ВАКЦИНАНЫ СЫБЫРА АҒЫЛ ТУРАРЛАР
11.08.2021
Хабарлар
Штаб чыылии. Коронавирус чуғынӌах ағырығ тарапчатханынаң тоғыр кӱрезерінӌе штабтың теестегі чыылии ирткен
Ирткен суткадағы танығлардаң, республикада коронавирус чуғынҷах ағырығнаң 169 кізі ағырыбысхан (Ағбанда - 70, Саяногорскта паза Харатаста - І7-ер, Асхыс аймаанда - 16, Ағбан пилтірі аймаанда - 15, Алтай аймаанда - 7, Пии паза Шира аймахтарында - 6-ар, Таштып паза Орджоникидзе аймахтарында - 2-ер, Абазада - 5, Боград аймаанда - 4, Сорығда - 1, Хызылчардаң - 1).
Хазыхтанып алғаннарның саны 494 кізее тиңнелче. Тиксі республикада ағырығны хаптырғаннарның саны 32027 чуртағҷаа чит парған, олох тус аразына 31477 кізі имненіп алған. Имҷілер хайиинда 2053 чуртағҷы, олар ағырчатхан кізілернең палғалыста полғаннар. Ибде наа чуғынҷах ағырығдаң 6243 кізі имненче, стационарларда - 1105 кізі, 26 пациент - ИВЛ-да. Чыл пасталғаннаң республикада коронавирустаң 443 кізі ӱреен, ирткен суткада - 1 чуртағҷы.
Пӱӱнгі кӱнде республикада коронавирустаң тоғыр вакцинаның пастағы чардығын 146114 чуртағҷы турғыстырып алған, ікінҷі чардығын - 110071 кізі. Хайди искірген Хакасияның хазых хайраллаҷаң министрі Олег Ананьевский, ӱр ниместе республиказар 1500 доза «Спутник Лайт» вакцина килген. Андағ оңдайнаң, сағам Хакасияда ол вакцинаның 10 муң дозазы пар. Таныхтирға кирек, «Спутник Лайт» вакцина 18-60 частығ коронавируснаң ағырған кізілерге алай ревакцинация иртчеткеннерге турғызылар тіп кӧрілче. Ідӧк пу чағында республиказар «Спутник V» вакцина чидер. Хайди таныхтаан Олег Ананьевский, вакцина сыбыра улуғ нимес партияларнаң регионзар кил турар.
Кӱннің Хакасияда 4 муң азыра чуртағҷы вакцинаның пастағы алай ікінҷі чардығын турғыстырча. Имнег организацияларында коронавирустаң тоғыр вакцина читкіҷе. Россия Федерациязында пічікке киріл парған тӧрт вакцина республикада пар. Вакцинация иртерге сағынчатхан кізі, орындағы имнег туразынзар айланып, прививка турғыстыр полар. Амғы туста прививка турғыстырҷаң 98 пункт тоғынча, оларның 68 - мобильнай бригадалар. Вакцинацияны иң ӧткін иртчеткеннернің санында Ағбан пилтірі, Алтай паза Орджоникидзе аймахтарының чуртағҷылары. Сорығ, Абаза городтағылар паза Асхыс аймаандағылар прививканы уйан турғыстырчалар.
Роспотребнадзорның Хакасияҷа управлениезінің устағҷызы Татьяна Романованың таниинаң, республикада халғанҷы хатығластар кирілгенінең ікі неделя ирт парған. Ол тус аразына, улуғ даа полбаза, чахсыланыстар пар. Ағырчатханнарның саны синчеткенін сизінерге чарир. Аннаңар, пос салынмин, санитар-эпидемиология оңдайларына мыннаң мындар тудынарға чоохтаан.
Хакасия пазы Валентин Коновалов республика чуртағҷыларына паза аалҷыларына Роспотребнадзорның прай чахығларына тудынарға чахаан. Полған на кізінің нандырығлығ тудынғанынаң республика сидік санитар-эпидемиология оңдайынаң сых полары палғалыстығ.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде