ТАТАРСТАННАҢ ПАЛҒАЛЫСТАР ТЫЫДЫЛДЫ
15.09.2021
Хабарлар
Тоғыс чорығы. Хакасия пазы Валентин Коноваловтың Казаньзар тоғыс чорығы ӱртӱн айының 9-ҷы кӱнінде узарадылған
ІКІ РЕСПУБЛИКА ПАЗЫ ТОҒАСХАН
Хакасия пазы Валентин Коноваловха ӱртӱн айының 9-ҷы кӱні Татарстан Республика пазы Рустам Миннихановнаң тоғазығдаң пасталған. Ікі харындас республика устағҷылары регионнар аразындағы садығ-экономика паза гуманитарнай палғалыстарны тилідерін ӱзӱргеннер.
Пӱӱнгі кӱнде Татарстаннаң Хакасиязар КамАЗ-тарның хоза чардыхтары, дизель топливозы, бензин, шиналар, азот удобрениезі, имнег тиріглері, имнер, ас-тамах читірілче. Хакасия, тізең, Татарстанға бентонит порошогын, хара тасты, ит ас-тамаан паза пасха ниме-нооны пирче. Олох туста республикаларның садығны алғыдар прай оңдайлары пар.
Аннаң пасха, Хакасияа паза Татарстанға городта истіг оңдайлар тӧстирінде, саннығ технологияларны кирерінде, ӱгредігде паза наукада пірге тоғынарға чарир, туризмде палғалыстарны алғытчаң оңдайлар парох.
Валентин Коновалов Рустам Нургалиевичке Хакасия делегациязын «Россия - спорт державазы» чоннар аразындағы ІХ спорт форумында чылығ удурлаан ӱчӱн алғызын читірген паза аны пістің республиказар ааллап хығырған.
НИКОЛАЙ КАТАНОВТЫ ХУМАРТХЫЛААННАР
Хакасия пазы Валентин Коноваловтың устаанынаң республика делегациязы Казаньда тоғызын узаратхан. «Россия - спорт державазы» чоннар аразындағы ІХ спорт форумында аралазып, делегация кізілері ідӧк Арскай сыыратта чыылған тӱрк тіллерінің саблығ істезігҷізі, этнограф, халыхчы паза пастағы хакас ученай Николай Фёдорович Катановтың сӧӧгінде пол килгеннер паза чахайахтар салғаннар.
- 1894 чылдаң 1922 чылға теере, хаҷан тоозылған, Николай Фёдоровичтің наука, ӱгредіг паза халых тоғызы Казаньда ирткен, - чарытча республика пазы. - Мында ол істезігнең ӧткін айғасхан, Алтынзархы востоктағы археология паза этнография институдын тӧстирінде араласхан паза аның іскеркі пӧлиинің устағҷызына турғызылған, Казаньдағы университете, Чон ӱгредиинің пӧзік институдында, чуваш ӱгретчілерінің курстарында паза Іскеркі музыканың пӧзік школазында ӱгретчі тоғызын апарған.
Ученай ӱреен соонаң аның пазылған улуғ ис-пайы халған, чардығы Татарстан Республиканың национальнай архивінде хайраллалча. Андох Николай Фёдорович экспедициялар тузында чыып алған 1700 азыра ниме-ноо хайраллалча.
ОПЫТНАҢ ТАНЫСХАННАР
Хакасия делегациязы Татарстанның инвестицияларны тартарынҷа паза пӧзік технологияларны тилідерінҷе опыдынаң танысхан. Республика пазы инвестициялар тилізі агентствозында паза «ИТ-парк»-технопаркта пол килген. Техно-парктың ӧӧн кӧстее - республика экономиказында ІТ-кӧстегні ӧскірері. Аның ӱчӱн стартап-проекттерге паза ИТ-компанияларға тиксі хабазығ пирілче. Татарстан Россия регионнары аразында инвестиция оңдайларының национальнай рейтингінде тӧреміл иң пӧзік орыннарда турча.
Валентин Коновалов агентствоның паза «ИТ-парктың» пӱдізінең, республиказар инвестицияларны тартарынҷа паза регионның инвестицияларға хынығ полчатханын ӧскірерінҷе чахсы тоғыс оңдайларынаң танысхан.
Хакасияа Татарстанның инвестиция оңдайларын тӧстирінҷе опыды уғаа кирек, уламох хаҷан ол аймах кӧстеглерҷе чылдаң чылға чахсыланып одырча. Олох туста Хакасияның инвестиция тартчаң оңдайлары, 2020 чылнаң тиңнестірзе, 10,9 пунктха чахсылан парған: ирткен чылда республика 85 орын аразында 71-ҷi полған полза, пӱӱл 29 регион аразында - 18-ҷізі.
Хакасия пазы Валентин Коноваловтың таниинаң, казаньдағыларның тоғыс оңдайларын пістің республикада чуртасха маңнаныстығ кирерге чарир. Мыннаң мындар республика ӱлгӱлері Татарстанның инвестиция тилізі агентствозынаң паза технопаркнаң тӧреміл палғалыста поларға паза удур-тӧдір искіріглернең хабазарға чӧптес салғаннар.
Автор :
Тимнеен Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде