13 СЕКУНДАА АЛЫС ПАРҒАН САЛТАР
03.04.2019
Хабарлар
Спорт. Россия ӱгренҷілерiнің чайғыдағы IX Спартакиадазының программазына кірчеткен грек-рим кӱрезінҷе Сибирьдегі федеральнай округтың арға-мӧрійі «Ағбан» спорткомплексте 30-31 мартта ирткен. Анда 2002-2003 чылларда тӧреен ооллар харбасханнар, алтын медаль утып аларға матап кӱстенгеннер
Хакасияның піріктірілген командазының халғанҷы чыллардағы чидіглерін санға алза, грек-рим кӱрезінде кӧзідімнер андағ ла ӧріністіг полбаңаңнар. Пӱӱл чииттер тренерлерінің кӧңнілерін кӧдірчеткенге тӧӧйлер. Іди ӱр ниместе «Ағбан» спорткомплексте ирткен СФО мариинда чир-суғҷыларыбыс хомай нимес тимненіс кӧзіткеннер. Сыйыхтығ орыннарға сыххан оолларыбыс Россия первенствозында араласханнар. Олег Тороков позының кӧдірімінде ӱзінңі орын алған, ибзер хола медальлығ айланған.
Амды даа ағаа ізеніс улуғ полған. Ол, кибіссер сыххан сай, маңат тимненіс кӧзіт турған, чиңіс соонаң чиңіс тутчатхан. Азах меетсер тудығ чох парчатхан пасха даа кӱресчілер табылғаннар. Анзы кӧрігҷілерні тың ӧріндірчеткен. Тренерлер, тізең, постары оңдайынҷа матап сананып, пӧгінчеткеннер. Оларның даа сырайларында ӧрчіліг кӱлімзірес чітпинчеткен тиирге чарир.
- Пӱӱл чахсы харбасчатхан оолларның пастағы тренері Александр Худяков полча. Александр Михайлович оларны кічігдең микелерге ӱгреткен, хайзының даа ікінӌі «пабазы» полыбысхан, - чоохтапча Россияның саблығ тренері Геннадий Боргояков.
Хаҷан сыйыхтығ орыннар ӱчӱн тоғазығлар пасталыбысханда, иң пастап Олег Тороков прайзыбысты тың ӧріндірген. Кибіссер сыххандох, Омсктаң килген Сергей Фатеевті аңдарып алған, паза даа оңарылар оңдай пирбин, изере пис хати «накат» идібіскен. 10:0 саннаң тоозылған харбазығ учазына сас ойда тастаанына тиңнелче. Пістің оол ізестіг утып алды.
Руслан Палтушев тее Новосибирсктең килген Беркут Жакыповтың сағызын саңай сығарған. Итсе, тоғазығның пастағы чардығында 2:1 саннаң сыххан, пір мике соонаң пасхазынаң тузаланча, Беркутха азахха турар оңдай пирбинібіскен. Іди, чапчаң хайынып, чир-суғҷыбыс 11:2 саннаң чиңіс тутхан.
Хакасия ӱчӱн харбазып, ӱзінҷі алтын медальны утып алған Алексей Пахтаев. Тынанар алнында ол 5:0 саннаң утчатхан. Кӱрестің ікінҷі чардығында уламох табырах хайын сыххан. Іди ӱр ниместің не аразына саннар 9:0 пол парғаннар. Марығ оңдайлары хоостыра тоғазығ тузында кӱресчілернің піреезі 8:0 саннаң алнында парчатса, ағаа чиңіс пирілче, учазын кибіске чапсыра пазып алғанына тиңнелче.
Азах меетке сығып алған чир-суғҷыларыбыс санынаң Игорь Глазунов кибіске сых килді. Ағаа Новосибирсктең килген Ян Карабцовнаң харбазарға кирек. Тоғыртын кӧрзе, пістің чир-суғҷыбыс чапчаң даа, кӱстіг дее пілдірче. Аннаңар сала даа ікінҷілес чох Хакасияның чыындызына пазох алтын медаль кірді тіп сағынчатхабыс. Саба сағыс полтыр. Обекелерібіс ізенген тағда киик тее чох поладыр тіп тиктең не чоохтаспаңаңнар нооза. Аалҷы оолның тутхан холы тимір осхас, хапхан холы хысхыс осхас пілдірче бе таң чир-суғҷыбысха. Піди кӧріп одырза, позып полбастың холына кірген осхас чир-суғҷыбыс. Ян, тізең, пір ле холға киргенде, харчых чіли чапсын парған, пір дее позытпиныбысхан.
Пастап ол марығ ээзін кибіске аңдарып алған, анаң на кірлектендір сыххан. Тӧрт хати «накат» иткенде, тоғазығны тохтатчалар. Марығ чарғыҷызы аалҷы оолның холын чоғар кӧдірче, чиңіс ағаа пирілче.
Алтын медаль ӱчӱн харбасчаң Антон Пахтаев халды. Ӱр ниместе СФО мариинда ол пістің командада чалғыс ла чиңісчі полған. Амды даа азах меетке сығып алған. Ибде хайди даа утарға кирек тіп, сала даа ікінҷілес чох одырғлапчабыс. Сынап таа, Антон кибісте ӧткін хайынча, ізестіг тудынча. Тоғазығның пастағы чардығы даа пісті тың ӧріндірген, 7:6 саннаң Антон алнында парчатхан.
Тынанып алған соонда чир-суғҷыбыс 11:6 саннаң утчатхан. Кинетін не кӧйтік сӱмее кір парған, кибіссер учуға халды. Иркутсктаң килген Вадим Степанов пу чидігде тохтирға сағынминча, алнынзар ла сыынча. Амды Антон аны китеп алды, 4 санға сиилібісті. Вадим пазох ла саннарны тиңнестіріп алды. Че махалығ микелернең тузаланған сылтаанда, кӱрес тиң саннарнаң тоозылза, чиңіс Антон Пахтаевке пирілердеңер азынадох чарлалған. Аннаңар даа кӧрігҷілер прайзы азах узында. Пістің тренерлер сала ла чӱгӱріс чӧрбинчелер.
«15 секунда халды, сыдас, оол!.. 13 секунда халды!» - хысхырарға маңнанды кем-де. Анаң - сымзырых. Антон кибісте чатча. Вадимге 1 сан пирілче. Іди аалҷы оол, тоғазығның халғанҷы секундаларында кибіс ээзін аңдарып алып, 16:15 саннаң утхан.
Россия ӱгренҷілерінің чайғыдағы Спартакиадазының программазына кірчеткен грек-рим кӱрезінің оңдайлары хоостыра федеральнай округтарда ирткен марығларда пастағы орын алған ӱгренҷілер ле финалда харбазарлар. Андағ оңдайнаң ӱгренҷілер Спартакиадазында Хакасиядаң ӱзӧлең аралазарлар: Олег Тороков, Руслан Палтушев паза Алексей Пахтаев.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде