ХАРАТАСТА - ЧААҶЫЛАР ГОСПИТАЛЬЫ
21.07.2021
Хабарлар
Штаб чыылии. Коронавирус чуғынҷах ағырығ тарапчатханынаң тоғыр кӱрезерінҷе штабтың теестегі чыылии ирткен
Ирткен суткадағы танығлардаң, республикада наа чуғынҷах ағырығны 176 кізі хаптырған. Ағбанда - 52, Асхыс аймаанда - 29, Саяногорскта - 28, Харатаста - 25, Шира аймаанда - 15, Боград аймаанда - 8, Ағбан пилтірі аймаанда - 5, Абазада паза Таштып аймаанда - тӧртер кізі, Алтай аймаанда - 3, Орджоникидзе паза Пии аймахтарында - пірер кізі, Хызылчардаң - пір. 65 чир-суғҷыбыс, кискекнең ағырыбызып, имҷізер айланған; 21 кізіде ағырығ пневмониядаң имненчеткенде сығысхан; 54 кізі коронавирусты сӧбіреде хаптырып алған, 17 - тоғыста; 4 чуртағҷыда ағырығ план хоостыра сыныхтағ иртірчеткенде сығысхан; 4 кізіде - пос кӧңнінең сыныхтағ соонаң; 11 чуртағҷы пасха субъекттерзер паза хазналарзар чӧріп наа чуғынҷахнаң ағырыбысхан. Хазыхтанып алғаннарның саны 207 кізее тиңнелче. Пандемия пасталғаннаң республикада ағырығны хаптырғаннарның саны 28326 кізее чит парған, олох тус аразына 26416 чуртағҷы, ағырығдаң озып, хазыхтанып алған. Имҷілер хайиинда 11378 кізі, олар ковиднең ағырчатханнарнаң палғалыста полғаннар. Ибде наа чуғынҷах ағырығдаң имненчеткеннернің саны - 4086 чуртағҷы, имнег тураларында - 1213 пациент, 18 кізі - ИВЛ-да. Пандемия пасталғаннаң коронавирус диагнозтығ 689 республика чуртағҷызы ӱреен.
Пӱӱнгі кӱнде Хакасияда коронавирустаң тоғыр вакцинаның пастағы чардығын 115788 чуртағҷы турғыстырып алған, ікінҷі чардығын - 73003 кізі. Хайди искірген регионның хазых хайраллаҷаң министрі Олег Ананьевский, тынағ кӱннерінде республиказар 13200 доза вакцина килген. Азынада сананыстар хоостыра пу вакцина пір неделяа читкедег.
Понедельниктең сығара Россияның арачыланыс министерствозының чааҷылар госпитальы Харатаста А.И.Лебедьтің адынаң реабилитация кінінде тоғынып пастаан. Чааҷылар госпитальы 100 орынға азылған, мыннаң мындар 20 орған хозардаңар чоох полған. Андар республиканың имнег учреждениелеріндегі ортымах ағырчатхан паза тың ағырбинчатхан пациенттерні ағыларлар.
Ідӧк оперштабта республикадағы муниципальнай пӱдістер устағ-пастаа коронавирус чуғынҷах ағырығ тарапчатханынаң тоғыр хайдағ тоғыс апарылчатханнаңар искіргеннер.
Хакасия пазы Валентин Коновалов муниципальнай пӱдістер устағҷыларына чахаан:
- Республикада коронавирус чуғынҷах ағырығны хаптырғаннарның саны пӧзік. Аннаңар Роспотребнадзор чахаан санитар-эпидемиология оңдайларға тудынарға кирек. Мыннаң мындар кӧп квартиралығ тураларда паза кӧп чон чӧрчеткен орыннарда дезинфекция тоғыстарын иртірерін хайығда тудыңар.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы