ААЛ ХОНИИНАҢ АЙҒАСЧАТХАННАРҒА - ГРАНТТАР
18.12.2019
Хабарлар
Хазна хабазии. Ирткен неделяда Хакасияның правительство туразында аал хониинаң айғасчатханнарға грант аларына сертификаттар читіргеннер
Хакасияның пазы Валентин Коновалов хазна хабазиин алчатханнарны мындағ танығлығ кирекнең алғыстаан:
- Пӱӱл фермерлерге хабазарына федеральнай паза республика бюджеттерінең 30 миллион салковай пирілген. Сӧбіре фермазы тилізіне алынҷа 40 миллион азыра салковай позыдылған, техника паза оборудование аларына - 11,5 миллион салковай. Килер чылда хабазығ синін ӧскірібізербіс. Ӧзімнер ӧскірчеткеннерге паза маллар тутчатханнарға хабазығның пір кӧрімі - ол «Агростартап» марығ. Анзы фермерлерге хоныхтарын тилідеріне хоза оңдай пирче - чир участоктарын паза техника аларына.
Тоғызыңар ӱчӱн улуғ алғыс! Киректерің киліссін. Хоныхтарыңда сидіксіністер полбазын. Сағынған сағыстарың толзын. Предприятиелерің, хоныхтарың тилізін.
Анаң республика пазы фермерлерге ахчалығ хазна хабазиин аларына сертификаттар читірген. Оларның санындалар: «Знаменский» аал хонии кооператив алты сӧбіре фермазы паза «Агростартап» марығның 14 чиңісчізі. Хазна хабазии тиксі 92,5 млн салковайға пиріл парған.
Хакасия пазының орынҷызы, регионның финанстар министрі Ирина Войнова аал хониинаң айғасчатхан кізілерге алғызын читірген:
- Кресен-фермер хоныхтарының устағҷылары, тоғызыңар ӱчӱн улуғ алғыс! Сірер матырзар. Піске, правительстваа, 2020 чылда аал хонии ӧӧн отрасльның пірсі полар, хайзына піс улуғ хайығ саларбыс. Килер чылның бюджедінде аал хониина 77 процентке кӧп ахча кӧріл парған. Сағынған сағыстарың толзын. Сірерге чахсы кӱннер алғапчам, бензин паазы ниик ползын. Піс, тізең, сірерге полызарбыс.
Боград аймааның Знаменка аалдағы «Знаменский» кооперативсер 17 кізі кірче, хайзы, хада-пірге тоғынып, тоңастығлар, чир тамаан ӧскірче, чоннаң ит садызып, аннаң ас-тамах тимнепче. Пірігіс тилізіне 11,4 млн салковайға грант пирілген. Ол ахчаа маллар кӧдірҷең весы, автомобиль весызы, ікі прицеп, пір тягач паза 10 холодильнай камера алылар. «Знаменскийнің» кнезі Алексей Кокшаровтың чооғынаң, пу хабазығ кооператив тилізіне улуғ хозым идер.
Таштып аймаандағы Ибіг аал чуртағҷызы Лариса Тербежекова кресен-фермер хониин пӱӱл азып алған. Ол «Агростартап» марығның чиңісчізі полыбысхан.
- Малларны чииттеңӧк тутчабыс. Мин тынағдабын. Амды, 3 миллион салковайға грант алып алғанда, трактор, пресс, герефорд тӧлліг пуға алып аларға сағынчам. Малларнаң оолғым Александр айғасча. Хониибыста 60 пас мал, ол санда 25 інек пар. Пістің «Беларусь» трактор пар, че ол хыра тартарға сыдабинча, аннаңар сала кӱстіг трактор садызып аларбыс. Бизнес-план хоостыра кресен-фермер хониибыссар ікі тоғынҷы алып аларға кирекпіс. Піске тракторист тее, малҷы даа кирек, - сағыстарынаң ӱлескен Лариса Тербежекова.
Хакасияның аал хонии паза ас-тамах министерствозы искіриинең, кресен-фермер хоныхтарына паза кооперативтерге хазна хабазиин пирерінңе тоғыс узарадылар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде