ЧИҢІС ТУДАРЫНА ІЗЕНЧЕБІС
20.09.2019
Хабарлар
Чиит режиссер Михаил МЕРЗЛИКИН
Культура. Тиксі Россиядағы «Амурдағы кӱскӱ» фестиваль-марығда Хакасияда суурылған фильм араласча
Пу кӱннерде Благовещенскте «Амурдағы кӱскӱ» фестиваль парча. Анда республикабыстың алнын чиит режиссёр Михаил Мерзликин алча. Чир-суғӌыбыс Пии аймаанаң, ол илееде тус РТС телерадиокомпанияда істен парир.
2017 чылда чиит кізі хада тоғынчатхан арғыстарынаң «Кирек Хакасияда полча» II республика марииның чиңісчізі полыбысхан. Аны республиканың культура министерствозы иртірген. Утып алған 300 муң салковайға «Харах оды» хоос фильм суурылған. Михаил Мерзликиннің таниинаң, «Харах оды» - нымах, че анда пӱӱнгі кӱннің ағырсымнығ сурығлары кӧдірілче. Оңдайынаң режиссерның чайаачы тоғызы компьютер ойынына тӧӧй, олох туста фильм пастыра хакас чонның фольклорынаң танызарға чарир. Тиксі алза, «Харах оды» 55 минута парча.
Кинода рольларны Хакасияның чон артизі Светлана Чаптыкова, чиит устар Максим Султреков, Алина Майнашева, Виктор Сагалаков паза Каскар Чаптыков толдырчалар. Фильмні оператор Дмитрий Паршин паза звукорежиссер Андрей Кобзарь суурарға полысханнар. Монтаж паза компьютер графиказы ӱчӱн Константин Корзунов нандырған. Сценарийні Михаил Мерзликиннең Анастасия Спалевич пасханнар.
РТС телерадиокомпания режиссёрға фильм суурарға матап полыстыр. Кино суурчатхан ӧменің оборудование саринаң сидіксіністер чох полған. Устағ-пастағ «Харах оды» фильмге фестивальларға чол азар пӧгіннең продюсер кінінзер ӧнетін айлантыр. Аннаңар «Амурдағы кӱскӱ» соонаң Хакасиядаңар фильмні пасха марығларда кӧзідерлер тіп ікінӌілес чоғыл. Ағбанда «Харах одының» премьеразы пӱӱл иртер. Аны «Наутилус» паза «Ролби» кинотеатрларда кӧзідерлер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы