ЧАЙЫЛҶАХ КӦГЕНЕКТЕРІ ТОЙЛАРҒА ТИМДЕ
08.11.2019
Хабарлар
Марығ. Президент фондының гранттары хоостыра Ағбанда «Алтын кӧгенек» республика марии ирткен
Республика синіндегі «Алтын кӧгенек» марығ хакас чонның кибірліг кип-азаан хайраллир, чон аразында тарадар пӧгіннең иртірілче. Хаҷан-пурунда тӧстелген кибір пістің чонның пай культуразының чардығы полча. Пу кибір ампғы тустың ағынында чіт парбас ӱчӱн, пу проектті пылтыр паза пӱӱл публикадағы «Востоковедтер» халых пірігізі, ХакНИИЯЛИ, Хакасияның чон чайаачызын хайраллир, тилідер паза тарадар кін араласчыларі чуртасха киргеннер. Кізілер постары хакас кӧгенеен тігерге ӱгренері, кӱннің сай кис чӧрері проектті иртірчеткеннернін ӧӧн пӧгіні полча. Марығда хакас кӧгенектерін тігерге пастапчатхан ус холлыглар араласханнар.
Пастап республиканың муниципалитеттерінде 9-28 сентябрьда 1 таллағ марии иртірілген. Республика синінде 19 кізі узынаң сынасхан. Марығҷылар аразында чалғыс ирен Артём Топоев полған. Амғы марығда тӧрт номинацияда кӧгенектерні тігері чарлалған: «ипчі кӧгенее», «ирен кӧгенее», «хызыҷах кӧгенее», «оолағас кӧгенее».
«Алтын кӧгенек» марығ «Кибірліг хакас кип-азаан хайраллиры паза чон аразында тарадары» проекттің халғанды чардығы полча. Аны чуртасха кирерге президент гранты полысхан. Проекттің пастағы чардығында хакас кӧгенектерні тігерінде методика литературазы сығарылған. Ағбанда паза республиканың аймахтарында ӱгредігліг мастер-класстар ирткеннер.
Халғанҷы марығ ікі кӱн парған, пістің республикада пастағызын ирткен. Араласчыларға кӧгенектерні тігеріне прай кирек нимелер пирілген: ис, кип-азах тікчең машинка, чіптер, хыптылар. Оларға ікі кӱн аразына номинация хоостыра кибірліг кӧгенекті тік саларға киректелген. Тиксі проектті филология наукаларының кандидады, Чон узы, «Востоковедтер» халых пірігізінің кізізі Раиса Абдина апарған, жюри араласчылары Хакас профессиональнай технологиялар, экономика паза сервис колледжінің ӱгретчілері Елена Войнова, Светлана Коровина, тархын наукаларының кандидады Валерий Чертыков, С.П.Кадышевтің адынаң культура кінінің ИЗО паза ДПИ пӧлиинің устағҷызы Светлана Патачакова полғаннар.
Марығны паалапчатханнар, ӱлгӱнең тузаланмин, хыптынаң на хыплирына, исті тың на хоратпин тузаланчатханына, ээн-пазын, нітке чыырындызын, иңні чыырындызын тігерге пілчеткеніне, тиксі кӧгенектің кӧріміне хайығ салғаннар. Пастағы кӧгенек ікінҷі кӱнде 12.45 часта тимнел парған. Прай араласчыларға дипломнар паза сыйыхтар читірілген. Кӧп кізее кип-азах тікчең машинкалар пирілген. Пастағы орынға Артём Топоев, Лариса Трошкина турысханнар. Ікінҷі орынны Ольга Абдина, Юлия Костякова, Юлия Майорова алғаннар. Ӱзінҷі орын Мээрим Алышпаеваа, Татьяна Тарасюкка пирілген.
Проект хоостыра аймахтарда тиксі 15 мастер-класс иртірілген. Хакасияның устарынаңар документальнай фильмнер суурылған. Проекттің тӧстегҷілері, аны чуртасха киріп, хакас чонның кип-азаан хайраллиры паза чон аразында тарадары пӧгінге турызарына ізенчелер.
Автор :
Елена САГАТАЕВА
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы