РОБОТТАР ЧАЙАПЧАТХАН ОЛҒАННАР
21.05.2019
Хабарлар
Марығ. «Байкалробот» регионнар аразындағы фестиваль тузында Ағбанда чайаачы олғаннар кінінде робототехникаӌа марығ ирткен.
Пу онлайн марығларда Ағбаннаң пасха Самара облазындағы Сызрань городтың ӱгренҷілері араласча. Фестивальның ӧӧн площадказы Иркутск облазында орныхча. Ағбанның командалары анда ікінҷі хати араласчалар. Марыға 10 команда килген. Пастағы кӱнде араласчылар электроникаха марығласханнар. Олар робототехникаҷа кружоктарда тимненгеннер.
Хайди таныхтаан марығ тӧстегҷізі Александр Терещенко, ирткен чылда Ағбанның піріктірілген командазы чахсы салтарлар кӧзіткен. Москвада олғаннар, нинҷе-де марығда аралазып, «Теория решения изобретательских задач» номинацияда чиңіс тутханнар. Тиксі алза, пістің командабыс алтынҷы орынға турысхан. Ирткен чылларда пістің олғаннар пасха даа улуғ марығларда араласханнар.
Палалар пастап, компьютерлер кистіне одырып, роботтары орта чӧрер ӱчӱн программа тимнееннер. «Лего» конструктордаң иділген роботтар, улуғ нимес площадкада тасталған хызыл паза ноған ӧңніг тегілегестерні чыып, оларны пос пулиинзар читірерге киректер. Роботтар, аар-пеер чӧріп, кирек ӧңніг тегілегестерні хайди чыыпчатханын кӧрерге хайхастығ полған. Пірее араласчының рободы, площадка стенезіне урунып, кӧрілген тус тоозылғанҷа, анда турҷаң.
Ағбандағы лицейнің ӱгренҷілері Михаил Чаптыковтың паза Максим Лабунецтің рободы пасха ӧңніг тегілегестерні чыып сыххан. Хайди таныхтаан 6-ҷы класстың ӱгренҷізі Михаил Чаптыков, компьютерде программа алыстырылбаан сылтаанда, робот мындағ улуғ алхаас ит салған. Оолағас пу чайаачы тоғыснаң тӧртінҷі чылы айғас парир.
- Пастап мин улуғ нимес роботтарны чығҷанмын. Пу тоғыс минің кӧңніме тың кірче. Ідӧк компьютер программазын тимнирге хынығ пілдірче. Школа соонаң программистке ӱгренерге пӧгін тутчам, - чоохтапча Михаил.
Ағбандағы лицей 2012 чылда грант хоостыра он робот утып алған. Аның соонаң школада робототехника кружогы апарыл сыххан. Хайди таныхтаан ӱгретчі Татьяна Лопатина, олғаннарға пу тоғыс уғаа тузалығ, пiлстерiн алғыдарға полысча. Ӱгретчі ӱгренҷілерінең хада пасха школаларға мастер-класстар иртірче. Пастағы улуғ марыға Москвазар 2015 чылда чӧргеннер. Анда оларға робо-тотехникаҷа аймах литература чахсы хабас пирген. Пірее палалар пу тоғыста чахсы салтарлар кӧзітчелер. Олар чахсы инженер поларға айабастар даа.
- Пӱӱл мин пастағы класс ӱгренҷілеріне кружок иртір сыххам. Че оларнаң тоғынарға пасха ондайлығ роботтар кирек, - таныхтаан Татьяна Александровна.
Кружокта палалар, кічіг ниме-нооларнаң тоғынып, салааларын тыытчалар. Ідӧк читіре чайалбаан тоғысты толдыразынаң кӧрчелер. Аны олар компьютерде хоостапчалар. Ағаа хоза робот хайди чӧрерін сағынчалар. Халғанҷызын олғаннар роботха компьютер программазын пас саларға киректер. Анзы кічіг палалардаң кӧп предметче пілістер кирексіпче.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы