НАЛОГ ӦСЧЕ - ИДІНҶЕКТЕРНІҢ КӦҢНІ ТӰСЧЕ
24.09.2019
Хабарлар
Тоғазығ. Хакасияның ис-пай паза чир хайызығлары министерствозы республиканың идінҷектерінең тоғасхан. Тоғазығның оон сылтаа - идінҷектернің тибіреділбинчеткен ис-пайының кадастр паазын паалиры
2020 чылның 1 январьынаң тиксі Россияда идінҷектернің тибiреділбинчеткен ис-пайының кадастр паазын паалир теестегі тоғыс апарылар. Хакасияның ис-пай паза чир хайызығлары министрі Евгений Тарасов идінҷектерні пу тусха тимнен саларға хығырған.
- Идінҷектерге 1 январьға теере постарының ис-пайынаңар декларацияны Хакасияның хазна кадастр паалағ кінінзер пир саларға кирек. Анда олар ис-пайдаңар алғым чарыт пирзіннер, - чоохтапча Евгений Борисович.
Че республиканың идінҷектеріне иртер сыныхтағ коңнілері кірбинчеткенге тӧӧй полған. Анзы пілдістіг. Ис-пайларны паалаан соонаң, оларның кадастр паазы хай-хай ӧс парча нооза. Аннаң хада налог сині алысча. Козідімге, 2016 чылда ирткен ис-пайларны паалир тоғыс парғанда, Алтай аймааның Сартых аалындағы 1939 чылда пӱдірілген улуғ нимес садығ тураҷааның кадастр паазы 2 миллион салковай пол парған. Аның сылтаанда аның ээзіне позік налог толирге килісче. Че садығ туразының рынок паазы аннаң хай-хай тобін!
Тоғазығда «Илона» садығ туразының ээзі Нэля Медведева ідок чоох тутхан:
- «Илона» садығ туразының паазы 13 миллион салковай полған полза, 2016 чылның соонаң аның кадастр паазы 49 миллионға ӧс парған!
Идінҷектер кадастр паазынаң чараспинчатсалар, оларға чарғызар айланарға килісче. Анзы ідок хоза хорадығ.
Мындағ сидіксіністер Хакасияда ла нимес, тиксі Россияда. Анзы тибіреділбинчеткен ис-пайны паалир наа системанаң палғалыстығ, хайзы хазнада 10-ҷа чыл тоғынча. Аннаңар идінҷектернің ис-пайының кадастр паазы рыноктинаң пӧзік пол парча.
Хакасияда тиксі 600 муң азыра объект саналча. Оларны хазна кадастр паалағ кіні орта паалаан ӱчӱн, чыл тоозылғанча идінҷектерге декларация ызарға кирек. Тоғыс чапчаң парар ӱчӱн, учреждениенің директоры Олег Топоев идінҷектерге декларацияны алғыда паза иптіг тимнирге чоп пирче.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы