СИЗІГІ ЧОХ КӰҶӰГЕС
25.03.2020
Статья
Нымах
Иртен иртӧк хап-хара кӱҷӱгес, усхун парып, іҷезін чідір салтыр. Кӱчӱгес сағын салған: «Йо, кем минің ічем? Ундут салғам. Киҷее пілгем, че пӱӱн пілбинчем. Іҷемні тілирге парарбын».
Іди ол адайах, уйазынаң сығып, хайдар даа парарын пілбин, пастыр сыххан. Чолда ағаа таңах пiспиҷектерiнең тоғас парған.
- Син минің ічем? - сурған кічіг хара кӱҷӱгес.
Таңах кӱҷӱгесті, піспиҷектері ӱчӱн хорығып, хахлап сыххан: «Ке-ке, мин таңахпын, чағын пастырба, чӱгӱр мыннаң!»
- Че, пу минің іҷем нимес полтыр! - хыңзып, аннаң ойлаан кӱчӱгес. Іди ол оттапчатхан ӧскіҷекке тоғас парған.
- Син минің ічем? - сурған ол.
- Мин ӧскібін. Андағ сӧстер ӱчӱн мин сині амох сӱзібізербін! - меелеен ӧскі, мӱӱстіг пазын тӱзіріп, че кӱҷӱгесті сӱзерге маңнанмаан, ол ойлабысхан.
- Син минің іҷечеем? - сурған кӱчӱгес хайдағ-да хынығ, марха осхас тумзухтығ, кӧлбедең ниме-де чаплада чіпчеткен пір аппағас малдаң.
- Хрӱ-хрӱ, чох, мин сосхабын. Мағаа азыранарға харығ полба! - кӱҷӱгестең кӧлбезер айланып, чоохтанған сосха.
Кӱн харағына от аразында сіліг, тоғылах, сарығ харахтығ, ах сағаллығ, хайхастығ аңычах чат салтыр. Кӱҷӱгес, ағырин китеніп, ол аңыҷахсар чағын пастырған. Анаң кинетін, от аразынаң сегір киліп, хысхырып сурған: «Син минің ічем?!»
Ол сӧстер соонаң ол аң алыс парған, амды ол андағ сіліг кӧрінмеен кӱҷӱгеске: харахтары харал парған, тӱгі паза хузурии тырбай парған, пилі, терпек чіли, тоғылахтан парған, амды ол айнаҷахха тӧӧй пол парған.
- Ф-ф-ф-ф-ф! Мин хоосхабын! - кӱҷӱгестің хулаан тырбахтабызып, сидензер сегіріп, чіт парыбысхан.
Кӱҷӱгес хомзынғанына харасхы, чылығ хазаазар кір парған. Анда ол ылғаан. Ниме-де чылығ аның пазын сыйбаан. Мӱӱстіг, чоон ниме кӱҷӱгесті айап чалғаан. Кӱҷӱгес, чочып парып, иң харасхы пулуңзар кір парған.
- Кемзің син? - тітіреп, сурған кӱҷӱгес.
- Мӱӱ-мӱӱ, мин інекпін! Ылғаба, иркечек, миннең хорыхпа. Мин сағаа теңмеспін. Хайдағ синің чобағ пол парған? - чохыр інек амыр сурған.
- Мин іҷемні чідір салғам. Иртен усхун килгем, ол чоғыл. Аны кӧрглеп, хазыр таңахха, мӱӱстіг ӧскее, харам сосхаа паза хорғыстығ хоосхаа учурап парғам, че іҷемні таппаам, - хыңзып, чоохтанған кӱҷӱгес.
- Хайдағ син сизігі чох кӱҷӱ-гес ... - кӱлініп, амыр чоохтанған інек. - Синің ічең - адай. Иртен ол чазызар пістің ээзібіснең хада тоғынарға парыбысхан. Ол хой хадарча. Хапчығай ибіңзер пар, ол ӱр ниместең сині эмізерге чиде тӱзер.
- Улуғ алғыс, інегес! - сала маңзыри ибінзер ойлаан кӱҷӱгес. Анда аны іҷезі сағып турған.
Палаҷахтар, хаҷан даа іҷе-паба чох ибдең парбин турыңар!
Ольга АБУМОВА, «Тирегес» олған садының воспитательi
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы