ХАҶАН ЧӰРЕКТЕ ӦРІНІС
25.08.2021
Хабарлар
Нацпроекттерні - чуртасха. Пу наада Ағбанның тынағ паркында арған тӧзелген уғаа чахсы стадион тузаланысха кирілді. Футбол ойнаӌаң чазы ибіре ниик атлетиканаң айғасчатханнарға чӱгӱр чӧрӌең истіг чоллар тӧзел парғаннар
Кізі кӧңнін кӧдірчеткен кӧг ырах тарапча, тынағ паркынзар килген улусты позынзар тудығ чох хығырчатханға тӧӧй. Тимге сыххан стадионзар чыылысхан саарбахтар даа, улуғлар даа наа пӱдіріге ӧкерсінчелер, аны-мыны сыныхти кӧр чӧрчелер, тӧзелген арған отты холнаң тутхлапчалар, паалағ пирчелер.
Мына стадионда хызыл футболкалар кис салған 11-12 частығ оолағастар кӧріне тӱстілер. Пастап олар постары алынӌа аар-пеер чӱгӱріс чӧргеннер, ол-пу упражнениелерні толдыр турғаннар. Хаӌан оолахтарның аразында тренер Денис Козлов пастыр чӧр сыхханда, кічіг частығ футболисттер, аның чахиин толдырып, изере турыбысханнар, теестегі тренировканы пастабысханнар.
Олардаң сала оортах улуғ кізілер ағырин чӱгӱріс чӧрчеткеннер. Ідӧк аңдағ-мыңдағ упражнениелер толдырғлапчалар. Наа пӱдірілген стадионда сағам ниме полчатханы пеер килген олаңай кізілерге пілдістіг нимес. Аннаңар даа удур-тӧдір сурастырғласчабыс, піліп аларға харасчабыс. Хаӌан Ағбан городтың пазы Алексей Лёмин чон алнында кӧріне тӱскенде ле, прайзы амырап парған.
- Аарлығ арғыстар, кічіг частығ футболисттер, іҷе-пабалар! Хаҷанох сағаан пӱдіріг тимге сыхты, пӱӱң піс аны тузаланысха кирчебіс, наа стадион асчабыс, - айланча Алексей Викторович пеер чыылысхан кізілерзер.
Аның сӧстерінең, пу стадионны 2019 чылда федеральнай синдегі «Демография» нацпроект хоостыра пӱдіріп пастаптырлар. Пу нацпроектті чуртасха кирерінде, кирек пічіктер тимнирінде ӧткін араластыр ол чылда Ағбан городтың пазы полған Николай Булакин. Аны сағысха киріп, ағаа улуғ алғызын читірген Алексей Лёмин. Анаң наа стадион тимге сыхханы Ағбанның 90 чылына киліс парғанын таныхтаан.
Мындағ чахсы, истіг стадионны пӱдіреріне федеральнай бюджеттең 39 млн салковай, город бюджедінең 34 млн салковай, республика бюджедінең 400 муң салковай хорадылтыр. Ол амды городтағы Н.Г.Булакиннің адынаң «Ағбан» спорткомплекстің санына кір парар. Стадионның улии 14674,2 квадрат метрге тиңнелчеткені искірілген.
- Пӱӱнгі кӱңде пу стадион иң артыхтарның санына кірче. Мыңда хайдағ даа улуғ марығлар иртір турарға чарир, - стадион азылчатхаңда таныхтаан позының чооғыңда Хакасияның спорт министрінің орынӌызы Олег Данчук.
Анаң Ағбандағы «Спартак» команданың кічіг частығ футболисттеріне сыйыхтар читірілгеннер. Олар пӱӱл Сибирьдегі федеральнай округ синінде ирткен мини-футбол мариинда 10 - 12 частығ футболисттер командалары аразында ӱзінӌі орын утып алғаннар. Хакасияның кічіг частығ футболисттері мындағ чидіге 12 чыл мының алнында читкен полтырлар.
Сыйыхтарға турысханнар санында полғаннар: Артём Боргояков - нападающай, команда капитаны, Георгий Беляков - хаалха хадағӌызы, Иван Ахпашев - хаалха хадағӌызы, Артём Самушкин - полузащитник, Матвей Шишлянников - нападающай паза оларның тренерлері Денис Кученеков, Денис Козлов. Оолағастарның іҷе-пабалары матап ӧрініскеннер.
Анаң пу танығлығ кӱннің иң хынығ чардығы пасталыбысхан: оолағастарның командазы іҷе-пабалар командазынаң тоғыр ойнаан. Мына хайда чӱрек ӱлӱкӱні полған. Марығ мини-футболҷа ирткен. Хайзы даа командаа нинҷе кирек, анҷа кізі алыстырарға чарадылған. Піс, кӧрігҷілер, пастағы туста оолағастар паба-іҷелернің командазын оой ла утып аларлар тіп сағынғабыс. Сынында кирек андағ ла полбиндыр. Іҷе-пабалар сыдасчаан на сыдасчалар, табырах чӱгӱріп, палаларына чит полбин дее халчатсалар, удур-тӧдір чахсы пілісчелер, футболны постарында ӱр тутпин, сах андох пірде пірсіне теебісчелер. Іди, ойнап, оларға кӧп паза ырах чӱгӱр чӧрерге киліспинче.
Ойын хынығдаң хынығ, хазырдаң хазыр парып одырча. Олғаннар даа, улуғлар даа чахсы сизінчелер, тоғазығ тоозыларына тус асхынахтаң асхынах ла халып одырча. Сағам іҷе-пабалар командазы 1:0 саннаң алнында. Аннаңар оолағастар саннарны даа тиңнестіріп аларға матап сіренгеннер, че сағынған сағыстары толбин парған. Ағаа хоза, іҷе-пабаларның командазы ойын тоозылар алнында пазох пір гол кирібіскен. Оолағастар хомзынмазын тіп, тирлеглеп парған футболист-пабалар палаларының кӧңнілерін кӧдірерге харасханнар, паарсах хуҷахтабыс турчатханнар.
- Піс оолағастарыбыснаң хада мындағ тоғазығлар пірее хати иртірчебіс. Анзы хазых чуртасха тартылчатханыбыс полбас па, - ӱлесче позының сағызынаң Вячеслав Александрович Беляков, оолғы Григорийнің сыйиин кӧзідіп.
- Сірер тігі ипчіні таныпчазар ба? - ах ӧңніг футболка кис салып, стадион чазызы хыринда турчатхан, хакас оолағасха ниме-де хысхырып, чӧптер пирчеткен ипчізер пазым икіпчеткен туста.
- Ол амох піреезін алыстырарға кирек. Кӧрчезер, иреннер аразында ікі ипчі чӱгӱр чӧрче, тулуңнары ла аар-пеер учухча. Оларның піреезінің орнына сығарға тимненче полар. Ол Василиса Боргоякова, оолағастар командазының капитаны, Артёмның іҷезі. Мында хайда-да Артёмның туңмазы чӱгӱр чӧрчеткен, - чоохтапча Вячеслав Беляков.
- Сірер чи футбол ойнапчазар ба? - сурчам аннаң.
- Чиит туста ойнаҷаңмын, оолғым чіли «Спартак» команда ӱчӱн турысхам. Тоғысха маңзырапчам. Пу уғаа хазыр тоғазығда хайди даа аралазарҷыхпын. Мындағ ойын-тренировкалар тузында палаларыбысты ӱгредерге харасчабыс. Анзы туза полчатхан осхас, илееде ізестіг тудын сыхчалар, - позының кӧріс-сағыстарынаң ӱлесче Вячеслав Александрович.
Сах ол туста хайдағ-да оолағас, стадион хыринда тур салып, оңнығ ла хысхырбинча, кічіг частығ футболисттерні гол кирерге чоо кӧӧктір парча. Андар кӧріп, кізілер хатхырызып пастабысханнар. Анзы уламох тың иртінче, тыыдадаң тыыда аахтапча. Пірдең, орта чӧптер пирче. Аннаңар оолағассар пастырғам. Позым алынҷа сағынчам, мындағ кічіг паланы стадионзар хайди кирділер ни?
- Адым ма? Ромка полчам. Мағаа пис час. «Спартак» ӱчӱн футбол ойнапчам, - минің сурығларыма нандырчадып, тадырат-тадырат салыбысты ӧткін оолағас.
- Чалғысхан на килгезің ме? - сурчам палаҷахтаң.
- Ноға чалғысхан? Мына пабам. Ол тренер полча, футбол чахсы ойнапча, - махтапча пабазын оолағас.
Піс іди хынығ чоохтас турчатханыбыста, пабазы чағын пастыр килген. Танысчабыс. Дмитрий Михайлович Сазанаков полтыр.
Сынап тренерзер бе тіп сурғанымда, пазын кизе-тоғыр чайхапча, Ағбандағы 26 № ортымах школада физкультура уроктарын апарчам тіпче. Оолғыҷаан сынап таа футбол секциязына ал чӧрчеткен полтыр. «Спартак» спорт школазында тоғынчатхан тренерлер прай таныстар, аннаңар Ромазы аны тренерге санапчатхан осхас. Дмитрий Сазанаков ХГУ-ның физкультура институдын тоостыр, студент тузында футбол ойнирға хынҷаң, марығларда араласчаң полтыр.
- Уғаа чахсы пӱдірілген, истіг стадион. Мындағ стадионнар городта кӧп арах полған полза, оолағастар футбол ойнирға матап тартыларҷыхтар, - сала даа ікінҷілебинче школада физкультура уроктарын апарчатхан ирен.
Ағбанның чуртағҷылары мындағ спорт пайрамына хайди тың ӧрінісчеткеннерін кӧріп, город пазы Алексей Лёмин кӱлімзіреп салчатхан. Пастых кізінің пу сурығ хоостыра хайди даа наа пӧгін-сағыстар пар полар. Амды за городтың устағ-пастааның алнында турчатхан иң нандырығлығ пӧгіннернің пірсі «Ағбан» спорт комплексіне кірчеткен ниик атлетика манежін маңнаныстығ пӱдірібізіп, тузаланысха пирібізері полча. Мында даа федеральнай синдегі «Демография» нацпроект пастыра ахчалығ полызығ пирілеріне ізеніс пар.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде