KӰCКӰ - ХЫРАҶЫЛАРНЫҢ МАҢ ЧОХ ТУЗЫ
06.09.2017
Хабарлар
ПИИ АЙМААНДАҒЫ «БЕЙСКОЕ» ООО ТОҢАСТЫҒЛАРНЫ 26 АВГУСТТА ЧЫЫП ПАСТААН. ПЛАН ХООСТЫРА ААЛ ХОНИИ ПРЕДПРИЯТИЕЗІ ТОҢАСТЫҒЛАРНЫ 12 АВГУСТТА ЧЫЫРҒА ПӦГІНГЕН, ЧЕ НАҢМЫРЛАР ХАРЫҒ ПОЛ ПАРҒАННАР.
«БЕЙСКОЕ» ООО-ның ӦӦН АГРОНОМЫ БОРИС АЛЕКСЕЕВИЧ СТРЕКАЛОВТЫҢ ЧООҒЫНАҢ, 30 АВГУСТХА ТОҢАСТЫҒЛАРНЫ ЧЫЫРЫ ПЫЛТЫРҒЫ КӦЗІДІМНЕРНЕҢ 200 - 300 ЦЕНТНЕРГЕ ХАЛЧА. ПӰӰЛ ЧӦПТЕЗІГ ТОЛДЫРЫЛЧА.
ААЛ ХОНИИ ПРЕДПРИЯТИЕЗІНДЕ 1700 ГЕКТАР ЧИРДЕ ПУҒДАЙ САЛЫЛҒАН, 1000 ГЕКТАРДА - СУЛА ПАЗА КӦЧЕ. 30 АВГУСТХА 280 ГЕКТАРДАҢ СУЛА КИЗІЛГЕН. ГЕКТАРДАҢ 22 - 24 ЦЕНТНЕР СУЛА АЛЫЛЧА. 800 ГЕКТАР ЧИРДЕҢ ХУРУҒ ОТ ПАЗА СЕНАЖ САБЫЛҒАН. ТИМНЕЛГЕН МАЛ АЗИИ МАЛЛАР ХЫСТАП ПАРЫБЫЗАРЫНА ЧИТКІҶЕ ПОЛАР ТІП ИСКІРГЕН ӦӦН АГРОНОМ. АҒАА ХОЗА ПЫЛТЫРҒЫ АЗЫХ ХАЛҒАН.
- Пӱӱл июнь ізіг турған даа полза, тоңастығларны хайраллап халар оңдай тапхабыс. 2016 чылға теере «Бейское» ООО-да ӧзімнер чирге 5-6 сантиметр тирең одыртылҷаңнар. Ол син тирең чирде сых асхынах, аннаңар хуруғ чылда ӧзімнер чахсы ӧс полбинчалар. Пылтыр піс «Енисей» паза «Кузбасс» ӧзімнер одыртчаң комплекстер садызып алғабыс. Оларның полызиинаң ӱреннерні чирзер тирең арах одыртарға оңдай пол килген, - таныхтаан Борис Алексеевич.
Чахсы кӱннер турза, «Бейское» ООО 30 кӱнге тоңастығларны чыып аларға пӧгінче.
Хыраҷылар тоңастығларны чыыр туста иртенӧк хыраларда хайынысчалар. Олар полған на айас кӱннең тузаланып аларға кӱстенчелер. Ӧӧн агроном иртен, хыразар киліп, арчы парын-чоғылын сыныхтапча. Арчы чох пол парза, комбайнёрларға хыра тоғызын пастирға чахығ пирче. Ол туста комбайннар хырада тимде турчалар. Хыраҷыларның тоғызы 7.00 частох пасталча. Хыразар парар алнында, олар комбайннарын, сыныхтап, тоғысха тимнепчелер.
Аал хонии предприятиезінде техника читкіҷе. Пӱӱл предприятие хоза пір наа комбайн садызып алған, хайзы иргі комбайннардаң ікі хати табырах тоғынча.
Амғы туста удобрениелер аарлығ турчатханнаңар, «Бейское» ООО биологическай удобрениелернең тузаланча. Парға артызылған хыраларда рапс, донник оттарны ӧскіріп, анаң ол чирні тартыбысчалар. Мындағ оңдайнаң чирні мының алнындох чахсыландырҷаңнар.
«Бейское» ООО 2011 чылда тӧстелген. Ол мал паза ӧзімнер ӧскірерінең айғасча. Амғы туста аал хонии предприятиезі 400 саалчатхан інек тутча. Пылтыр «Бейское» ООО-ға ӧзімнерні ӱренге ӧскірчеткен хоныхтың статузы пирілген. 5 чыл изере аал хонии предприятиезі тоңастығларны мал азиина ла нимес, ідӧк ӱренге ӧскірче. Ӱренні Хакасияның аймахтарына паза Тува Республикаа сатча. Чыл сай хоных ӱреннерні алыстырча. Пылтыр кӧченің Красноярский 91 сорты ӱренге ӧскірілген. Пу кӧче 3 метр пӧзік ӧсче, аннаңар сызырға чахсы чарапча. Красноярский 91 мал азиина чахсы чарапчатхан сорт. Амғы туста «Бейское» ООО-да пуғдайның элитнай сорттары пар: Алтайская 75, Новосибирская 31.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде