СӰТТЕҢ ТИМНЕЛГЕН ИҢ АРЫҒ, ИҢ ТАТХЫННЫҒ АС-ТАМАХ
10.03.2017
Хабарлар
Хакасияның пазы Виктор Зимин тоғыс чорығынаң Саяногорскта пол килді. Ол сӱт ас-тамаан сығарчатхан «Саянмолоко» ОАОда тоғынҷы-ипчілерні алғыстаан. Чоохтирға кирек, «Саянмолоко» ОАО-да 680 тоғынҷы саналча, оларның ӧӧн чардығы - ипчілер. Тоғынҷыларға пӱӱнгі кӱнге килістіре оңдайлар тӧстелген: наа оборудование, автомат машиналар, тынағ орыннары, пӧзік чал ахчазы. Аал хонии ас-тамаан сығарчатхан предприятие тилізіне улуғ хайығ салча устағҷы Валерий Левицкий. Аннаңар даа ол республика пазы Виктор Зиминні сӱт, кефир, йогурт, сыр сығарҷаң цехтарның тоғызынаң позы таныстырған.
Пӱӱнгі кӱнде «Саянмолоко» компания «Агросибком» компаниялар ӧмезіне кірче, хайдар ідӧк 10 аал хонии предприятиезі кірче. Агрохолдинг 45 муң пас мал тутча, ол санда 14 муң саалчатхан інек. «Саянмолоко» компания республикада сӱтнең тоғынчатхан иң килкім предприятиелернің пірсі полча. «Піс арығ, чахсы паза татхыннығ ас-тамах сығарарға кӱстенчебіс, - чарытча Хакасия правительствозының делегациязына ӧӧн технолог Ольга Задорина. - Тиктең нимес пістің ас-тамаабыс Сибирьдегі аймах марығларда сыйыхтығ орыннарға турысча. Пӱӱнгі кӱнде піс сӱттең мороженай паза олғаннар чіҷең нимезін не сығарбинчабыс, пасха ас-тамах прай сығарылча».
Ол арада Валерий Левицкий Хакасия пазы Виктор Зиминге ӱр хайраллалчатхан сӱт хайди тимнелчеткеннеңер чоохтапчатхан. Устағҷы технологияларны пілчеткені кемні дее чӧпсіндірче сағынчам. 1983 чылда, тізең, предприятие тоғызы сӱттең тимнеен нинҷе-де ле ас-тамах сығарызынаң палғалыстығ полған. Чыллар табырах учуға халғаннар, оларнаң хада предприятие ӧскен. Амды предприятиеде сӱттең аймах ас-тамах тимнелче. Пір кӱнде олар 200 тонна сӱттең ниме-ноо сығарчалар, чайғыда, хаҷан сӱт саары хозыл парза, предприятие 400 тонна сӱтнең тоғынча.
- Пістің улуғ поғдархазыбыс сыр сығарызы полча, - чоохтапча Валерий Анатольевич, сыр сығарҷаң цехсар чол тудып. - Піс ікі аймах «Моцарелла» сығарчабыс, аннаң пасха, піссер пасха даа саблығ сырларны сығарарынаңар айланчалар. Сағам чӧптезіглер парча.
Ӧӧн технолог Ольга Задоринаның чооғынаң, компания 10 азыра аймах сыр сығарча. Ӱрілген сыр парох. В.А.Левицкий республика пазына сырны тимнирі хайдаң пасталчатханынаң пасти хайда тоозылчатханына теере кӧзіткен. Мындох эҷігей садыға тимнелче. Пастағы оборудованиеде оператор Наталья Калинина эҷігейні формаа саларға тимнепчеткен. Аның холлары табырах тоғынчатхан, кӧрінче, ипчі мында хаҷаннаң істенче. Наталья Юрьевна эҷігейнің суун сыға пасчатхан, оборудование аны аннаң андар формаларға салча.
- Алғыстапчам сірерні, - айланған Виктор Михайлович цехтарҷа экскурсия соонаң улуғ нимес залда чыылған ипчілерзер. - Иң пастағызын, сірернің мындағ устағҷы парынаң! Ол тӧстеен иң артых, арығ сығарыстарның пірсін, хайзы Хакасияның бренді, тиліс орны полча. Валерий Анатольевич, алғыс Сірерге коллективті, ідӧк городта чуртас оңдайларын тӧстепчеткен ӱчӱн. Олох туста, аарлығ ипчілер, сығарыс тоғызы сірернің иңніңерге артылған, аннаңар мин сірерге иң чахсы чуртас алғапчам.
Пу сӧстернең республика пазы Виктор Зимин ипчілерге сыйыхтар читіріп пастаан. Руфина Григорьеванаң Елена Бурацкая «Трудовая доблесть Хакасии» медальларға турысханнар, Светлана Болта, Елена Казанцева паза Наталья Пархоменко - Хакасия пазының алғыстас пічиине. Хада тоғынчатхан ӧӧрелері оларнаң хада ӧрінчеткеннер. Пайрамнығ тоғазығ Хакасия пазынаң хада сомға суурынғанынаң тоозылған.
Валерий Левицкийнің чооғынаң, предприятиеде істенчеткен ипчілернің Наа чыл даа, 8 Март таа ӱлӱкӱннері чоғыл. Мында тоғыс хараа-кӱнӧрте, тынағ чох парча, прайзы пір інекнең, «Семёнишнанаң», пик палғалыс парған. Устағҷы предприятиее, палазына чіли, сизіктіг, улуғ хыныснаң хайча, аны тилідерінеңер, ӧскірерінеңер сағыссырапча. Пӱӱнгі кӱнде предприятиенің тоғызын алғыдарынаңар наа сағыстар тӧріпче, ол санда олғаннар чіҷең нимезін сығарары кӧрілче.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде