ХАКАСИЯНЫҢ КОМАНДАЛАРЫН ЧЕЕСТЕЕННЕР
05.04.2017
Хабарлар
Ирткен неделяда Ағбанда Олимп резерві училищезінде меспектіг хоккейҷе марығларның 2016-2017 чыллардағы салтарлары иділген.
Мероприятиеде «Саяны» команданың тренерлерін паза спортсменнерін алғыстааннар, Хакасия чемпионадының паза первенствозының иң чахсы хоккеисттеріне паза командаларына сыйыхтар читірілген. Хакасияның чемпионады паза первенствозы пӧзік синде ирткен. Аның тӧстегҷізі - «Саяны» спорт школазы. Мероприятиеде Хакасия пазы администрациязының устағҷызы Валерий Денщиков, Хакасияның спорт министрінің тоғызын толдырчатхан Виктор Струков, Хакасияның меспектіг хоккейҷе федерациязының президенті Юрий Шпигальских, «Саяны» спорт школазының устағҷызы Александр Колесников, «Саяны» команданың тренері Евгений Баженов, сыныхтағ чӧбінің кізілері араласханнар.
Хоккеисттерні алғыстирға Валерий Денщиков сыххан. Аның чооғынаң, амғы туста хоккейге Хакасияда улуғ хайығ салылча. Пу спорт кӧрімінде кӧп сидіксініс пар. Че республикада ойыннар чахсы ирткеннер. Хакасияның чемпионадында сигіс команда араласхан, республика первенствозында - читі команда, кубок мариинда - 15 команда. «Саяны» клубтың спорт школазы 10 мероприятие иртірібіскен, городтың спорт школазы - тӧрт мероприятие, Ағбан пилтіріндегі школа - ікі мероприятие. Анда кічіг спортсменнерге устарын тилідерге оңдай полған.
Улуғ частығ спортсменнер дее хоккей ойнапчалар. Пу наада «Кубок вызова» марығ ирткен. Анда Хакасияның піріктірілген командазы «Саяны» команданаң ойын иртіргеннер. Россия чемпионадында пӧзік лигадағы командалар аразында «Саяны» ӱзінҷі орынға сыххан.
Хакасияда хоккей тилир ӱчӱн наа пӧгіннер турғызылған, кӧп олған хоккей секциязына килерге кирек, муниципальнай пӱдістерде тренерлернің хоза ставкалары кирілер паза суғ чайҷаң машиналар пирілер.
- Оңдай киліскенде, мин ветераннарға алғызым читірчем, - чоохтаан Валерий Денщиков. - Сірер хоккей тилізіне улуғ хозым итчезер.
Чыылысхан чон Ағбандағы «ДЮСШ-2005» команданы удурлаан. Ирткен сезонда «Плетеный мяч» марығда команда чиңіс тутхан. Аның тренері Игорь Лопухин полча. Аннаң пасха олғаннар Москва паза Россия патриархының сыйыхтарына марығда ӱзінҷі орынға сыхханнар. «Саяны» спорт школазының устағҷызы Александр Колесников олғаннарға чапсых наукалар музейінзер чӧр килерге оңдай пирчеткен сертификат читірген.
Анаң Хакасияның первенствозында сыйыхтығ орыннарға сыххан командаларны чеестееннер. Командаларны алғыстирға Виктор Струков сыххан. Аның чооғынаң, халғанҷы чылларда олған хоккейі тиліпче. Че ам даа кӧп ниме идерге кирек. Пір алай ікі чыл ирт парза, олғаннар чахсы хоккеисттер поларлар. Оларның піреезі «Саяны» командазар кірер. Хакасияның первенствозында ӱзінҷі орында «ДЮСШ-2002» команда пол парған. Тренер Юрий Тимофеев полча. Ікінҷі орында - «Тасхыл» (Асхыс) команда. Аның тренері - Алексей Чистогашев. Хакасия первенствозының чиңісчізі «Полярник» (Ағбан) пол парған.
Хакасияның чемпионадында ӱзінҷі орынға «Университет» команда турысхан. Команда тренері Роман Галеев полча. Ікінҷі орынға - «Энергия-СШГ-ЭС» (Нымырттығ пос.). Команда тренері Сергей Кохачев полча. Хакасияның чемпионы - «Подсинее» команда, тренер Евгений Тудвасов полча. Командаа кубок паза алтын медальлар читірілген.
Ідӧк чемпионаттың паза пер-венствоның иң чахсы хоккеисттері сыйыхтатханнар. Халғанҷызын сценаа «Саяны» команданың хоккеисттері паза тренерлері сыхханнар. Ирткен сезонда пӧзік лигада команда ӱзінҷі орынға сыххан. Команданың полузащитнигі Максим Василенко финал ойыннарының иң чахсы хоккеизі полыбысхан. Команданың хаалха хадағҷызы Артем Стародид паза защитнигі Матвей Азаренко, Белоруссияның піріктірілген командазына кіріп, тилекей чемпионадында араласханнар. Группа ойыннарында «Саяны» 28 ойында 26 чиңіс тутхан. Хоккеисттерні Юрий Шпигальских алғыстаан.
- Пӱӱн піс хоккей ӱлӱкӱнін таныхтапчабыс, - чоохтаан Юрий Александрович. - Пістің республикада кӧп кізі хоккейнең айғасча. Клюшкалығ палаларны кӧр салып, полған на кізі ӧрінче полар. Пістің олғаннарыбыс Россия чемпионы полчалар . Олар паза «Саяны» команда республиканы сабландырчалар. Сірерні чиңіснең алғыстапчам.
Пу тоғазығда ідӧк «Саяны» спорт школазы алғыстас пічіктерін чиңістер тударына улуғ хозым иткен кізілерге читірген.
Автор :
Антон ТОПОЕВ
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде