АҒБАНДА IT-КІН ТӦСТЕЛЕР
13.03.2020
Хабарлар
Тиліс чӧбі. Хакасия пазы Валентин Коноваловтың устаанынаң республиканың Тиліс чӧбінің чыылиинда Ағбанда инновация IT-кінін тӧстирге чарадылған
Аның ӱчӱн Хакасия правительствозы Ағбан городта Авиаторлар орамазында IT-парк тӧстиріне килістіре чир участогын пирерге тимде. Чоохтирға кирек, чир участогы ээзі республика полча. Че, хайди алында искірілген, IT-кінні тӧстир инвесторны табары сын полар ӱчӱн, халғанҷы чыылығда республика пазы Хакасияның экономика тилізі министерствозына пу кӧстегҷе тоғынчатхан инвесторларға тиң оңдайлар тӧстирге чахаан. Министерство инвесторлар тілепчеткеннеңер региондағы газета-телевидениеҷе искіріг таратхан. Пічіктер азығ айының 20 - 28 кӱннерінде чыылған. Кӧрілген тус аразына пір ле айланыс кіргеннеңер искірген министр Николай Евдокимов. Соонаң, кӧрік айының 4-ҷі кӱнінде, паза пір айланыс кіртір.
Андағ оңдайнаң, Тиліс чӧбінің кӧрік айындағы 10-ҷы кӱніндегі чыылииның ӱзӱриине «Корпоративные информационные технологии» паза «Глобус плюс» ООО-лар айланыстары сығарылған. Пастағызы проектте пос кӱзінең аралазарға тимде полған полза, ікінҷізі Viliv Group партнерынаң хада тоғынарға сағынчаттыр. Министерство, компанияларның проекттерін паза пічіктерін тиксі істескен соонаң, ікінҷі компания Ағбан городта IT-кінні тӧстирінҷе инвестор поларға чарабинчатханнаңар чарадығ аларға чӧптеен Тилiс чӧбіне.
- Инвесторларға турғызылған кирексіністер санында компанияның проектте аралазарына читкіҷе ахчазы, кӧрілген кӧстегҷе тоғынчатханы паза опыды полча, - таныхтаан искіриинде Николай Евдокимов. - «Глобус плюснаң» хада тоғынарға пӧгінчеткен компания Польшада санға алылған полтыр, ахча чатчатхан счёт, тізең, олох саринда, че анзын киречілепчеткен пічікте банк таңмазы даа, хол салғаны даа чоғыл. Аннаңар сурынчам, Тиліс чӧбі араласчылары, «Глобус плюстың» сурынызын хыйа алыбызарға.
Тиліс чӧбі араласчылары министрнің сӧстерін хайыға алғаннар. Хайзы даа компания кізілеріне чыылығда чоох пирілген. Пілдістіг полған, «Корпоративные информационные технологии» ООО пу проектті чуртасха кирерге тимде: аның хосчаң ахчазы 100 млн салковай пар, ағаа хоза федеральнай бюджеттең 500 млн салковай тартылар. Компания амох IT-кінде тоғынарға сағынчатхан предприятиелернең чӧптезіглер апарчаттыр. Килкім проект хоостыра нап-наа технологиялар кінінде специалисттерге паза пірігістерге истіг тоғынҷаң, ӱгренҷең прай оңдайлар тӧстелер, ол санда кӱстіг паза уғаа кӱстіг компьютерлер, алғым пӧліктер.
Че IT-кінні тӧстирінҷе проект федеральнай кіннең ахча алып алар ӱчӱн республика ӱлгӱлеріне аны Хакасияның чуртас-экономиказына туза ағылар килкім проект тіп чарадарға киректелген. Тиліс чӧбі ікінҷілестер чох «Корпоративные информационные технологии» компанияның проектіне чӧпсінчеткенін кӧртіскен. Ізенербіс, проект чуртасха кӧрілген тус хоостыра чуртасха кирілеріне паза 2023 чылда нап-наа технологиялар кіні тоғынып пастирына.
Пу сурығдаң пасха, Тиліс чӧбі республикада хазнаның паза идінҷектернің, килкім бизнестің хада-пірге тоғызының пӱӱнгі оңдайларынаңар паза аны тилідерінеңер сан пиріснең танысхан. Пу оңдайнаң пірге тоғыс ӧӧнінде чурт-коммунальнай хоныхта чахсы тиліпчеттір. Россияда пу кӧстегҷе Хакасия 54-ҷі орында турча. Тиксі алза, 23 концессия чӧптезии чуртасха кирілче.
Автор :
Наталья БОРГОЯКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде