ИДІНҶЕКТЕРГЕ - ЛЬГОТАЛЫҒ КРЕДИТ
19.03.2019
Хабарлар
Экономика. Хакасияда «Кічіг паза ортын бизнеске паза бизнес пастаана хабазары» нацпроект хоостыра кредиттерні льгота программазынӌа пиріп пастапчалар.
Амды пос киреен тилідеріне, кічіг паза ортын бизнеске алымға ахча алып аларға чарир. Алым чылда 8,5 % тиңнелер. Инвестиция пӧгіннеріне 10 чылға теере 3 миллионнаң 1 миллиард салковайға теере алып аларға чарир. Айланыс ахчазын ӧскіреріне - 3 чылға 100 миллион салковайға теере.
Идінҷектерге хабазыға пирілчеткен ахчаның кӧбізін республика ӱлгӱлері позытчалар. Бизнес тилізіне аймах хабазығ пирері - Хакасия правительствозының ӧӧн пӧгіннерінің пірсі. Ирткен айда Хакасия пазы Валентин Коновалов, идінҷектернең тоғасханда, аннаңар искірген. Тоғазығда идінҷектердең кірген хоптар паза чӧптер амды ӱзӱрілчелер. Кічіг паза ортын бизнес кізілерінең тоғасхан соонда, Валентин Коновалов министерство-ведомстволарға 20 азыра чахығ пирген. Прай чахығлар Хакасияда пос киреен апарарынңа тоғыстарны паза оңдайларны чахсыландырарына кӧстелче.
- «8,5 %» программа нацпроекттер алнындох полған. Республиканың идінҷектері пу киректі ӱр сағааннар. Льготалығ кредит бизнеске пылтыр даа пирілген. Че аны пирчеткен банктың саны асхынах полған, аннаңар Хакасияа федеральнай субсидия читпеҷең. Пу программаны нацпроектсер кирібіскенде, Россияның экономика министерствозы аның оңдайларын хатап кӧрібіскен. Пӱӱлгі чылдаң сығара Хакасияның идінҷектері льготалығ кредит ал поларлар, - теен Хакасияның экономика тилізі министерствозының пос киреен тилідерінҷе департамент устағҷызы Анастасия Ходько.
Льготалығ кредитті 70 банк пир полар, оларның 14-і Хакасияда пар. Амды Сбербанк, Промсвязьбанк, Хакас муниципальнай банк льготалығ кредитке чахығларны алып пастапчалар.
Программа тоғынып пастааннаң ікі неделя ирт парған. Бизнестің хайзы-пірсі кӧстеглеріне ӧнетін льготалығ кредит пирілче. Пӱӱл ол кӧстеглернің саны ӧс парған. Чылда 8,5 % льготалығ кредитті садығ киреене, чонға аймах полызығлар пиреріне, искіріг паза палғалыс киреене паза пасха даа кӧстеглерге алып аларға чарир. Кредитті пирерін алай пирбезін банк позы кӧрче. Мында кредит алчатхан кізінің тӧлен полары санға алылча.
Автор :
Ксения БУГАНОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде