречілепче. Пӱӱл пазох анзы чахсы кӧрінді, - таныхтапча Россияның суғҷа чӱзерінҷе федерация президиумының кізізі, Хакасияның ізестіг нанҷызы Сергей Кашников.
Уғаа аарлығ сӧстер. Арға-мӧрій араласчылары суғҷа чӱзерінҷе аймах рекордтар турғысчатханы анзына маңат киречі полча. Чииттернің дее, улуғларның даа кӧксілерінде медальларның аймағын кӧрерге килісче. Піреезі, тізең, алынҷа тимнелген сыйыхтарға турысча, анзына медальлардаң даа артых ӧрінче.
Уламох поғдархастығ полған чоннар аразындағы категориялығ марығ чарғыҷызы, Ағбанзар техническай делегат сыныхтағҷы поларға килген Юрий Жердевтің аптастығ сӧстері: «Хазнабыстың пасха округтарынаң тиңнестірзе, СФО финалының салтарлары уғаа махтағлығ. Пасха сӧстернең чоохтаза, Ағбанда ирткен марығларның кӧзідімнері пасха округтарның хыринда илееде пӧзіктер. Аннаңар Сибирьнің піріктірілген командазы Россия чемпионадында паза первенствозында уламох айдас чидіглерге чидеріне ізенчебіс».
Аалҷыларыбыс, кӧксілеріндегі алтын-кӱмӱс-хола медальларын паарсах сыйбастырып ала, ӧріністерін чазырбин, Ағбаныбыснаң саңайға анымҷохтаспинчалар, хынчатхан городыбыс пол парған орынзар чыл даа сай кил турарға тимдебіс тіп ізендірчелер.
Іди ле ползын. Хакасия аалҷыларны турыстығ удурлирға, ӧрініс сыйлирға, марығларны пӧзік синде иртірерге хаҷан даа тимде. Мында сах андох «Тӧӧ» спорткомплекс сағысха кірче - анда тимненіс ирткен саналығ чӱгӱрҷеңнер хайдағ чидіглерге читчеткенін прайзыбыс пілчебіс. «Ағбан» спорткомплексті, арса, андағох ӱлӱс сағыпча? Ноға полбаҷаң, пір дее айабас.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы