ЭКОНОМИКА ТИЛІЗІНЕ УЛУҒ ХОЗЫМ
21.05.2019
Хабарлар
Чыылығ. Хакасияның пазы Валентин Коновалов «Кимдегі Сибирь» инвестициялар проекттерінің комплексін чуртасха кирерге тӧстелген республикадағы тоғысчы группа араласчыларынаң хада теестегі чыылиин иртірген.
Инвестициялар проекттері комплексінің (КИП) кӧстее Хызылчар крайының, Хакас паза Тыва республикаларның экономиказын тилідері полча. Пу регионнарның устағӌылары іди хада-пірге тоғынардаңар постары чӧптезіп алғаннар. Анаң Россия президентінің чарадиин сахтааннар. Хазна устағӌызы чарасхан. Чӧптезіг пылтыр Хызылчардағы экономика форумында иділ парған. Пӱӱнгі кӱнде ол комплекссер тиксі 32 проект киріл парған.
- Пу проект хоостыра 2019 - 2027 чылларда регионнар бюджедінзер кірер налог ахчазы асхынах нимес полар - 600 миллиард салковай пір чылда! Паза 70 муң азыра тоғыс орны полары кӧрілче. Хакасияның проекттері ідӧк уғаа танығлығлар, - теен Хакасия пазы Валентин Коновалов.
Амғы туста «Кимдегі Сибирь» комплекссер Хакасияның 12 инвестиция проекті киріл парған. Оларға 200 миллиард азыра салковай позыдылар.
Кӧзідімге, пістің республика Ағбан - Бийск автомобильлер чолын тимнирге пӧгінче. Хара тас аныӌаң компаниялар ідӧк хара тас тартчаң автомобильлер паза тимір чоллар пӱдірерге сағынчалар.
Хайди таныхтаан Валентин Коновалов, мындағ проекттер пары - чахсы, че иң ӧӧн пӧгінібіс - Хакасияның чуртағӌылары тынчатхан кии кірлелбезін. Экология кирексіністері хайди даа толдырылзыннар!
Нимее кирек тоғысчы группа? Хайди чарытхан Хакасияның экономика тилізінің министрі Николай Евдокимов, аның ӧӧн пӧгіні - региондағы идінӌектерге Хакасия правительствозынаң хада пір чӧпке килерге хабазары. Правительствода полған на проект кӧрілче нооза, анаң хайзы чарадылча, хайзында читіре тоғыныбызарға айландырчалар. Чарасхан проекттерні, тізең, полғанын на, федеральнай синдегі тоғысчы группа кӧрче. Аннаң Россия правительствозы кнезінің пастағы орынӌызы, Россияның финанстар министрі Антон Силуанов устапча.
Правительствода ирткен чыылығда ідӧк «Коулстар» хара тас компанияның тоғызынаңар искірілген.
(Пылтыр, ідӧк Хызылчардағы экономика форумында, пу компания Хакасия бюджедінзер улуғ ахча кирер паза чонға муңарлап тоғыс орныларын пирердеңер чӧптезіг иткен.)
Пӱӱнгі кӱнде «Коулстар» компанияның холында Майрыхтағы паза Пии-Кидеркі чирлердегі хара тас разрезтері полчалар. Пастағызында 2018 чылда 3 миллион тонна хара тас анылған полза, ікінӌізінде тоғыс ам даа пасталғалах. Устағӌыларның сананыстары хоостыра Пии-Кидеркі чирлерде илееде кӧп хара тас аныл парғадағ. Іди «Коулстар» компания 2030 чылға анып алған хара тас синін 30 миллион тоннаа читіріп аларға пӧгінче. Тоғыс орны, тізең, тӧрт муң азыра кізее пирілер.
Паза пу компания 2022 чылдаң сығара Хакасияда хара тасты таарлап апарӌаң пірге операторны тоғындырарға сағынча. Ол проекттің паазы - 51 миллиард салковай. Анда пирілер тоғыс орныларының саны - 250.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде