Хакасия пазы Виктор Зиминнің адынаң пӱдірігҷілерні алғыстаан аның орынҷы тоғызын толдырчатхан Валерий Марков. Ол Хакасия пазы пайрамнығ мероприятиее кил полбаанына хомзынчатханын паза ағаа табырах Москвазар учуғарға киліскенін искірген. Че республика устағҷызы пӱдірігҷілердең сыххан кізі, аннаңар Пӱдірігҷілер кӱні - ол ідӧк аның профессияҷа ӱлӱкӱні. Ол ідӧк пӱдірігҷілернің тоғызынаң чахсы таныс, пілче хатығ тустарны, хаҷан пӱдірігҷілерге тоғыс таа чох одырарға киліскен. Пӱӱнгі туста чуртағҷыларның даа, пӱдірігҷілернің дее ӧрінізіне республикада пӱдіріг айныпча. Аннаңар піске чоохтапча ирткен чылда тимге сығарылған килкім пӱдіріглер, хайзыларын турғызарға чахсы хабасхан федеральнай ӱлгӱ. Олар - республиканың музей-культура кіні, хирургия корпузы, перинатальнай кін.

Пӱдіріг кибірлері тиксі хазнада 1960 -1980 чылларда тӧстелген, хаҷан тиксі СССР-да килкім пӱдіріглер апарылған. Хакасияда ол туста Сойан-Сус ГЭС, Сая-ногорсктағы алюминий заводы паза «Ағбанвагонмаш» пӱдірілгеннер. Пӱӱнгі кӱнде пӱдіріг кибірлері узарадылча. Республикада школалар, ФАП-тар, олған садтары, культура туралары пӱдірілче. Устағҷылар пӱдірігҷілерге алғыстастарын читіргеннер паза олар хаҷан даа аарласта поларларына молҷағ пиргеннер.

Хакасияның Аарластығ пічиинең сигіс кізі сыйыхтатхан, ол санда Ульяна Константиновна Щетинина (хыс фамилиязы - Чаптыкова) - «Пӱдіріг материаллар заводының» кран машинизі. Ипчі пу тоғыста 35 чыл азыра істен парир, ол санда 14 чыл пу предприятиеде. Алында 20-ҷе чыл «Ағбанвагонмашта» істенген. Пӱдірігҷі кӱні алғым таныхталчатханына, оларны, улуғ сценаа сығарып, чеестепчеткеніне ӧрінче.

«Гидроэлектромонтаж» ООО-ның ӧӧн инженері Альберт Викторович Угдыжеков Хакасияның Ӧӧркі Чӧбінің алғыстас пічиине турысхан. 20 азыра чыл істен салған ирен тоғызын ӧтіре пілче. Аннаңар даа, неке, энергетика паза пӱдіріг киреенде удаа сыйыхтарға, алғыстастарға турысча.

Тимірчолҷыларның культура туразының сценазынзар сыйыхтар соонҷа прай 27 кізі паза пис пӱдіріг организациязының устағҷылары сыхханнар. Позының сыйыхтарын тимнеп салған Хакасияның пӱдірігҷілер пірігізі. Халых пірігізі пӱдірігҷі тоғызын таллап алған, ӱгредігде чахсы чидіглер кӧзітчеткен чииттердеңер ундутпаан. Оларның пірсі Ағбандағы пӱдіріг техникумының 3-ҷі курстағы студенті Никита Родионов пу наада «WorldSkills Russiа 2017» Россияның национальнай чемпионадында кӱмӱс сыйиина турысхан, пірігіс, тізең, аны Аарластығ пічікнең таныхтаан.