УЛУҒЛАР ЧООХТАНЗЫННАР, КІЧІГЛЕР ӰГРЕНЗІННЕР
13.09.2017
Хабарлар
Хакасияның писательлері, культура паза наука тоғынҷылары литература чорығына чӧр килгеннер. Алында андағ чорыхтар Таштып паза Асхыс аймахтарында полған. Амды чорых Ағбан пилтіріндегі Чарков аалзар полған.
Пу мероприятие хакас чонның пастағы съездтері ирткеннең пеер 100 чыл толчатханына паза Хакас тілі кӱніне чарыдылғаннар. Чол пар килерге автобусты С.П.Кадышевтің адынаң республиканың культура кіні пирген. Тоғазығ Чарков аалның ортымах школазында ирткен. Чыылығны апарған чон чайаачызы паза культура кінінің пӧлік устағҷызы, Хакасия культуразының саблығ деятельі Игорь Фёдорович Боргояков.
Пастап чыылысхан олғаннарзар айланған драматург, хоосчы паза ученай Александр Иванович Котожеков. Ол ӱс чӱс чыл мының алнында Чарков аалның хыринда пічіктіг пӧзік кӧзее табылғаннаңар чоохтаан. Аны тапхан немец ученайы Даниил Готлиб Мессершмидт. Амды ол пурунғы тӱрк пічіктіг тас Минсуғ городтағы музейде хайраллалча. Писательлернің пропаганда бюрозының директоры Юрий Николаевич Забелин, хазыхта ол тасты пеер нандыра ағылып, мында музей тӧстирге сағынған.
Тӱрк хазналары аразында Хакасияда ла Тӱрк пічии паза культура кӱннері таныхталча. Аннаңар ол пайрамны пу оңдайнаң Чарков аалда хайди даа иртір турарға кирек. Пуох аалда чӱс чыл мының алнында хакастарның ікінҷі съезді ирткен. Анда пістің чонға «хакас» ат пирерге чарадығ алғаннар. Ӱр ниместе хакастарның съездіне чӱс чыл толғанын мында таныхтааннар.
Соонаң сӧс пирілген олған писательі Галина Григорьевна Казачиноваа. Ол Чарковтаң ырах нимес Аев аалда тӧреен. 10 классты Чарковтағы ортымах школада 1957 чылда тоостыр. Аннаңар мындағы чирлер ағаа прай таныс. Галина Григорьевна олғаннарны Хакасия писательлерінің наа сыххан книгаларынаң таныстырған. Анаң ол книгаларны школа библиотеказына сыйлап пирген.
Хакас тілін пілчеткеннерге хынығ полған полар истерге Турциядаң килген аалҷы хысты Шима Доғанны. Аннаңар пістің газетада алында пасхан полғабыс.
- Мин орыс тілін пілбинчем, аннаңар тадарлап чоохтанарбын, - пастаан чооғын Шима. Анаң хакас тілінең чоохтап сыххан Хакасиядағы позының тоғызынаңар. Ол Николай Георгиевич Доможаковтың «Ыраххы аалда» романын туроктар тіліне тілбестепче. Сӧстерні чахсы пілер ӱчӱн, хакас тіліне ӱгреніп алған. Пу аның «доктор» ученай атха тоғызы полча.
- Пос тілін чахсы пілерге кирек, аннаңар пос тілінең удаа чоохтазарға. Тіл чіт парза, чон даа чох пол парар, - теен ол, чооғын тоосчатханда.
Тілдеңерӧк чоох тутхан ХакНИИЯ-ЛИ-ның наука тоғынҷызы, филология наукаларының кандидады Ирина Максимовна Чебочакова. Ол Шима Доғанның сӧстерін орыс тіліне тілбестеп пирген. Анаң ӱр ниместе ле Хакасиязар пасха хан чирінең килген хыс пір-ікі ле айға хакас тілінең чоохтан сыххан тіп таныхтаан.
Чоохтар тоозылғанда, Ағбаннаң парған «Кӱн чахайағы» чииттер ансамбльы олғаннарға теелбек сал пирген паза сарыннар толдырған. Устапча пу ансамбльнаң Дмитрий Сафьянов. Ағаа полысхан ырҷы Юлия Тиникова.
Олғаннарның соонда залға оларның паба-іҷелері чыылысханнар. Оларнаң ідӧк чоох-чаах парған паза «Кӱн чахайағы» ойыннарын кӧзіткен.
Мин ол аразында школада тоғынчатхан хакас ӱгретчілернең танызып алғам. Пӱӱлгі наа ӱгредіг чылында школада олғаннарны хакас тіліне ӱгредерге килтір Екатерина Николаевна Бурнакова. Аның тӧреен-ӧскен чирі - Ьс чул аал. Ам мында тоғынып пастир. Хакас тіліне 2 - 9 класстардағы олғаннарны ӱгретче. Неделяда уроктарға ӱс час пирілче. Пасха класстардағылар хакас тіліне факультатив оңдайынаң ӱгренчелер.
Пуох школада тоғын парчалар Надежда Мефодьевна Тутаркова паза Оксана Семёновна Чистанова. Олар пістің «Хабар» газетаны алчалар. Надежда Мефодьевна хабарлар даа пазыбысча. Ол география, биология паза химия уроктарын апарча. Аалда паза школада хакас ӱлӱкӱннерін иртірерінде ӧткін араласча. Ағаа полысча Оксана Семёновна. Ол 1-ғы класстардағы палаҷахтарны ӱгретче.
Оларның чооғынаң, мындағ тоғазығлар тың кирек. Аалда кӧбізі хакастар даа полза, пос тілінең чоохтаспинчалар. Піди аалҷылар удаа ползалар, арса, аалда хакас тілі дее удаа истіл сығар. Ағбаннаң оларзар «Читіген» театр тӧреміл кил парчаттыр. Театрның артисттері хакас тілінең ойыннар кӧзітчелер паза хакас сарыннарын ырлап пирчелер. Аалдағы клубта хакас тілліг специалист полған полза, ӱлӱкӱннерні ідӧк хакас тілінең дее иртірерҷік.
Мында хакас чонның пастағы съездтеріне 100 чыл толчатханын таныхтир ӱлӱкӱн алнында аал маңат чазал парған. Аның ӱчӱн республика ӱлгӱзіне паза Улуғлар чӧбіне улуғ алғызын читіргеннер.
Тоғазығ соонда Ағбанзар нанчатханда, сағын салғам: пірее хаҷан-полза Чарков аалдағы кізілер Тӧӧ аалларындағы чіли хакас тілінең чоохтаспастар ни?
Автор :
Илья ТОПОЕВ Ағбан - Чарков - Ағбан
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде