ПАРЫСТАҢАР ТУЗЫНДА ИСКІРЕРГЕ
14.04.2017
Хабарлар
Федеральнай налог службазының Хакасияҷа управлениезінде парыстарҷа декларация кампаниязына чарыдылған пресс-конференция ирткен.
Аны управление устағҷызының орынҷызы Людмила Мехнина паза олаңай кізілернің парыстарына паза ис-пайына налог саларынҷа пӧліктің пастығы Татьяна Грудева иртіргеннер. Хайди таныхтаан Людмила Мехнина, олаңай кізілернің парыстарының налогы чал ахчазынаң тудыл халча. Че хай пірее киректерде олаңай кізее парыстарынаңар сан пирісті 3-НДФЛ оңдайынаң позына пирерге килісче. Ӱс чылдаң асхынах тузаланған ис-пайны паза 5 чылдаң асхынах тузаланған тибіреділбинчеткен ис-пайны садыбысхан, алған кізілер парыстаңар декларацияны хайди даа пирчелер.
2017 чылдағы декларация кампаниязы мындағ оңдайҷа иртче. Налог агентінең налог тудылбаан полза, андада НДФЛ-ҷа сан пиріс пирілбинче. Амды олаңай кізі налог органынаң ызылған искірігні (уведомление паза квитанция) алған соонда ла налог тӧлир. Мындағ налогты 1 декабрьға теере тӧлебізерге киректелче. Мындағ правилолар 2016 чылда алылған парыстарға теелчелер.
2016 чылның 1 январьы соонаң олаңай чонның садылған тибіреділбинчеткен ис-пайының парыстары наа оңдайҷа саналар. Тибіреділбинчеткен объект садыл парза, аның парызы сын паазынаң илееде тӧбін полза, НДФЛ аның кадастр паазынҷа саналча (ол 0,7 коэффициентке хаталча).
2016 чылда чуртты арендаа пиріп, тибіреділбинчеткен паза тибіреділчеткен ис-пайны сыйыхха алып алай лотереяҷа ахча утып алған кізілер парыстаңар сан пирісті пӱӱл 17 июльға теере пирерге киректер. НДФЛ-ҷа декларацияны паза налогты тузында пирбееннерге штраф салылар. Декларацияны тузында пирбееннерге штраф сині - тӧлелбеен налогтың 5 процент полған на айның ӱчӱн. Че ол штраф налогтың 30 процентінең аспасха кирек паза 1000 салковайдаң асхынах нимес полар.
Декларацияны 2017 чылның 2 майына читіре пирібізерге кирек. Че пу тус налог синін хызырар оңдайларына теелбинче. Оларны чыл ибіре пирерге чарир. Кӧзідімге, 2014 - 2016 чылларда автошколада, ӱгредіг учреждениелерінде ӱгренген ӱчӱн хорадығларның чардығын пӱӱл чыл ибіре айландырып аларға чарир.
Людмила Мехнина декларацияны тимнир оңдайларынаңар чарыда чоохтаан. Оларның пірсі - налог тӧлепчеткен кізінің личнай кабинедінде декларацияны тимнирі. Олох личнай кабинеттең сығара декларацияда электроннай оңдайнаң хол салып, налог органынзар ызыбызар оңдай пар. «Декларация» компьютер программазы полызиинаң сан пирісті тимнебізерге чарир. Ол программадаңар налог инспекциязының www.nalog.ru сайтында піліп аларға чарир. Налог инспекциязынзар посха килерге тус чох полза, декларацияны почтаҷа ызыбызарға чарир.
2015 чылның салтарларынҷа, пылтыр 39 муң налог декларациязы пирілген, ол санда ис-пайны сатхан 7,5 муң олаңай кізілернің декларациязы. Пӱӱнгі кӱнде 15 муң налог декларациязы пирілген. Ирткен чылларнаң тиңнестірзе, пу хомай нимес кӧзідім полча.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде