ЧИИТТЕРГЕ ЧАХСЫ КӦЗІДІМ ПОЛЧАЛАР
31.05.2017
Хабарлар
Хырығлар хадағҷылары - пограничниктер - чыл сай сілкер айының 28-ҷі кӱнінде чыылызадырлар. Мин армиядаң ибзер хысхыда айланғам, анаң часхыда Чоғархы Асхыста ирткен хырығ хадарғаннарның тоғазииңда араласхам. Ол полған 1973 чылда. Пӱӱл, тізең, от кӧк пӧріктіг ооллар пазох Асхыстағы мемориал паркы хыринда чыылысханнар.
Ол син чыл тоғазып, прайзы удур-тӧдір чахсы таныс. Мына частан парған пограничниктер: Николай Егорович Топоев 1960 чыллар пасталчатханда Финляндия хыриндағы хырығларны хадарған, Владимир Николаевич Ненашев 1966 чылда армияа хабылған, Сахалин олтырыхта служба ирткен. Паркта мемориал ханазынзар венок салғаннар. Ооллар, чиит тустағы чіли, стройнаң парғаннар. Ам даа стройнаң чӧрерге ундутпиндырлар.
«Боевой расчет» соонда, пограничниктерні алғыстап, Асхыс аймааның депутаттар чӧбінің кнезі Владимир Михайлович Зимин чоох тутхан. Ол армияда служить полған ооллар, ӧӧнінде пограничниктер, чиит тӧлні ӱгредерінде улуғ тоғыс апарчатханын таныхтаан. Илбек Чиңіс кӱнінде чон алнында оларның стройнаң иртчеткеннері уғаа хандыра кӧрінче. Асхыс паза Таштып аймахтарының чааҷылар комиссары Сергей Васильевич Кибирёв чоох тутхан. Пу пайрамнығ чыылығны апарған Асхыс аймааның администрациязының чииттер пӧлиинің устағҷызы Ольга Фёдоровна Бытотова. Полтах аалның чуртағҷызы Юрий Чочиевтің Валентин пархаҷағы, чон алнына сығып, чарлаан: «Минің пабам паза ағам пограничник полғаннар, мин дее пограничник поларбын». Туңмазы Радион мындох хости чӧрген. Оларны истіп, чыылысхан чон ӧрінчеткен.
Анаң ооллар машиналарға одырғаннар, алныларында УАЗ машина парған, олох машинаа пограничниктер флагын хыс салғаннар. Прайзы олтырыхсар парған. Андағы стадионда аймах марығлар иртірілген, ол арада хазанда иттіг чиис пызырылған.
Автор :
Михаил Идимешев
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде