АННАҢ ЧЕМПИОННАР СЫХЧА
28.05.2021
Хабарлар
Пайрам. Пу наада Таштыптағы спорт школазы 35 чылын таныхтады
Сарығ ікі хадыллығ тура ырахтын хайығ тартча, аннаң хости улуғ стадион орныхча. Андар уроктар, тоғыс соонаң олғаннар, чииттер, улуғ кізілер маңзырапчалар. Таштып аал чуртағҷыларының кӧбізі аны иргі ондайнаң «ДЮСШ» адапча. Че 2016 чылдаң ол Таштыптағы спорт школазы пол парған. Анда апарылча: волейбол, футбол, ниик паза аар атлетика, стол теннизі, бокс, кӱрес, грек-рим кӱрезі. 2016 чылда иргілен парған ағас спорт школазы орнына наа тура пӱдірілген.
Че 1986 чылны сағысха кирзе, хынығ ниме сығыс килче. Ол туста прай олған спорт ӧмелері Хызылчар пастыра тоғынҷаңнар. Хызылчардағы специалисттер пастап Таштыпта спорт школазын пӱдірерге чаратпинчатханнар, спорт базазы чоғыл тіп. Олар аны Абазада тӧстирге иткеннер, че орындағы ӱлгӱлер, постарының аймаан арачылап, Таштыпта пӱдірткеннер. Хысхаҷах тусха Таштыптағы тренерлер, наа секциялар азып, кӱстіг спортсменнерні тимнеп салғаннар.
Иң пастап школанаң Григорий Сагалаков устаан (1986 - 1988ч.ч.), анаң директор полып істенгеннер: Сергей Тороков, Сергей Карамашев, Николай Инкижеков, Николай Котожеков, Иван Бутонаев, Николай Мамышев, Ирина Карамашева, Олег Сагатаев. Пӱӱл спорт школазында наа устағҷы - Анна Сипкина. Чиит ипчі спортнаң пик палғалыстығ, аймахта аны пілчелер. Таштыптағы 16 № училищеде чииттерні он чыл ниик атлетикаа кӧніктірген.
Спорт школазы аймахтағы Культура туразында 35 чылын таныхтаан. Мының алнында тоғынған, ам тоғынчатхан спорт школазының істенҷілеріне алғыстас пічіктері, сыйыхтар читірілген. Оларға артисттернің чайаачыларын, истіп, кӧріп аларға ӱлӱс тӱскен.
Ӱлӱкӱн соонаң ікі кӱн пазынаң Анна Сипкинанаң спорт школазында тоғазып алғабыс.
- Ирткен чайғызын стадионда футбол ойнаӌаң наа чазыда арған от тӧзеебіс, - нааҷыластардаңар чоохтапча ипчі. - Прай чон пу тоғыста араласхан: аал чӧбінің кізілері, пістіңнер, пасха ӧмелернің хай пірее тоғынӌылары. Ол тоғысты итчең подрядчик тизібіскен, аннаңар піскеӧк тӧзирге киліскен. Ам стадионда чӱгӱрӌең чолыӌахтарны нааӌылирға кирек, че пӱӱл ол нимее ахча кӧрілбеен. Тастында пу чағында волейбол-баскетбол площадказын тимнирге сағынчабыс. Пӱӱл ӱзінҷі хысхы айғы иділген, пірсі кічіг, ікінӌізі улуғ. Олғаннар, анда хоккей ойнап, ӧткін хайынысчалар.
Я, палаларға спортнаң айғасчаң орын пар полза, уғаа чахсы. Чиит тӧлнің кӱс толдыра нооза, хан хайнапча. Оларға айғасчаң кирек табылбаза, хомай нимее тартыларға айабастар. Мына минің алнымда саарбахтар кӱрес секциязына чыылысчалар, аны Константин Тодозаков апарча. Социальнай сетьтерде, газетада аның олғаннары аймах марығларда араласчатханнаңар пазыл парча. Ідӧк удаа чиңіс тудып алчалар. Пасха даа секцияларда таланттығ тренерлер тоғынча. Оларның холынаң чемпионнар сыхчалар: кӱресчілер Любовь Волосова, Наталья Малышева, Карина Барашкова, Мария Тюмерекова, Оскар Тодозаков паза даа пасхазы.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы