ИМНЕГ ТУРАЗЫНДА - НАА ТОМОГРАФ
10.12.2019
Хабарлар
Имнег кирее. «Хазых хайраллиры» нацпроекттің «Чӱрек-тамыр ағырығларынаң тоғыр кӱрезіг» регион программазы хоостыра Ағбандағы имнег туразында кізі хазиин сыныхтаӌаң томограф турғызылды
Пу аппарат Сапоп Aguilion PRIME фирманың халғанҷы сығарызы полча, ол рентгенні табырах иртірче. Аның салтарлары 3 - 5 минута пазынаң имҷее ызылчалар. Наа оборудование полызиинаң кізінің пазындағы, азахтарындағы тамырларын паза чӱреен сыныхтирлар. Ӏди кізі инфарктнаң алай инсультнаң ағырча алай чох па тіп ілезіне сығарарлар. Ағаа хоза томограф пастыра онкология ағырығларын табарлар.
Имнег тириинең имплантаттар кис чӧрчеткен кізінің дее хазиин сыныхтирға чарир. Ӏдӧк томографча палаларның паза 205 килограммға теере пасчатхан туустығ кізілернің хазиин кӧрҷең оңдай пар. Пу наа оборудованиенің столы пик.
- Пӱӱл имнег тиріглерін аларына 70,3 миллион салковай хорадылған, - чоохтапча Хакасияның хазых хайраллаҷаң министрі Владимир Костюш. -Томограф 42 миллион салковайға тур парған. Проектті паза сметаны тимниріне алты миллион салковай хорадылған. Национальнай проектті пазағы чылда узарадарына 196,5 миллион салковай кӧріл парған. Ол ахчаның 90 миллион салковайы инфарктха хаптырған паза хан айланызынаң ирееленчеткен кізілерге имнер аларына позыдылар. Ӏдӧк 2020 чылда региондағы чӱрек-тамырлар кінінде тыхтағ тоғыстары апарылар паза 66 миллион салковайға наа ангиограф алылар. Ӏди ол кінде кізінің чӱрек-тамырларын имнеҷең ікі аппарат полар. Олох программаҷа 20 миллион салковайға Асхыстағы паза Харатастағы имнег тураларынзар наа оборудование алылар.
Таныхтирға кирек, Ағбанның имнег туразындағы имҷілер наа томографнаң тынағ кӱннері чох паза хараа-кӱнӧрте кізілернің хазиин сыныхтирлар. Пір ай аразына ол аппаратча 1000-1100 кізі иртер.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде