ААЛЛАР ЧУРТАЗЫНА НАА ТЫНЫС
18.08.2021
Хабарлар
Нацпроекттерні - чуртасха.
Хакасияның культура министерствозының кӱстенізінең пістің республикадағы илееде культура учреждениезі нааңыли тыхталча. Халғанҷы туста Хакасияның улуғ даа, кічіг дее аалларында ӱлӱкӱн-пайрамнар иртчеткені таныхтал сыхты. Анзы, федеральнай синдегі «Культура» национальнай проекттің аймах кӧрімнерін чуртасха киріп, аал чуртағҷыларына ӧрініс сыйлапчатханынаң палғалыстығ.
Кӧзідімге алза, Орджоникидзе аймаандағы Оспа аалның Культура туразын нааҷыли тыхтирында тоғыс хыызында парча. Пӱдірігҷілер иргі тураның хырын чардыхти алыстырыбысханнар, ағас кӧзенек рамаларын ходырып, пластик кӧзенектер турғызыбысханнар. Ідӧк ағас полның орнына халын, пик фанера тӧзелген, аны ӱр чылларға сыдасчаң ӧнетін линолеумнаң чабысханнар. Стенелерні, тізең, чылығ тутчатхан гипсокартоннаң тыыдыбысханнар. Амды потолокты «Армстронг» материалнаң чаапчалар паза чарытхыны алыстырчалар.
Оспа аал чӧбінің пазы Хакасияның культура министерствозынзар сурыныс пічиин тимнеп салған. Анда орындағы культура туразында материально-техническай базаны чахсылаңдырардаңар чоох парча. Кӧзідімге алза, андағы аппаратура 2009 чылдох алылғаны таныхталча. Кӧрігҷілер залындағы одырчыхтар 1974 чылдаң сығара тузаланыста, оларны сыбыра тыхтирға килісче. Аннаңар даа Оспа аалның чуртағҷылары культура туразы нааҷыли тыхталған соонда тузаланысха пирілерің чидікпиң сағыпчалар. Андада ӱлӱкӱн пайрамнарны пӧзік синде иртір турҷаң чахсы оңдай пар полар. Кізілер хынып чыылыс турарлар.
Таныхтирға кирек, олох Орджоникидзе аймаандағы Майрастар аалының Культура туразын тыхтир тоғыстар 2010 чылдох пасталған. Че аның салтары харахха іди ле тасталбаҷаң. Хайди тидірлер, пір орында нааҷыли тыхтап салза, пасха орында иргілен парча, тузаланыстаң сыхча. Андағ даа полза, ирткен тустың аразына кӧп тоғыс иділ парған. Іди орындағы культура туразының хыры алыстырылған. Ағаа хоза, кӧзенектерні, ізіктерні, полны, электропроводканы ӧӧнінде прай нааҷылабысханнар. Культура туразының тасты чарых сырларнаң сырлалған, кізілер хайиин тарт сыххан. Чылығ пирчеткен системаны, иргі хазаннарны прай алыстырыбысханнар. Наа аппаратура, светомузыка, мульти-проекторлар, ңоутбуктар паза даа пасха нимелер алылғаннар.
Че 2010 чылда пасталған тыхтағ тоғыстары пӱӱл майда ла тоозылғаны таныхталча. Анзына федеральңай сиңде иртірілчеткен «Культура» национальнай проектте чиңіс тутханы маңат хабасханын прайзы даа оңарча. 2020 чылда Майрастар аал чӧбі паза Орджоникидзе аймаа администрациязының культура, чииттер паза спорт управлениезі федеральңай сиңдегі «Культура» нацпроектте аралазарға сурыныс пічиин килістіре тимнебіскеннер, таллағны ирт парыбысхаңңар.
Амды Майрастар аалының Культура туразы пайрамнығ 60 чылын таныхтирға тимненче. Нааҷылалған культура туразынзар
пайрамнирға аалҷыларны пӱӱл декабрьда хығырарға пӧгінчелер. Аал чуртағҷылары, культура тоғынҷылары аалҷыларны турыстығ удурлирға кӧнік парғаннар.
Хакасия федеральңай сиңде иртірілчеткен «Культура» национальнай проектте тӧреміл араласча. Іди ол пӱӱл кӧп функциялығ автоклубтар алып аларға субсидия утып алған. Андағ пір автоклуб пӱӱл июльда Асхыс аймааның культура управлениезіне пирілген. Анда пӱӱнгі кӱнге килістіре мультимедийнай аппаратура пар. Аны тузаланып, ойыннар кӧзідерге, концерттер турғызарға, хоос фильмнер кӧріп аларға чарир.
Пу чылның сентябрь-октябрьында андағ 3 автоклуб Хакасиязар чидер. Ахча тӧлел парған, че Санкт-Петербургтағы завод автоклубтарны тузында сығарарға маңнанмин салған. Олар килзе, Ағбан пилтірі, Боград паза Шира аймахтарының культура управлениелеріне пирілерлер.
Хакасияның культура министерствозы «Культура» ңацпроекттің салтарлары чуртасха хайди кирілчеткенін сыбыра сыныхтағда тутча.
Автор :
Тимнеен Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде