ЧАХСЫ ӰРЕН - ПАЙ ӰРТӰН
11.09.2019
Хабарлар
Тоғыс чорығы. Пии аймааңдағы хыраҷылар иң пастағылар санында тоңастығларны кизіп пастапчалар. Ӱртӱн айының 5-ҷі кӱнінде тоғыс хайди парчатханын кӧр килген Хакасия пазы Валентин Коновалов
ПИИ АЙМАА ТОҢАСТЫҒЛАР ӰРЕНІН СЫҒАРЧАТХАН ПРЕДПРИЯТИЕЛЕРІНЕҢ САБЛАНЧА. РЕСПУБЛИКАДА ПУ КӦСТЕГӋЕ ТОҒЫНЧАТХАН ПРАЙ ДАА ПРЕДПРИЯТИЕЛЕР ПУ АЙМАХТА ОРНЫХЧАЛАР. ХАКАСИЯ ПАЗЫ ВАЛЕНТИН КОНОВАЛОВ ТЕЕСТЕГІ ТОҒЫС ЧОРЫҒЫНДА «БЕЙСКОЕ» ООО-да, УСТАҒӋЫЗЫ АШОТ МАНУКЯН, ПАЗА ВИКТОР БАУЗЕРНІҢ ХОНИИНДА ПОЛ КИЛГЕН. ЧООХТИРҒА КИРЕК, ПУ ХОНЫХТАРНЫҢ ХЫРАЛАРЫ ПИИ АЙМААНЫҢ ИЛЕЕДЕ ААЛ ЧӦПТЕРІНІҢ ЧИРЛЕРІНДЕ ОРНЫХЧА. ПЫС ПАРҒАН ТОҢАСТЫҒ ХЫРАЛАР ЫРАХТЫН САРҒАЛЧАЛАР, ЭЭЛЕРІН ТАМАХТЫ ЧЫЫРҒА МАҢЗЫРАТЧАЛАР.
Хоныхтарның пірсі - «Бейское» пӱӱл олар 5000 гектар хыраның 3400 ООО - он азыра чыл тоғын парир. Пу гектарында аймах культуралар таарып салғаннар, ол санда 500 гектарда кӧк азыралға от ӧскірілген. Тоңастығларны кизіп пастирға кӱн пирбинче. Итсе, пиидегілер республикада тамах чыырын прайзынаң пурун пастапчалар. Пӱӱл орғах айының халғанӌы неделязындох алтын пазахтығ культураларны кизіп пастаан ползалар даа, пӱӱнгі кӱнге 200 гектарда ла сула кизіл парған. Чахсы кӱн турбинчатханда, тоғыс айныдылбинча. Олох туста хыралар ээзі тамах чахсы сыхханын чазырбинча. Кӧзідімге, чыылған сула гектардаң 30 центнер алылчатханын кӧзіткен. Пуғдай даа пай сығарын аның узун паза толдыра пазахтары киречілепче.
- Піс тӧртінҷі чылы Алтайдағы-75 пуғдайны одыртчабыс. Пу сорт уғаа чахсы салтарлар пирче. Пір ле сидіксініс - ол позік ӧс парчатханнаңар пірее орыннарда чадыбысча, - таныхтапча предприятие устағӌызы Ашот Манукян. - Кизербіс. Кӱнне тур пирзін...
Чахсы кӱн тоңастығларны кизерінӌе улуғ паза нандырығлығ тоғыста ӧӧні полчатханына ідӧк хайығ айландырча Хакасияның аал хонии паза ас-тамах министрі Сергей Труфанов. «Наңмырлығ кӱннер хыраӌыларға тоғысты толдыра кӱснең апарарға пирбинче, - тіпче ол. - Пӱӱнгі кӱнде хоных кӱскӱ хыра тоғыстарына толдыразынаң тимде: тоғынӌылар, техника, аңмарлар паза тамах хурутчаң тиріг - прай ниме тимде. Амды чахсы кӱн не сағирға халча».
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде