ЧОННЫҢ ПӰКӰЛЕЕ ИММУНИТЕДІН ТӦСТИРГЕ
16.07.2021
Хабарлар
Штаб чыылии. Коронавирус чуғынӌах ағырығ тарапчатханынаң тоғыр кӱрезерінӌе штабтың теестегі чыылии ирткен
Ирткен суткадағы танығлардаң, республикада коронавирус чуғынӌах ағырығнаң 175 кізі ағырыбысхан. Хазыхтанып алғаннарның саны 228 кізее тиңнелче. Пӱӱл Хакасияда ағырығны хаптырғаннарның саны 27445 кізее чит парған, олох тус аразына хазыхтанып алғаннарның саны - 25767 кізі. Стационарларда 1162 пациент имненче, ибде - 3312 чуртағңы. Ирткен суткада республикада коронавирустаң читі кізі ӱреен. Республикада ковиднең ағырчатханнарның саны ӧсчеткеннеңер, имнег учреждениелерінің тоғынҷылары отпуск чох, кӧрілген тустаң артых тоғынчалар.
- Муниципальнай пӱдістернің устағ-пастаа, идінҷектер, организацияларның устағӌылары паза республиканың полған на чурғағӌызы чонның пӱкӱлее хазиин тыытчаң оңдайлар ӱчӱн тоғынарға кирек. Аннаңар полған на кізі вакцинацияда ӧткін аралазарға кирек, андада республикада чонның пӱкӱлее иммунитеді тӧстел парар. Ідӧк ундубасха кирек арачыланӌаң оңдайлардаңар: маска кизерге, кӧп чон полчатхан чирде 1,5 метр дистанцияа тудынарға паза хол сыбыра чуурға, - чоохтаан Хакасия пазы Валентин Коновалов.
Республиканың хазых хайраллаӌаң министрі Олег Ананьевскийнің искіриинең, Хакасияда вакцинаның пастағы чардығын 107164 чуртағӌы турғыстырыбысхан, ікінӌі чардығын - 68466. Хакасияның имнег организацияларында коронавирустаң тоғыр 12 муң азыра вакцина дозазы халған. Ол пу неделяа читкіӌе. Пу кӱннерде хазых хайраллаӌаң министерство хоза вакцина килерін сағыпча. Имнег учреждениелері предприятие организациялардаң ӧмелеріне, киліп, вакцинация иртірердеңер чахығ алчалар. Ағбаңдағы имнег туразында прививка турғысчаң кӧс чӧрӌең бригадалар тӧстелген, олар предприятиелерӌе чӧрерге тимделер.
Наа чуғынӌахнаң ағырчатханнарға имнег учреждениелерінде 1331 орған тӧстелген, оларның 150-і пос. Ирткен суткада тиксі Хакасияда табырах имнег полызиин пирӌең службаның тоғынӌылары 680 хати хығыртыға чӧргеннер.
- Республикада вакцинация хомай нимес иртче. Оӧн санитарнай имӌінің чарадиин кӧрзе, піс ол саннардаң кӧмес халчабыс. Чонның пӱкӱлее иммунитеді тӧстелер ӱчӱн, республикада 1 сентябрьға теере чуртағӌыларның 60 % прививка турғыстырыбызарға кирек. Амды, тізең, 44 % прививка турғыстыр салған. Тиксі республикада 242 муң чуртағӌы вакцинация иртірібіссе, чонның коронавирусха пӱкӱлее иммунитеді тӧстел парар. Пӱӱнгі кӱнде пістің регионда 91 прививка турғыстырӌаң пункт паза кӧс чӧрӌең бригадалар тоғынча. Аннаңар мыннаң мындар чуртағӌылар коронавирустаң тоғыр прививка турғыстыр поларлар. Имнег учреждениелерінде вакцина читкіӌе, - искірген Хакасияның хазых хайраллаӌаң министрі Олег Ананьевский.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы