ХАКАСИЯА ПОЗЫНЫҢ АС-ТАМАА ЧИТКІҶЕ
20.06.2017
Хабарлар
ХАКАСИЯНЫҢ ПРАВИТЕЛЬСТВО ТУРАЗЫНДА РЕСПУБЛИКАНЫҢ ААЛ ХОНИИ ПАЗА АС-ТАМАХ МИНИСТРІ АЛЕКСАНДР БАШКОВ ПАЗА АНЫҢ СОВЕТНИГІ НИКОЛАЙ БОГДАНОВ ЖУРНАЛИСТТЕРГЕ ПРЕСС-КОНФЕРЕНЦИЯ ИРТІРГЕННЕР. МЕРОПРИЯТИЕ ӦӦНІНДЕ ТААРЫҒ ТУЗЫ ТООЗЫЛҒАНЫНА ЧАРЫДЫЛҒАН.
ХАЙДИ МИНИСТР ИСКІРГЕН, РЕСПУБЛИКАДА ТААРЫҒ ТУЗЫ ӦӦНІҢДЕ КӦРІЛГЕН ПЛАН ХООСТЫРА ИРТКЕН. ХАКАСИЯДА КЛИМАТ ААЛ ХОНИИ ТОҒЫСТАРЫН АПАРАРҒА ТЫҢ НА КИЛІСТІРЕ НИМЕС, ПІРЕЕДЕ ХАР ЧААП ПАРЫБЫСЧА, ИРТКЕН ТЫНАҒ КӰННЕРІНДЕ АЛТАЙ АЙМААНДАҒЫ КӦК ХАЙА ААЛДА ПАЗА ДАЧАЛАРДА МӰНДӰР ЧААП ПАРҒАН. ОЛ АНДА ОДЫРТЫЛҒАН ЧИР ТАМААН ЧОХ ИТКЕН.
ПУ ТУСХА РЕСПУБЛИКАДА ТОҢАСТЫҒЛАР 98102 ГЕКТАРДА ТААРЫЛ ПАРҒАН, ОЛ КӦРІЛГЕН ПЛАННЫҢ 94,6 ПРОЦЕНТІНЕ ТИҢНЕЛЧЕ. ТААРЫҒ ТОҒЫСТАРЫ ПИИ, БОГРАД, ТАШТЫП ПАЗА АҒБАН ПИЛТІРІ АЙМАХТАРЫНДА ТООЗЫЛ ПАРҒАН.
Шира паза Орджоникидзе аймахтары сала соона халчалар. Андағы чирлерде хар ӱр чатхан. Ол аймахтардағы тоңастығлар таарыҷаң чирлер мал азиин тимнир ӧзімнерге пиріл парар. Хакасияда прай 1300 кресен-фермер хонии тоғынча, оларның 1100-і мал тударынаң айғасча. Пір пасха 35 центнер азырал тимнеп саларға кирек.
Республикада пуғдай 45216 гектарда (планның 91,4 проценті) таарыл парған, ас - 12734 гектарда (планның 107,8 проценті), сула - 32206 гектарда (планның 96,9 проценті), гречиха -7183 гектарда (планның 86,8 проценті), горох -763 гектарда (планның 85,3 проценті).
Ӧзімнернең айғасчатхан аал хонии ас-тамаан сығарчатханнарға ахча тузында позыдардаңар Хакасия пазы Виктор Зиминнің чахии прай толдырыл парған. Пӱӱл аграрийлерге 87,6 миллион салковай ызылған. Чарытхаа, ГСМ-ға, аал хонии техниказына паалар ӧсче. Кӧзідімге, мының алнында «Беларусь» трактор 450 муң салковайға турҷаң полза, амды аның ӱчӱн 1,5 миллион салковай тӧлирге кирек.
Алтай аймаанда мӱндӱрге саптырған ӧзімнерге идінҷектер страхование итпеен полғаннар. Олар страховка даа чох чуртап парыбызарына ізенгеннер. Амды олар, арса, хоза таарирға даа маңнанарлар. Министерствозар, полызығ сурып, алты идінҷек айланған, оларға хай пірее компенсация пирілер.
Че дачаларда, ӱӱҷіктерде ӱреге кірген олаңай кізілерге компенсация полбас. Ӧзімнердеңер сурығларға Николай Богданов нандырған. Аның чооғынаң, чир тамаанаң ӧӧнінде Ағбан пилтірі аймаанда айғасчалар. Хакасияның пазы мал азыралын тимниріне кӧп чирлер пирерге чахығ пирген. Республикада тузаланылбинчатхан чирлер кӧп. Анда пуртах от ӧскірбес пӧгіннең, аймахтар, ол чирлерні алып, аукционнар иртірчелер, арендаа пирчелер. Кӧп кресен-фермер хонии Хакасияның чуртазында аралазарға кӱстенче, пӱӱл 75 фермер хоныхтарын тилідерге гранттар алған.
Гречкаа паалар Хакасияда ӧспес. Че ол паалар Алтай крайынаң палғалыстығ. Россиядағы гречиханың кӧбізі анда ӧсче, оларох паалар турғысчалар. Хакасиядағы идінҷектер килограмм гречканы 17-18 салковайға пирібісчелер, аннаң андархы пааларны посредниктер, садығҷылар кӧдірчелер.
Чир тамаан хайраллаҷаң орыннар Хакасияда читкіҷе. Пӱӱл хоза ікі наа орын тоғынып пастир, пірсі - Искож хыринда, ікінҷізі - Вагонмаш хыринда. Чир тамаа республикаа читче, аны пасха даа регионнарзар ысчалар. Иркутск облазы кӧп садызып алча, Северзер, Норильсксер чир тамаан апарчалар.
«Баранина Хакасии» проект ундудылбаан, ол тимнегде, че ағаа ам даа инвестициялар киректелче. Итке, палыхха паза чир тамаана паалар пістің республикада Сибирьдегі регионнар аразында иң тӧбін. Хакасия ас-тамахты пасха регионнардаң ағылбинча, позына чахсы сыданча. Александр Башков паза Николай Богданов пасха даа кӧп сурығларға нандырғаннар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде