НАА ЧИДІГЛЕР - НАА КӦСТЕГЛЕР
28.08.2020
Хабарлар
«Илбек Чиңістің 75 чылы» номинацияның чиңісчізі Оксана СУНЧУГАШЕВА
Марыг. «Хакасия, алнынзар!» хабарӌылар марии пӱӱл онынҷы хати иртті. Аның чиңісчілерін ирткен неделяда Таштып аймаандағы «Сюгеш» тынағ комплексінде чеестееннер
Хакасиядағы СМИ-ларда тоғынчатхан чайаачы улус ол ӱлӱкӱнні «Бал прессы» тіп адапча. Аның тӧстегҷізі Россияның Хабарҷылар пірігізінің Хакасиядағы пӧлиинің кнезі Ольга Ширковец полча. Че пӱӱл пандемия тарапчатхан ӱчӱн улуғ пайрам иртірілбеен. Андағ даа полза, марығ ирткен. Хайдағ даа марығда, тізең, утып паза утыр салғаннар полчалар. Ол - марығ!
«Хакас чирі» газетаның хабарҷылары республика паза Россия синінде иртірілчеткен улуғ марығларда сыбыра араласчалар. Ирткен чылда ідӧк хакас газетаның хабарҷылары «Хакасия, алнынзар!» марығда сыйыхтығ орынға турысханнар паза Россия синінде ирткен хабарҷылар мариинда чиңіс тутханнар.
Пӱӱл, тізең, чидіглер парох! Ӱр ниместе ирткен «Хакасия, алнынзар!» марығда «Хакас чирі» газетаның чайаачы ӧмезі марығның «Ӧнетін сыйиина» турысхан. Ирткен чылның январьынаң пасти хакас газетада «Чир-суубыс мында пасталча» рубрикалығ материаллар сыхча. Анда хабарҷылар аалларның пӱӱнгі чуртазынаңар, сидіксіністерінеңер паза таңдағы чуртазынаңар чарытчалар. Полған на аал - ол алынҷа «хазна», хайда позының матырлары, сидіксіністері паза чидіглері пар. Пір кӱн аалда ааллап, хакас газетаның хабарҷылары аның чуртазынаңар алғыда чарыт пирерге кӱстенчелер. «Чир-суубыс мында пасталча» рубрикалығ материаллар хығырығҷыларның ӱндезіглерін илееде чыып алған. Ол сығарысты хығырығҷылар чидікпин сахтапчалар. Аны хоостыра чуртағҷылар Ӧлең чазы, Тутатчиков, Ут, Тӧрт тас паза даа пасха аалларның чуртазынаңар паза улузынаңар піліп алғаннар.
«Хакасия, алнынзар!» марығда «Хакас чирі» газетаның экономика пӧлиинің редакторы Оксана Сунчугашева (Ивандаева) чиңіс тутхан. Ол «Илбек Чиңістің 75 чылы» номинацияда араласхан.
- Хабарҷылар мариинда мин сыбыра аралазарға кӱстенчем. Че «Хакасия, алнынзар!» марығда амға теере мағаа оң полбаан. Пӱӱл ирткен марығда чиңіс тутханыма поғдархапчам паза ӧрінчем, - кӧңнінең ӱлесче Оксана Сунчугашева.
Позының материалларында ол Шира аймааның ветераны Николай Спириннеңер паза аның снайпер полған Михаил харындазынаңар пасхан. Ідӧк Оксана Геннадьевна Асхыс аймааның Чоғархы Асхыс аалның ветераны Антон Угдыжековтаңар чарытхан. Антон Николаевич ханнығ чааның иң хорғыстығ сарин кӧрген. Махачы чааласхан ӱчӱн ол I степеньніг Илбек Ада чаа орденінең, II паза III степеньніг Сабланыс орденнерінең таныхтатхан.
- Мындағ профессиональнай марығлар пістің хабарҷыларға постарының устарын сынап кӧрерге, пасхаларынаң тиңнестірерге оңдай пирче. !дӧк ол хабарҷыларны аннаң андар ӧзерге, кӱстенерге паза мыннаң мындар улам чапсых материаллар пазарға кӧстепче, - сағызынаң ӱлесче «Хакас чирі» газетаның ӧӧн редакторы Радион Сунчугашев.
Тиксі алза, пу пайрамнығ иирде 15 артиинаң СМИ тоғынҷызы сыйыхтығ орынға турысхан. Оларға прайзына дипломнар паза кубоктар читірілген.
Автор :
Ксения КОТЮБЕЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде