ОЛАР РЕСПУБЛИКАНЫҢ ААЛ ХОНИИН ТИЛІТЧЕЛЕР
28.11.2018
Хабарлар
Ӱлӱкӱн. Чыл сай, кӱскӱ хыра тоғыстары тоозыл парза, Хакасияның аал хонии паза ас-тамах министерствозы аал хонииның иң чахсы тоғынӌыларына аарлығ сыйыхтар читірче. 23 ноябрьда Ағбанда Чииттер ӧргезінде аал хонии тоғынӌыларын чеестееннер.
Любовь КЫСТОЯКОВА сыйыхха алған «Лада-Гранта» автомобильі хыринда.
ПӰӰЛ РЕСПУБЛИКАБЫСТЫҢ ААЛ ХОНИИНДА ІСТЕНЧЕТКЕН 200 АЗЫРА КІЗІЗІ АЙМАХ СЫЙЫХХА ТУРЫСХАН. ПАЙРАМҒА НИНҶЕ-ДЕ ЧӰС СПЕЦИАЛИСТ КИЛГЕН - ЗООТЕХНИКТЕР, МЕХАНИЗАТОРЛАР, ІНЕК САҒҶАҢНАР, МАЛ ХАДАРЧЫЛАРЫ, АГРОНОМНАР ПАЗА ААЛ ХОНИИ АС-ТАМААН СЫҒАРЧАТХАННАР.
Ол кӱн Хакасияның пазы Валентин Коновалов, аал хонии тоғынӌыларын алғыстап, сыйыхтар читірген.
- Пу пайрамнығ мероприятиеде Хакасияның аал хонии промышленнозы тоғынҷыларының істеніс салтарларын итчебіс. Аал хонии тоғызы ниик нимес полчатханын прайзы даа пілче. Город чуртағҷылары столларында халас паза сӱт полар ӱчӱн кӧп кӱс хорадылчатханнаңар тың на чахсы пілбинче поларлар. Аал хонии ас-тамаа ползын тіп, механизаторлар, комбайнёрлар, мал хадарчылары, інек сағҷаңнар кӧп тоғынчалар.
Халғанҷы туста Хакасияның аал хонии кӧп сидіксіністерге урунған: хуруғ чайғы, наңмырлар, суғ тасханы, ӧрттер. Пу сидіксіністерні аал хонии тоғынҷылары тобыр парыбысханнар. Сірернің сылтаанда килер чылда республика чуртағҷыларының халас, ит, чир тамаа полар. Аның ӱчӱн сірерге улуғ алғыс! Пӧзік чидіглерге чидерге алғапчам, - теен Валентин Коновалов.
Анаң Хакасияның пазы аал хониинда пӧзік чидіглерге читкен тоғынӌыларға сыйыхтар читірген. «Хакас Республиказы аал хонииның аарластығ тоғынӌызы» атты ӱс кізі алған: Шира аймаандағы «Целинное» ООО-ның ӧӧн бухгалтері Валентина Огневая, Ағбан пилтірі аймаандағы фермер Александр Чернов, Хакас Республикаӌа чирлер чахсыландырарынӌа паза аал хониина суғ пирӌең управлениенің директоры Валерий Карталыков.
Хакасияның аал хонии отрасльына улуғ хозым иткен ӱчӱн Пии аймаандағы фермер Виктор Баузер, Шира аймаандағы «Сонское» ООО-ның тракторизі Владимир Гельд паза Ағбан пилтірі аймаандағы фермер Станислав Мангуш Хакас Республиканың Аарластығ пічиине турысханнар.
Аал хониинда кӧп чыл тоғынчатхан кізілерге алғыстас пічии читірілген. Оларның санында аал хониинда 50 азыра чыл істен салған Хакасияның аал хонии сурығларынаң айғасчатхан наука-істезігліг институдының науканың улуғ тоғынӌызы Егор Чебочаков, Боград аймаандағы «Троицкое» муниципальнай предприятиенің зоотехнигі Валерий Чугунеков, Алтай аймааның аал хонии управлениезінің ӧӧн зоотехник Лидия Иванова паза пасхазы даа полғаннар.
Хакасияның аал хонии министрінің тоғызын толдырчатхан Александр Башков пӱӱл аал хониинда пӧзік чидіглерге читкен тоғынӌыларға Хакасияның аал хонии паза ас-тамах министерствозының Аарластығ пічіктерін паза ахчалығ сыйыхтар читірген. Оларның санында тоңастығларны чыырында иң пӧзік кӧзідімге читкен, «Ӧзімнер ӧскірері» номинацияның чиңісчілері «Сибирь-Агро» ООО-ның механизаторы Владимир Верин, «Бейское» ООО-ның механизаторы Антон Романов, «Целинное» ООО-ның комбайнёры Артём Латушкин.
«Маллар ӧскірері» номинацияда сыйыхтарға турысханнар пір інектең иң кӧп сӱт саап алған «Июс-Агро» ООО-ның інек сағӌаңы Любовь Рудакова, «Алтай» ООО-ның пызолар ӧскірӌеңі Ольга Глушкова паза пасхазы.
Аал хонии промышленнозы комплексінде кӧп чыл істен салған 12 тоғынӌаа Хакасия пазының алғыстазы читірілген. Пу сыйыхха турысханнарның санында: Шира аймаандағы «Мустанг» ООО-ның водительі Аркадий Ребонен, Боград аймаандағы фермер Андрей Стажков, Таштыптағы ветеринарлар станциязының мал имӌізі Людмила Харламова, «Асхыстағы племзавод» ООО-ның мал имӌізі Эльза Боргоякова, олох предприятиенің тракторизі Константин Токмашов, «Сонское» ООО-ның управляющайы Андрей Молоков, «Целинное» ООО-ның ӧӧн агрономы Юрий Ребриков паза даа пасхазы.
Хакасияның Ӧӧркі Чӧбіндегі аал хонии политиказынча, ас-тамахча паза чирнең тузаланарынча комитеттің кнезі Пётр Воронин республиканың аал хонии паза ас-тамах министрінің тоғызын толдырчатхан Александр Башковха чахсы тоғынған ӱчӱн Хакасияның Ӧӧркі Чӧбінің алғыстас пічиин читірген.
- Аал хонииның аарлығ ветераннары! Сірернің холыңарнаң Хакасияның аал хонии комплексі тӧстелген. Пӱӱнгі кӱнде сірер хыраларда, фермаларда істенчезер. Аал хонии тоғызына хынарға кирек. Анда уғаа кӱлӱк, кӱстенӌік кізілер тоғынчалар. Ӧӧркі Чӧп президиумының адынаң тоғыстарың ӱчӱн сірерге улуғ алғыс! - алғыстаан Пётр Воронин.
Аал хонии тоғынҷыларына Ағбанның чайаачы ӧмелері концерт кӧзіткеннер. Оларның санында спорт теелбегінҷе олған школазының ӧмезі, «Контраст» хореография ӧмезі паза пасхазы даа.
Аал хониинда тӱзімніг тоғынчатханнарға 18 - 100 муңар салковай ахчалығ сыйыхтар читірілген. Че иң артыхтарына республиканың аал хонии паза ас-тамах министерствозы «Лада-Гранта» автомобильлер сыйлаан. Пу аарлығ сыйыхха 10 кізі турысхан. Оларның санында «Бейское» ООО-ның директоры Ашот Манукян, «Сонское» ООО-ның толдырығ директоры Артур Гюнтер, идінчек Сергей Новосёлов, «Сонское» ООО-ның механизаторы Владимир Гельд, «Июс-Агро» ООО-ның механизаторы Анатолий Мальцев, «Андриановский» ООО-ның мал имчізі Любовь Кыстоякова, «Целинное» ООО-ның інек сағчаңы Валентина Гумбина, Ширадағы ветеринарлар станциязының мал имчізі Наталья Гетманенко.
Боград аймааның чуртағҷызы Любовь Кыстоякова аал хониинда 30 чыл тоғын салған. Ағбандағы аал хонии техникумын тоосхан соонда ол Сарығ хас аалдағы совхозта істенген. Совхоз изел парғанда, акционерлер пірігізінде тоғынған. Халғанҷы 10 чыл Любовь Николаевна «Андриановский» ООО-да зоотехник-селекционер полча.
- Мындағ аарлығ сыйых читірерлерін пір дее сағыбаам. Аал хонии министерствозына, хоных устағҷызы Владимир Анатольевич Андриановскийге паза хада тоғынчатханнарға улуғ алғыс! - теен Любовь Кыстоякова.
Амғы туста «Андриановский» ООО герефорд тӧлліг маллар ӧскірче. Хоныхта 700 азыра інек пар. Чӱс інектең чылда 92 % пызо алылча. Герефорд - итке ӧскірілчеткен мал. Пу хоных иң чахсы тӧлліг малларны ӧскірерінең айғасча.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 1 | 2 |
Кӱн таңмазы