ПОЛЫЗЫҒ ХАРАА - КӰНӦРТЕ ПИРӀЛЧЕ
05.03.2019
Хабарлар
Имчі-терапевт Татьяна СУСТАГАШЕВА тоғыс тузында
Имнег кирее. Татьяна Николаевна Сустагашева 25 чыл Алахтайларда терапевт полып істен парир. Ол кӱннің сай чир-суғҷыларының хазиин хайығда тутча.
Пии аймаандағы Алахтайлар аалынзар чорыхха чӧріп, анда орындағы имнег туразында имҷі-терапевт Татьяна Николаевна Сустагашеванаң танызып алғам. Ол, 1994 чылдаң сығара Алахтайлардағы амбулаторияда істеніп, кӱнде 5 - 15 кізее полызығ пирче. Ідӧк кічіг палаҷахтарның хазиин хайығда тутча.
Таныхтирға кирек, Алахтайлар аалы - Татьяна Николаевнаның тӧреен-ӧскен чирі. Школа тоозып, ол Хызылчардағы имнег университедінзер ӱгренерге кірген. Имҷее ӱгреніп алған соонаң чиит хыс пір дее ікінҷілес чох тӧреен чир-суунзар айланған. Амды имҷі орындағы амбулаторияда маңнаныстығ істен парча. Ол тоғызынаңар хысхачахти чоохтап пирген:
- Амбулатория чонға хараа-кӱнӧрте полызығ пирче. Піреезі тың ағырыбысса, піс аны машиналығ Пиидегі имнег туразынзар апарчабыс. Мин фельдшернең хада теестезіп тоғынчам. Неделяда пір хатап чуртағҷыларның анализтерін, чыып, Пиизер апарчабыс. Ідӧк пістің имнег туразында кардиограф пардаңар, чуртағӌыларға Пиизер парарға кирек чоғыл. Піс кардиограмма суурып, анаң чӱрек хайди тоғынчатханын кӧзітчеткен пічікті аймахтың ӧӧн имнег туразынзар апар салчабыс. Анда имӌі-кардиограф, ол пічікті кӧріп, диагноз турғысча.
Сизінгенімде, Татьяна Николаевна тоғызынаңар хынып чоохтапча. 25 чыл істен салып, ол тоғызын паза чуртағҷылар хайдағ ағырығларнаң ағырчатханнарын чахсы пілче.
Ідӧк терапевт кічіг палаҷахтарны имнепче. Аның таниинаң, пӱӱнгі кӱнде Алахтайларда пір часха читкелек 8 олған саналча. Имҷi оларның хазиин полған на ай сыныхтапча: иркеҷектернің ӧскенін паза кӧдірімін синепче. Аалзар айда пір хатап Пиидең педиатр кил парча. Татьяна Николаевна удаа ағырчатхан олғаннарны, имнег туразынзар хығырып, специалистке кӧзідерге кӱстенче.
Алахтайлар аалында 700 азыра кізі чуртапча. Чуртағчыларның саны асхынах ниместеңер, имчі-терапевттің тоғыс кӧп. Школа алай олған садынзар чӧрчеткеннер, ағырыбыссалар, амбулаториязарох айланчалар. Имҷінің таниинаң, Алахтайларда 50-ҷе пала олған садынзар чӧрче.
- Піреезі олған садына табырах кӧнік парыбысча. Андағ пала асхынах таа ағырча. Че хайзы-да, тізең, удаа ағырча паза олған садынзар чӧрерге хынминча. Аннаңар нинче тус пала олған садынзар чӧрерге кӧнігер, анзы аның хазиинаң, хылии-оңдайынаң палғалыстығ, - таныхтаан имҷі.
Палаларны диспансеризация иртірчетсе, Пиидең имҷілер киліп, олғаннарның хазиин школада сыныхтапчалар. Улуғларға аалзар кӱскӱзін кӧс чӧрҷең флюорография комплексі кил парча. Ідӧк УЗИ итчеткен специалисттер, аппараттарын аалзар ағылып, орындағы чуртағҷыларның хазиин сыныхтапчалар. Пасха специалисттерні иртерге кирек полза, улуғ чон аймах кінінзер чол тутча.
Чуртағҷыларның хомзынызына, аалда аптека чоғыл. Татьяна Николаевнаның чооғынаң, пӱӱнгі кӱнде ол сурығ ӱзӱрілче. Лицензия алып алзалар, чонға аптека азылар. Андада аның чир-суғҷылары имнерге Пиизер чӧрбестер.
Имҷі-терапевтнең чоохтазып, кабинеттең сыхханымда, коридорда пазох теес чыыл партыр. Кізілер имҷі позып парарын чидікпин сахтааннар.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы