НАА ИСТІГ КВАРТИРАЛАРДА ЧУРТИРЛАР
26.07.2019
Хабарлар
Чааҷыларға чурт. Россияның арачыланыс министерствозының «Центррегионжильё» ФГКУ-зының Ағбандағы пӧлиинің пастығы Андрей Балконский чааҷыларға чурт пирілчеткенін чарытхан
Хайди Андрей Балконский искірген, Россияның арачыланыс министерствозының «Центррегионжильё» федеральнай хазна казённай учреждениезі пӱдіріл парған тураларда чааҷыларға квартиралар пирер тоғысты апарча. Ол гражданскай организация полча, чааҷылар комиссариадынаң пір дее палғалыстығ нимес. Позының тоғызында учреждение «Чааҷыларның статузынаңар» федеральнай законға паза арачыланыс министерствозының приказтарына тӧстенче. Ідӧк квартиралар пирер сурығларда хайди даа Чурт кодексі пастыра тоғынарға киректелче.
- 18 июльда Ағбандағы тимірчолҷылар бригадазында служба иртерге читі чиит лейтенант килген. Олар - Санкт-Петербургтағы армияның генералы А.В.Хрулёвтың адынаң чаа академиязын паза Ростовтағы хазна университедінің чаа кафедразын тоосхан офицерлер. Чаа академиязынаң материально-техническай киректерҷе специальностьтығ килгеннер, Ростовтағы университеттең - тимір чол транспортынҷа специальностьтығ. Оларға чааҷылар чуртапчатхан общежитиедегі комнаталар клӱстері читірілген, - чоохтаан Андрей Балконский.
Аның чооғынаң, контрактча чааҷы службазын таллап алған чааҷыларға ӱс ай аразына служебнай чурт пирерге киректелче. Норматив хоостыра чааҷылар общежитиезінде пір кізее 6 квадрат метрдең асхынах нимес чурт пирілче, квартира пирілчетсе, пір кізее 18 квадрат метрдең асхынах нимес килізерге кирек. Общежитиеде чурт аларына чааҷы рапорт пасча, аннаң чӧптезіг иділче, ол чурт алар кізілернің реестріне кирілче. Пос орын пар полза, ағаа клӱс читірілче.
Чурттарны ікі чардыхха чарарға чарир: служебнайға паза тӧреміл чуртирына. Служебнай чурт фонды арачыланыс министерствозының холында, аны социальнай наймҷа чӧптезіг идеріне айландырарға, аннаң андар ағаа приватизация идерге чарадылбинча. Чааҷылар пір орында ла служба апарбинчалар нооза. Пасха орынзар ызылчатса, ол служебнай чуртты позытча, аның орнына андар пасха чааҷы паза аның сӧбірезі кирілче. Андағ оңдайнаң, служебнай чурт фонды хызырылбинча, арачыланыс министерствозы наа туралар пӱдірзе, ол хозылып одырча.
Тӧреміл чуртир чурт 20 чыл азыра чааҷы службазын контрактча ирткен кізілерге пирілче. Ол стажха срочнай служба чыллары кірче. Служба тузында ниме ле пол парбинча: кізі палығлат салча, ағырыбысча, анаң хазии хоостыра чааҷы службазынаң парарға киліс парча. Оларға ідӧк тӧреміл чурт пирерге киректелче. Амды службадаң отставкаа парчатханнарға квартира пирілбинче, оларға хынған на город-аалда чурт садызып аларына субсидия алай ахчалығ сертификат пирілче.
- Ағбандағы гарнизонда 328 кізі квартира аларға теесте турча, оларның 138-і, общежитиеде чуртап, квартира сағыпча. Ідӧк 190 чааҷы городта чуртты арендаа алып чуртапча. Оларға чуртты арендаа алчатхан ӱчӱн компенсация тӧлелче. Арачыланыс министерствозы Ағбанда чааҷыларға кӧп квартиралығ пис тура пӱдір салған, олар пу адресче орныхчалар: Аскизскай орама, 240. Пір тура пылтыр тузаланысха кирілген, ол сигіс хадыллығ турада чааҷыларның сӧбірелері чуртапча. Тӧрт тура пӱӱл тузаланысха кирілер, аның соонда теесте 100-че ле кізі халар, - теен «Центррегионжильё» пӧлік устағҷызы.
Піс Андрей Балконскийнең хада республика военкомадынаң МПС микрорайонзар наа туралар пӱдіріл парғанын кӧрерге чӧргебіс. Сигіс хадыллығ турада кізілер чуртапчатханы кӧрінче. Тоғыс хадыллығ тӧрт тура, тастынаң кӧрзе, тимде турча. Олар пірер подъездтіглер, ізіктері пиктіг. Туралар аразында олғаннарға ойнаҷаң площадкалар тимде, автомобильлер турғысчаң орыннар пар, прай чоллар асфальтнаң чабылых. Туралар улуғ панельлердең пӱдірілтірлер, ам оларны сіліг иде сырлап салтырлар. Чааҷыларға пу тураларны Ағбанның пӱдіріг компаниязы пӱдірче.
Хайди Андрей Григорьевич таныхтаан, пӱдіріг 2015 чылда пасталған. Пӱдіріг компаниязы позының тоғызын уғаа чахсы толдырча. Андағы квартираларда прай ниме пар: сантехника, электроплита, ванна, раковиналар паза даа пасха кирек ниме. Стенелерде - обойлар, полда -линолеум. Пір сӧснең, кір, чурта. Итсе, постың мебельін аларға кирек полар. Тураларда иң кӧп пір комнаталығ квартиралар, оларның улии 30 квадрат метрдең асча, ідӧк пис тее комнаталығ квартиралар пар, андар кӧп палалығ улуғ сӧбірелер кирілер. Улуғ сӧбіреліг чааҷылар саны асхынах нимес. Ікі, ӱс, тӧрт тее комнаталығ квартиралар пар.
Ағбанда Аскизскай орамадағы 180-ҷы турада орныхчатхан общежитиені Россияның арачыланыс министерствозы 1993 чылда городтаң садызып алған. Мының алнында анда олаңай кізілер чуртаҷаң ползалар, амды ол чааҷылар общежитиезі полча. Пір сӧснең чоохтаза, Ағбандағы гарнизонда чурт сурии чахсы пӧгілче.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы