АДА ЧИР-СУУБЫСТЫҢ ТАРХЫНЫНА ЧАРЫДЫЛҒАН
20.09.2019
Хабарлар
Спектакльда ӧӧн рольларны Татьяна МАЙНАГАШЕВАНАҢ Виктор КОКОВ толдырчалар
Саблығ театр Асхыс чирінзер чорыхха тимненче. Артисттер чир-суғҷыларын режиссер Юрий Майнагашевтің «Хан Мирген» ойынынан (12+) ӧріндірерге пӧгінчелер. Спектакль драматург Валентина Шулбаеваның «Хакастар» пьесазы хоостыра турғызылған.
Чоохтирға кирек, Хакас драма театры хоос сӧстің чайаачызынаң пик палғалыс тутча. Тиксі алза, театр сценазында Валентина Шулбаеваның тоғыс пьесазы турғызылған: «Сарналбаан сарын», «Сыын мӱӱзі», «Чуртас салғахтары», «Хаҷан сакура алҷасча» паза пасхазы.
«Хан Мирген» ойынны Юрий Майнагашев 2013 чылда чайаан. Тархын драмазы кӧрігҷілерні таңнатхан, сағысха тӱзірген. Критиктер ойынға пӧзік паалағ пиргеннер, анзын аймах журналларда сыххан рецензиялар киречілепчелер. 2014 чылда спектакль К.Тинчуриннін адынаң VII чоннар аразындағы фестивальда (Казань) «Хрустальный Карим» ӧӧн сыйыхха турысхан.
Драмада VIII чӱс чыллардағы киректеңер чоохталча. Хакастарның устағҷызы Хан Мирген, Ада чирінің хырығларын арачылап, уйгурларнаң чааласча. Чаа хазыр парча. Кибір хоостыра ханның палалары чаалазығлар тузында прайзының алнында парарға киректер. Че Хан Миргеннің оолғы Крис чаалазығдаң парыбысча. Анаң ілезіне сығысхан - хортығы ӱчӱн нимес ханның оолғы арғыстарын артыс салған, че іди дее полза, кибір сайбал парды. Аннаңар пабазы чалғыс оолғын ӧлімге чарғылирға кирек. Хайди полҷаң? Крис тӧрееніне Хан Мирген матап ӧрінген. Оолғы ханның ӧӧн поғдархазы, таңдағызына ізенізі полған. Че ӧӧн матыр палазының чуртазын ал халза, кізілер Ада чир-суубысты арачылабиныбызарлар. Ыырҷы хакастарны чиңіп алза, чиит хазна чох пол парарға айабас. Алында чабал уйгурлар, Іскеркі-Тӱрк хағанны (Восточно-Тюркский каганат) утып, аны чох идібіскеннер. Спектакльда сидік сурығлар турғызылған. Оларға нандырығны артисттер кӧрігҷілернен хада тілирлер.
Ойында ӧӧн рольларны Виктор Коковнаң Татьяна Майнагашева толдырчалар. Оларның ӱлӱзі кӧрігҷілернің чӱреен тибіредер. Ідӧк спектакльда Мария Кыстоякова, Кирилл Султреков, Арлекин Толмачёв, Алёна Топоева, Максим Султреков паза Анат Быдышев араласчалар. Матырларның кип-азаан театрның ӧӧн хоосчызы Влада Чаптыкова чайаан. Оларны пастыра чир-суғҷыбыс хакастарның кибірлерін кӧзіт пирерге кӱстенген. Сценаны хоосчы Мария Чаптыкова килістіре чазабысхан. Прай кӧглерні театрның «Хазыр суғ» ӧмезі толдырча. Хакастарның пурунғыдаң хайраллалған кӧглері спектакльның ӧӧн сағызын читірерге полысчалар.
Пӱӱл драматург Валентина Шулбаева 80 чазын таныхтапча. «Хан Мирген» ойыннаң артисттер хакас чонның саблығ хызының пайрамына чарыдылған мероприятиелерні асчалар. Ойын Асхыстағы Культура туразында 26 сентябрьда 17.30 часта кӧзіділер. Хынчатхан кӧрігҷілерні спектакльға хығырчабыс.
Автор :
Светлана СЕЛИГЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы