ӰС ПАЛАНЫҢ ЧУРТАЗЫН АЛ ХАЛҒАН
04.08.2021
Хабарлар
Кӱн матыры. Киӌее Хакасия пазы Валентин Коновалов Ағбан городтың 11 частығ чуртағҷызы Мансур Боевке, ӱс олғанны суғдаң сығарып, оларны ӧлімнең ал халған ӱчӱн, алғыстас пічиин читірген
Пу кирек Хакасияның ӧӧн городында ӱр ниместе пол парган. Агбан городтың 5№ школазының пизінҷі класстың ӱгренҷізі Мансур харындас-пиҷелерінең хада «Полярный» микрорайондагы суғ хазында тынанган. Суға сомып паза кӱнге сістеніп алғанда, оолах хада тӧрееннерінең ибзер нанарга тимненібіскен. Ол, бутылкаа суғ сустып алып, тамысхан отты ӱзірібізерге пӧгінчеткен.
Че ол арада ӱгренҷі олғаннарның табыстарын ис салган. Мансур ікі оолахтың паза пір хызыҷахтың суғда патчатханын кӧр салган. 11 частығ оолах, ӱр дее сагынмин, хыйалга кір парганнарға полызарға суғзар сегірібіскен. Ол туста махачы кічіг матыр суғдағы олғаннардаңар ла сағынған. Сумказын даа суурбин, полызыга маңзыраан. Оолах пастап 11 частығ Ульянаны чарзар сығарған, анаң 9 частығ Романы, иң халганҷызын 10 частыг Коляны. Патчатхан олғаннар тың хорых парған полтырлар. Олар, суғда холларынаң сапхланып, пірсі-пірсіне суғдаң сығып аларға оңдай пирбеен осхастар. Мансур оларны, холларынаң тудып, суғдаң сығара тарттыр.
Ибзер айланғанда, оолах іҷезіне пір дее ниме чоохтабаан. Че аның кічіг хыс туңмазы, аҷазына поғдархап, суғ хазында хайдағ кирек пол парғаннаңар чоохтап пирген. Валентина Юрьевна, хызының чооғын истіп, оолгының ӱчӱн тың хорых парған. Мансур, тізең, іҷезі аны телефонын суға кир салған ӱчӱн хырызар тіп хорыххан. Валентина Заварзина палазының прай ниме чахсы тіп ӧрінген.
Ӱр дее полбаанда, городта 11 частығ оолах ӱс паланың чуртазын ал халган тіп хабар тарап чӧрібіскен. Андада городтың кӧп чуртагҷызы оолахха паза аның іҷезіне алгызын читірген. Пір чиит хыс, Мансур Боевтің холын тудып, хыйалға кір парғаннарға полызыға килген ӱчӱн алғызын пиріп, наа телефон сыйлап пиртір.
Киҷее Хакасия пазы Валентин Коновалов аның іҷезіне чахсы пала ӧскір салған ӱчӱн улуғ алғызын читірген. Хыйалда олганнарны артыспаан ӱчӱн, республика пазы кічіг матырға алғыстас пічиин читірген. Мансурның іҷезі Валентина Заварзина палазының ӱчӱн поғдархапча. Паза ол, ӱс кізінің чуртазы пір телефонга пір дее турбас тіп, палазын хуҷахтап, таныхтапча.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде