«САЯНЫ» ЧИҢІСТЕР ТУДАРҒА ТИМНЕНЧЕ
23.11.2018
Хабарлар
Меспектіг хоккей. Ағбандағы «Саяны» команда пӧзік лиганың мариина тимненче. Пу кӱннерде хоккеисттер азых тренировка иртіргеннер.
Тренировка алнында «Саяны» команданың наа араласчыларынаң хабарҷыларны паза кӧрігҷілерні таныстырғаннар. Пастап пуссар командада полған спортсменнер сыхханнар, анаң - наа килген хоккеисттер. Пӱӱл Ағбандағы «Саянызар» алты араласчы хозылған: нападающайлар Василий Арестов паза Михаил Селедков, полузащитниктер Тимофей Ващук, Константин Жаданов паза Роберт Гиниатуллин, арачылағҷы Евгений Корин. Полған на хоккеистке хынған номерліг форма пирілген.
- Ойнаӌаң тусха тимненчеткенде, піс прай кӧрілген тоғыстарны толдырыбысхабыс. Хоккеисттер чемпионатха тимделер. Командаа пӱӱл хозылған оолларның піреезі прай оңдайларға кӧнік парған. Соонаң килген Михаил Селедковха паза Василий Арестовха кӧнігерге нинӌе-де тус киректелер. Жаданов, Корин паза Ващук пістің холыбыста ӧскеннер. Че соонаң олар командадаң парыбысханнар. Гиниатуллин Ульяновсктағы хоккей школазының ӱгренҷізі полча. Ирткен чылда ол Оренбургтағы «Локомотив» команда ӱчӱн ойнаан. Василий Арестов Кемеровта ӧскен. Ирткен сезонда Воткинск городтың «Знамя-Удмуртия» командазы ӱчӱн турысхан. Наа килген хоккеисттернің аразында иң саблығ Михаил Селедков полча. Ол Краснотурьинск городта ӧскен. Пылтыр супер-лигада Сыктывкардағы «Строитель» команда ӱчӱн ойнаан. Пӱӱл команда полған на ойында чиңіс тударға пӧтінче, - чоохтаан команданың ӧӧн тренері Евгений Ерахтин.
«Саяны» школаның ӱгренҷізі 17 частығ Евгений Корин ӧӧн ӧмее хозылғанына уғаа ӧрінче. Аның чооғынаң, команда араласчылары аны чахсы удурлааннар. Амғы туста ол ӧӧн араласчылар санына кірбинче. Че тӱрчедең полған на ойында ол пастағы минуталардаң сығара ойнирына ізенче.
Хоккеисттернең таныстырған соонда команда тренировка иртір сыххан. Тренерлер хоккеисттерге хайдағ упражнение толдырарынҷа чахығлар пиргеннер. Команда араласчылары ӱр нимес тус пусча чыл чӧріп алғаннарында, тренерлер оларны ікі чарыбысханнар. Іди хоккеисттер улуғ нимес матч ойнабысханнар.
Команданың ӧӧн имҷізі Павел Асочаковтың чооғынаң, марыға тимненчеткенде, нинҷе-де спортсмен пиртінген полған. Че амды прай хоккеисттер хазии хоостыра ойыннарға тимде. Олар полған на тоғазығ соонаң табырах кӱс алынар пӧгіннең имҷілер кӧп тоғыс толдырчалар.
Киҷее «Саяны» команда Кемеров городсар чолға сығыбысхан. Таңда пістің чир-суғҷыларыбыс орындағы «Кузбасс-2» командадаң тоғыр ойнирлар. Пӱӱл «Саяны» команда ӱчӱн турызарлар: Сергей Саблин, Владислав Атапин (хаалха хадағҷылары), Дмитрий Бутаков, Виталий Шнайдер, Иван Касаткин, Николай Верещагин, Евгений Корин (арачылағҷылар), Роберт Гиниатуллин, Евгений Ткачук, Олег Селиверсткин, Александр Захваткин, Вадим Афанасьев, Тимофей Ващук, Константин Жаданов, Евгений Попов (полузащитниктер), Михаил Селедков, Руслан Гавричков, Василий Арестов (нападающайлар).
Автор :
Антон ЧЕРТЫКОВ, сомнар Дина КАРАМЧАКОВАНИ
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 1 | 2 |
Кӱн таңмазы