АНЫМӋОХ, ТОКИО. ИЗЕН, ПАРИЖ
11.08.2021
Хабарлар
Олимп ойыннары-2020. Россия командазы 71 медаль холға кирген, олардаң 20 алтын полча
Олимпиаданың халғанҷы кӱннері «ізіг» полғаннар тізе, саба полбас, неке. Кізілер Мария Ласицкененің ӱчӱн ӧрінгеннер, кӱресчілернің чидіглеріне поғдархааннар, абахай гимнасттарнаң хада хомзынғаннар.
Ниик атлетика марығларында Россиядаң 10 кізі араласхан. 2016 чылнаң тиңнестірзе, анзы чахсы. Че медальлар ӱчӱн Анжелика Сидорова паза Мария Ласицкене ле харбасханнар тиирге чарир. Сергей Шубенковнаң Дарья Клишинаа оң полбаан. Спортсменнер, марығлазарға даа маңнанмин, азахтарын пиртіндір салғаннар. Пасхазына сыйыхтығ орынға сығарға кӱс читпеен. Ниик атлетикада пастағы медальны Анжелика Сидорова ағылған. Ол шесттіг пӧзікке сегіріп, ікінҷізі полыбысхан. Кізілер Мария Ласицкененің ӱчӱн матап «ағырғаннар». 2014 чылдаң саблығ спортсмен, пӧзікке сегіріп, 45 турнирде чиңіс тутхан, че 2016 чылда Олимп ойыннарында ағаа аралазарға чаратпааннар. Нинҷе-де кізінің допинг таап алғанда, ниик атлетиканаң айғасчатханнарны прайзын нандырыға тартарға кирек нооза. Квалификация тузында Мария Ласицкене позын турыстыра кӧзіт полбааннаңар, кӧрігҷілер ол ӱзінҷі орынға сығып алза, чахсы поларҷых тіп сағынғаннар. Азах меетте тӧрт кізі халғанда, саблығ спортсмен, 2,02 метрге, анаң 2,04 метрге сегірібізіп, чиңіс тутхан. Марияның ӧрініс харах чазы хаҷанға даа спорт тархынында халар.
Олаңай кӱресте Россияның ӱс алтын паза ікі хола медаль. Завур Угуев 57 кг кӧдірімде олимп чемпионы полча, Заурбек Сидаков - 74 кг кӧдірімде. Ӱзінҷі медальны Абдулрашид Садулаев утхан, аны алынҷа таныхтирға кирек. Кӱресчі - авар чонның оолғы, сола ады «Орыс танк». 2016 чылда А.Б.Садулаев 86 кг кӧдірімде олимп чемпионы полыбысхан, пӱӱл 97 кг кӧдірімде чиңіс тутты. Ӱзінҷі орынға Артур Найфоновнаң Гаджимурад Рашидов сыхханнар. Токиода грек-рим кӱрезінең айғасчатханнар пір алтын паза ікі хола медаль холға киргеннер. Россияның пу спорт кӧрімінде мындағ салтарлар 1996 чылда Атлантада полғаннар. Ипчілер кӱрезінде киректер аннаңох уйан полтыр. Пӱӱл хыстарыбыс пастағызын на ибзер медаль чох айланғаннар. Тиксі алза, Россия кӱресчілерінің сигіс медаль: тӧрт алтын паза тӧрт хола.
Токиодағы марығлар Тываға танығлығ. Олаңай кӱресте 57 кг кӧдірімде Нурислам Санаев хола призер полыбысхан. Спортсменнің cын ады Артас Санаа, ол тыва чонның оолғы. 2014 чылдаң Казахстан ӱчӱн турысча. 2016 чылда кӱресчі, ислам киртініске кіріп, адын алыстырыбысхан. Амды хонҷыхтарның олимп призеры пар. Пу чидіге тывалар 1996 чылдох Атлантада чидерҷіктер. Че спортсмен Чечен-оол Монгуш, 52 кг кӧдірімде харбазып, тӧртінҷізі полыбысхан. Хакастардаң Олимп ойыннарында ӱс кізі кӱзін сынаан. Сыйыхтығ орынға Сергей Карамчаков ла сыххан.
1980 чылларда грек-рим паза олаңай кӱрестерні Олимп ойыннары программазынаң суурыбызарға кӱстенгеннер. Ӧӧн сылтағ - совет спортсменнері ле утчалар. Пір сӧснең, пістің кӱресчілерге чиңіс тударға аймах оңдайнаң харығ полңаңнар. Амды ол кирекке хоос гимнастиканаң айғасчатхан хыстар урундылар. Чарғыҷылар кӱҷӱрлееннеңер, абахайларыбыс 1996 чылдаң пастағызын на алтын медаль чох халғаннар. Алынҷа многоборьеде Дина Аверина кӱмӱс призер полыбысхан. Гимнасттар Анастасия Близнюк, Анастасия Максимова, Ангелина Шкатова, Анастасия Татарева паза Алиса Тищенко, ӧменең ойын кӧзідіп, ідӧк ікінҷі орынға сыхханнар.
2000 чылдаң синхронист хыстар пістің командаа алтын медальлар тӧреміл ағылчалар. Пӱӱл олар пазох ікі хати чиңіс тутханнар. Ӱс чыл пазынаң Парижте оларны, гимнасттарны чіли, чарғыҷылар «тӱзірібізерге» кӱстенерлер, неке. Спортсменнерге тимде поларға кирек.
Боксерлардаң чидиинең Альберт Батыргазиев (57 кг) ӧріндірді. 23 частығ спортсмен - ногай чонның оолғы. Азах меетте ол Дюк Рейганны 3:2 саннаң утып, олимп чемпионы полыбысхан. Муслим Гаджимагомедов 91 кг кӧдірімде ікінҷі орынға сыххан. Хола медальларны Андрей Замковой (69 кг), Имам Хатаев (81 кг) паза Глеб Бакши (75 кг) холға киргеннер. Боксер ипчілердең сыйыхтығ орынға Зенфира Магомедалиева ла сыххан. Аның хола медаль.
Кӧрігҷілер пістің команданың гандболда, волейболда паза пляж волейболында алтын медальлар поларына ізенгеннер.
Че азах меетте гандболист хыстар даа, волейболист ооллар даа Францияның ӧмелеріне утыр салғаннар. Пляж волейболында полған на командада ікілер спортсмен ойнапча. Вячеслав Красильниковнаң Олег Стояновский, финалда Норвегияның дуэдінең тоғазып, аны ас полбааннар. Велосипед спортында улуғ чидіг. Пӱӱл ипчілер пастағызын на «мэдисон» дисциплинада кӱстерін сынааннар. Анда спортсменнер ікӧлең араласчалар. Гульназ Хатунцеванаң Мария Новолодская, Россия ӱчӱн турызып, хола призер полыбысханнар.
Россия командазы Токиода ирткен Олимп ойыннарында 71 медаль утып алған: 20 алтын, 28 кӱмӱс, 23 хола. Пис чыл мының алнында Рио-де-Жанейрода пістің 55 медаль полған, олардаң 19 алтын. Медальлар мариинда Россия пизінҷі орында.
Пастап США парча: 39 алтын, 41 кӱмӱс, 33 хола.
Хыдаттың командазы 88 медаль холға кирген: 38 алтын, 32 кӱмӱс, 18 хола.
Япония ӱзінҷ орында, 58 медальдаң 27 алтын, 14 кӱмӱс паза 17 хола.
Ідӧк пістің алныбыста Великобритания парча. Спортсменнер 65 медаль утып алғаннар: 22 алтын, 21 кӱмӱс паза 22 хола.
Пістің спортсменнер чалама паза гимн чох 2022 чылның 16 декабрьына теере марығлазарлар. Хысхы Олимп ойыннары тузында оларға пазох П.И.Чайковскийнің музыказын истерге килізер, неке. Марығлар пазағы чылда Пекинде иртерлер. Че 2024 чылда Олимпиада тузында Россия гимні Парижке толдыра чайылар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде