КӰСКӰДЕГІ ТАБЫҒЛАРҒА ТИМНЕНІС
28.06.2017
Хабарлар
Киҷее Хакасия правительствозының туразында пӱӱл 10 сентябрьда, пірге ӱн пирҷең кӱнде, иртер орындағы пос устаныс органнарына табығларға чарыдылған пресс-конференция ирткен.
Аны республиканың табығ комиссиязының кнезі Длександр Чуманин апарған. Чыылығда ол табығларға тимненіс хайди парчатханнаңар чоохтаан. Аның искіриинең, 10 сентябрьда муниципальнай аймахтарда паза Ағбаннаң пасха город округтарында табығлар иртер. Пӱӱнгі кӱнге 25 табығ кампаниязынаңар чарлалған.
Табығларда Абаза городтың, Алтай, Таштып, Шира аймахтарының пазы паза 8 аал чӧбінің пазы табылар. Ідӧк Саяногорск, Сорығ, Харатас городтарда, Алтай, Пии, Боград, Орджоникидзе, Таштып, Ағбан пилтірі, Шира аймахтарында наа хығыртығның Депутаттар чӧптерін табарлар. Ағаа хоза представительнай органнарға табығлар ікі аалда иртер: Асхыс аймаандағы Паза аал чӧбінде паза Ағбан пилтірі аймаандағы Солнечнай аал чӧбінде. Орджоникидзе аймаанда Приисковай аал чӧбінде пір мандаттығ табығ округынҷа табығлар иртер.
Саяногорскта паза Харатаста араластығ табығ системазы халған, аны хоостыра депутаттарның чардығы политическай партияларның списоктарынҷа табылар, пасха чардығы - пір паза кӧп мандаттығ табығ округтарынҷа. Таныхтирға кирек, Асхыс аймаанда паза Ағбанда табығлар мындағох оңдайнаң иртчелер. Че пӱӱл оларда мындағ табығ кампаниязы иртпинче.
Тиксі 227 мандат алыстырыларға кирек: 215 депутат паза 12 муниципальнай пӱдістернің пазы. Александр Чуманиннің таниинаң, 2017 чылның январьына кӧрілген саннар хоостыра табығларда 230 муң азыра кізі аралазар тіп кӧрілче. Ол табығларда аралас полар республика чуртағҷыларының 58 %-і. Табығларға тимненісте 2,5 муңҷа табығ комиссиязының кізізі аралазар. Табығлар 276 табығ участогында иртер, оларның 193-і - аалларда. Ідӧк пресс-конференцияда хабарҷыларға табығлар салтарларынаңар протоколны, QR-коднаң (ӧнетін ікі синніг штрих-код, хайзын, кӧзідімге, смартфонға турғызылған приложение полызиинаң хығырарға чарир) тузаланып, тимнир наа оңдайнаң таныстырғаннар. Аның ӧӧн пӧгіні - табығлар салтарларын санир тусты хызырары паза кізінің оларға хайдағ-да алызығлар кир полар оңдайын чох идері. QR-коднаң тузаланғаны протоколларны паза оларның хобырғанын тимнепчетсе, алҷаастар идерге пирбес. Табығларны сыныхтағда тутчатханнар даа, пу кодтарны хығырар программанаң тузаланып, протоколға кирілген саннарны сыныхтап поларлар.
Паза кирілчеткен наа оңдайлардаңар чоохтаза, орындағы табығ комиссияларының тоғызынаңар Интернет пастыра кӧзідіг апарҷаң оборудование турғызылчатханын таныхтирға кирек. Амды орындағы табығ комиссияларында ікі веб-камера турғызылар. Пірсі участоктағы табығ комиссиязының протоколларын алчатхан орында турғызылар, ікінҷізі - орындағы табығ комиссиязының чыылии иртчеткен орында.
Прай пу тоғыстар табығлар салтарлары орта саналғанына чуртағҷыларның киртінізін кӧдірер пӧгіннең иртірілче. Ізенербіс, олар тӱзімніг салтарлар ағыларлар.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде