РОССИЯ СЫЙИИНА ТУРЫСХАННАР
09.10.2019
Хабарлар
Пайрам. Ирткен неделяда Н.Ф.Катановтың адынаң национальнай гимназия-интернатта иң чахсы ӱгретчілерні, воспитательлерні таныхтааннар. Улуғ пайрам Ӱгретчілер кӱніне чарыдылған
Хынчатхан ӱгретчілерінің кӧңнін кӧдірібізер пӧгіннең, гимназияның ӱгренҷілері иртен иртӧк ӱгретчілерні паза воспитательлерні чахайахнаң паза сарыннаң удурлааннар. Кӱн тооза ӱгредіг заведениезінде амыр музыка ойнаан. Уроктар тоозылғанда, гимназияның актовай залында ӱгренҷілер ӱгретчілерін паза воспитательлерін, улуғ нимес концерт кӧзідіп, алғыстааннар. Пайрамнығ кӱнде гимназияның тоғынҷыларынзар директор Марина Сагатаева, чылығ сӧстернең айланып, Аарластығ пічіктер читірген.
Ӏди национальнай гимназияның ікі ӱгретчізі Россияның просвещение министерствозының сыйиина турысхан. Тархын паза обществознание ӱгретчізі, ӱгредіг тоғызынҷа директор орынҷызы Лилия Ахпашева ӱгредіг киреенде пӧзік чидіглерге читкен ӱчӱн, Россияның просвещение министерствозының Аарластығ пічиине турысхан. Халғанҷы ӱс чылда аның ӱгренҷілері пірге хазна сыныхтағларында тиксі республикада иң пӧзік салтарлар кӧзітчелер. Ідӧк Лилия Олеговнаның ӱгренҷілері тиксі Россия олимпиадаларында пӧзік чидіглерге читчелер.
- Национальнай гимназиязар республиканың иң хыйға олғаннары чыылчалар. Олар экзаменнерні чахсы тудыбызарға, хазнаның турыстығ вузтарынзар ӱгренерге кіріп аларға паза чахсы специальность алып аларға сағынчалар, аннаңар оларны чахсы ӱгренерге кӱстирге кирек чоғыл. Ӱгретчілер дее мында уғаа турыстығлар. Олар иң пастап олғаннардаңар сағыссырапчалар, ӱгренҷілерге пӧзік піліс пирерге кӱстенчелер, - таныхтаан чооғында Лилия Олеговна.
Ідӧк гимназияның тархын паза обществознание предмедінің ӱгретчізі Оксана Круподерова Россияның просвещение министерствозының «Почетный работник воспитания и просвещения Российской Федерации» знакнаң таныхтатхан.
Пайрамнығ кӱнде национальнай гимназияның тоғынҷылары Хакасияның ӱгредіг паза наука министерствозының, гимназия администрациязының Аарластығ паза алғыстас пічіктерін алғаннар. Ідӧк «Благодарение» фондтың устағҷызы Тарика Торокова гимназияның иң артых ӱгретчілеріне ахчалығ сыйых читірген.
Н.Ф.Катановтың адынаң национальнай гимназия-интернадының директоры Марина Сагатаеваның искіриинең, гимназияның ӱгренҷілері Россия синінде иртірілчеткен ӱгренҷілернің олимпиадаларында сыбыра сыйыхтығ орыннарға турысчалар. Пӱӱл Хакасияның иң чахсы 3 ӱгренҷізі олимпиаданың халғанҷы чардығында Москвада араласхан. Олар прайзы - национальнай гимназияның ӱгренҷілері. Пӧзік салтар - ол ӱгренҷілернің не нимес, ідӧк класс устағҷыларының, воспитательлерінің кӱстенізінің салтары полча, хайзылары ӱгретчілернің иң пастағы полысчылары полчалар.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы