АҒАЛАРЫМА ПОҒДАРХАПЧАМ
01.04.2020
Статья
Пӱӱл Илбек Ада чаа тоозылғаннаң Чиңістің пайрамнығ 75 чылы таныхталча. Мин позымның чааласхан ағаларымнаңар пас пирерге сағынчам. Олардаңар улуғларыбыс чоохтапчалар, чааның сидік чылларын сағысха кирчелер. Ол туста фронтта даа, тылда даа чуртас сидік полған.
Минің ууҷамның чооғы хоостыра, улуғ ағам Александр Андреевич Капсаргинні (хакас ады - Влас) чааның пастағы кӱннеріндӧк фронтха апарыбыстырлар. Улуғ ағам ат хадарчызы полтыр, улуғ ууҷам хойларны хадарған. Олар Асхыс аймаандағы Сыр аалда чуртааннар. Улуғ ағам армияа хабылғанда, ипчізі холында ӱс палалығ халған. Тун палаа 6 час полған полза, очызы наа ла тӧреен полған.
Улуғ ууҷама тоғысха чӧрерге, палаларны азырирға, аннаң андар чуртирға кирек нооза. Ол палаларын ибде халғыс салҷаң. Кічіглерін 6 частығ хызыҷаа кӧрген. Соонаң ол сидік чылларны сағысха киріп, харах чазы ӧтіре чоохтачаң. Ӧзӧгістіг, аар, соох чыллар полған.
Ағабыс 1941 чылда июль айда чааға парғаннаң паза аннаң хабар истілбеен. Ол орыс тілін паза пічік пілбинчеткен. Аның сомы даа халбиндыр. Ууҷабыс таа пічік пілбеен, ӱс буква пазарға ӱгрет салтырлар.
Амды Илбек Ада чаа ветераннарынаңар «Хумартхылас книгазынаң» на піліп аларға чарир. Пу книгадаң Александр паза Алексей Капсаргиннер харындастардаңар піліп алғабыс. Олар 1941 чылда чааға хабылғаннар. «Хумартхылас книгазында» олардаңар піди пазылча: «Капсаргин Александр Андреевич Хакас автоном облазындағы Асхыс аймаанда тӧреен. Асхыстағы РВК-даң хығыртылған, 239-ҷы атығҷы дивизиязының рядовойы. Палығлатхан соонаң 1942 чылда 3 августта ӱреен. Карелиядағы Кемь городта чыып салғаннар».
«Капсаргин Алексей Фёдорович 1910 чылда Хакас автоном облазындағы Асхыс аймаанда тӧреен. Асхыстағы РВК -даң чааға хығыртылған. Палығладып, 1944 чылда 9 сентябрьда ӱреен. Воронеж облазындағы Семлукскай аймахта чыып салғаннар».
Мин чаа тузынаңар улуғларымнаң искем. Хорғыстығ тусты иртпеен кізілер аннаңар чоохтап полбастар. Че мин ағаларыма поғдархапчам. Піске чарых чуртас сыйлап пиргеннері ӱчӱн оларға улуғ алғыс паза пістің сағызыбыста хаҷанға даа халарлар.
Дарья МАГАНАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде