ПАЗОХ НАА АВТОМОБИЛЬЛЕР
02.10.2019
Хабарлар
«Улуғ тӧл» проект. 30 сентябрьда Хакасия пазы Валентин Коновалов республика аймахтарының чонға социальнай полызығ пирӌең управлениелер директорларына наа автомобиль клӱстерін читірген
Хакасияның сигіс аймаана «Газельлер» регионның «Улуғ тӧл» проекті хоостыра пирілген. Ол «Демография» национальнай проектке кірче.
- Россия президентінің чахии хоостыра Хакасияда национальнай проекттернің тоғызы узарадылча, - чооғында таныхтаан республика пазы Валентин Коновалов. - Пӱӱн аймахтардағы чонға социальнай полызығ пирҷең устаныстарның автопарктарында наа автомобильлер хозыл парды. Оларнаң ыраххы аалларда чуртапчатхан, 65 час толдыр салған чуртағҷылар тузаланар. Амды узах частығлар имнег тураларынзар сидіксініс чох чидіп ал турарлар.
Таныхтирға кирек, Хакасияның аалларында 65 час толдыр салған чуртағҷы илееде, 20 муң азыра кізі. Пӱӱл наа автомобильлер аларына федеральнай бюджеттең 15 миллион салковай позыдылған. «Газельлер» хазии уйан кізілерні тарт чӧрерге килістіре тиріндірілген.
Хакасияның правительствозы пістің аймахха наа автомобиль читіргеніне уғаа ӧрінчем, - теен Алтай аймаандағы чонға социальнай полызығ пирҷең устаныс директорының тоғызын толдырчатхан Наталья Максимовна Баинова. - Ол піске туза ағылар. Пістің мындағ автомобиль чох полған.
- Пӱӱн піске наа «Газель» пирділер, - ідӧк ӧрінче Асхыс аймаандағы чонға социальнай полызығ пирҷең устаныстың директоры Ольга Васильевна Юнкгейм. - Піс аннаң ыраххы ааллардаң ууңаларны паза ағаларны имнег тураларынзар читір турарбыс. Чахсы машина, анда кинектерні, азахтарынаң пас полбинчатханнарны кӧдірҷең тиріглер пар.
Чонға социальнай полызығ пирҷең устаныстарның директорлары автомобильлерні апарарға водительлерінең хада килтірлер.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде