АЛҒЫМ КӦРЕРГЕ, НАА ОҢДАЙЛАР ТАБАРҒА
13.10.2021
Хабарлар
ПОС КИРЕЕ: асчабыс, тилітчебіс, парыстанчабыс
Идінӌек. Хакасияның тиліс чыындызы паза «Минің пос киреем» кін идінҷектерге паза пос киреен азарға сағынчатханнарға аймах оңдайнаң хабасчалар. Оларның пірсі - идінӌекке кӧзідігде аралазарына хабазығ
Пу наада полызығнаң тузаланып, Москвада иртчеткен «World Food Moscow-2021» ас-тамахтың иң килкім кӧзідиинде кресен-фермер хонии пазы Павел Боргояков аралас килді. Павел Геннадьевич республикада талғанны промышленнай оңдайларда сығарча. Чорыхтаң айланып, ол «Хакас чирі» газетанаң кӧңнінең ӱлескен.
- Мин пу кӧзідігде ікінӌізін аралас килдім. Пастағызын ирткен чылда чӧргем, - чооғын пастапча идінӌек. - Чыл сай Хакасияның тиліс чыындызы идінӌектерге кӧзідіглерде аралазар оңдай пирче. Россия алай чоннар аразындағы кӧзідігде аралазарға сағынчатханнар пу хабазығны аларынӌа марығда араласчалар. Хабазығ кӧзідігде орын аларға, сығарчатхан ниме-ноонаң, полызығнаң таныстырӌаң кӧзідіг-искіріг материалларын тимнирге, ол нимелерні читірерге паза кӧзідіг орнын тимнирге пирілче. Пос ахчазын чолға, городта чуртирға паза азыранарға хоратчазың.
Пӱӱл Хакасиядаң «World Food Moscow-2021» кӧзідіге тоғыс пірігіс паза республиканың экономика тилізі министерствозының, тиліс чыындызының тоғынӌылары чӧргеннер. Кӧзідіг ӱртӱн айынын 21 - 24-ӌі кӱннерінде Москвада Крокус ЭКСПО кӧзідіглер кінінде ирткен. Анда 15 пӧлік тимнелген: аймах чиистердең паза ісчең суғлардаң пасти ас-тамах сығарызында, садиинда киректелчеткен полызығлар компанияларына теере. Пу кӧзідіг Россияның чырғалына ла кӧстелбеен, тилекейдегі пасха хазналар даа постарының ас-тамаан кӧзіткеннер. Пілдістіг, идінӌектер паза компаниялар кӧзідіглерде палғалыстарны тыыдарға паза наа партнерлар тілирге тіп араласчалар. Павел Боргояковтың пӧгіннері пасхалалбинча.
- Пасха регионнарзар сыхчаң сағыс пар, - тіпче ол. - Пӱӱнгі кӱнде талғанны Хызылчарзар паза Тыва Республиказар садарға алчалар. Wildberries интернеттегі садығ туразында садылча (Wildberries - ол чоннар аразындағы интернеттегі садығ туразы, анда кип-азах, ӧдік, олғаннарға, ибзер паза пасха ниме-ноо садылча. Ол Россия-да, США-да, Францияда, Италияда, Испанияда, Белоруссияда, Казахстанда, Киргизияда, Арменияда, Польшада, Словакияда, Германияда, Израильде паза Молдавияда тоғынча). Садығнаң чиит ооллар айғасчалар. Ирткен чылда «World Food Moscow» кӧзідігде араласхан соонаң олар постары минзер сыхханнар. Олар мағаа талған нинӌе кирек чахыбысчалар, мин ыс пирчем.
«World Food Moscow-2021» кӧзідіг тӧрт кӱн ирткен. Павел Геннадьевич кӧзідігнің полған на кӱніне талғаннаң конфеттер тимнеп алӌаң. Талғанны амзап кӧрерге сағынчатханнарға сыйлап турған. Пастағы кӱніндӧк андар хакас оол пастырғаны чапсытхан. Ол Москвада ӱгренчеттір. Чыл сай пу кӧзідігні кӧрерге кил парчаттыр.
- Мексиканецтер пастырғаннар, піліс полбаабыс, тіл пілбинчеттірлер, - хатхырча идінӌек ирен. - Тілбесчілерібіс, Хакасияның тиліс чыындызының специалисттері, англия ла тілін пілчелер.
Хабазығ пірігістері Павел Боргояковха пу кӧзідіге талғаннаңар искірігліг брошюра паза визиткалар тимнеп пиргеннер. Пӧзік синдегі кӧзідігде аралазары аарлығ турча, хабазығда, тізең, араласчаң тӧлег кӧріл парған. Аннаңар Павел Геннадьевичке чол паза чурт суриин не пӧгібізерге халған. Москвада туғаннар удур парғаннар. Іди идінӌек пу хабазығнаң тузаланып алғанына паза кӧзідігде пол килгеніне чӧпсінче.
Чоохтирға кирек, Павел Геннадьевич кӧзідігнің прай кӱннерінде хакас кӧгенеен кизіп араласхан. Анзы ідӧк араласчыларның паза кӧрігӌілернің хайиин тартхан.
- Хайдағ даа килкім мероприятие тузалығ поладыр, наа таныстарнаң хада оларның опыттарынаң танысчам, наа сағыстар тӧріпче, - чоохтапча Павел Боргояков. - Талғаннаң на пайып парбассың. Кӧзідіглер алғым кӧрерге паза наа оңдайлар табарға полысчалар. Хакасияның кічіг паза ортын пос киреенең айғасчатхан улусха килкім кӧзідіглерде аралазарға оңдай пирчеткен ӱчӱн, республиканың тиліс чыындызын паза «Минің пос киреем» кінні алғыстирға сағынчам, - чылығ сӧстернең айланызын пастаан идінӌек кізі. - Пу чорыхта полғанда, идінҷектерге хабазар пӧгіннең тӧстелген кіннер республикада чахсы тоғынчатханнарын паалаам. Хонӌых регионнардаң килген улус пос чирінде оларға тӧӧй пірігістер парынаңар даа испеендірлер, итсе, олар Россияның прай регионнарында тӧстелгеннер нооза. Ікі чыл аразына мин олар чарлапчатхан илееде ӱгредіг паза полызығ мероприятиелерінде араластым. Ӱгредіг ӧӧнінде тикке пирілче, пос киреен апарарға кӧп тузалығ искіріг алчам.
Идінӌектің чазыт сағыстарын аспаспыс, сағынған сағыстарын толдырарға оң ползын тіп алғирбыс. Хығырығӌыларға идінӌектің кӧзідімін санға аларға паза кічіг паза ортын пос киреене хабасчатхан пірігістерзер, Хакасияның тиліс чыындызынзар паза «Минің пос киреем» кінзер, айланарға чӧптирбіс. Полызығ аларына тимненерге тус илееде парыбысча, хайди улуғларыбыс улуғ чолға азынада тимненӌеңнер, амғы ӧткіннерге ідӧк ырах сағынып тудынарға кирек. Пір саңай прай ниме пирілбинче...
Автор :
Тимнеен НАТАЛЬЯ СУБРАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы