КӦРІГҶІЛЕРНІҢ ӦРІНІЗІ
18.12.2018
Хабарлар
Меспектіг хоккей. 14-15 декабрьда Ағбандағы «Саяны» команда позының айғызында Ыраххы Востоктағы Арсеньев городтаң килген «Восток» команданаң теестегі тоғазығларын иртірді.
Пістіңнер ибде ойнапчатханда, тоғазығ хайди парарын кӧріп аларға, чир-суғҷыларыбысты чиңіске кӧӧктірерге городтың ӧӧн стадионынзар кізі кӧп чыылысхан тиирге чарир. Анзын пасха ойыннарнаң тиңнестірзе . Кӱн дее килістіре чылығ арах тур пирген. Аннаңар иргі таныс-нанҷылар, ирте арах киліп, хынығ чоох-чаахнаң одырғлапчатханнар, чир-суғҷыларыбыс ибде хайди даа чиңіс тударға кирек тіп чарасчатханнар. Че хайдағ саннаң ойын тоозылары - кӧрігҷілернің аразындағы ӧӧн чоохтазығ.
- «Восток» пӱӱл пір дее полынминча... Хаҷан-да, піссер киліп, утып таа алӌаң полбады ба, - ӱлесчелер сағыстарынаң олар.
Сынап таа, аалҷыларның киректері пӱӱл чахсы ла нимес. Пістің подгруппада ол халғанҷы орында, пір дее чиңіс тутхалах. Спортта андағ тус поладыр, хаҷан «хара кӱннер» пасталыбысчалар. Пістіңнернің, тізең, кӧзідімнері прайзын ӧріндірче. Сағам «Саяны» пастағы орында. Аннаңар кӧрігҷілер дее ачых-чарых кӧңніліглер.
- Пӱӱн пістіңнерге хатығ чуххадағ.... Че-е, тӧлкеленіп одыр мында, - хызыл меспектең харах албинчатхан туста сағыстарынаң ӱлезерге маңнанчалар ойын кӧрерге килген кізілер.
Сынап таа, тоғазығ пасталғаннаң пис минутаҷа ирт парды, че пір дее гол кирілгелек. Ибде ізестіг утарға киректелче. Аннаңар пістіңнер пірее хати прай команданаң алнынзар парчалар, удур-тӧдір чахсы пілізіп ойнапчатханға тӧӧйлер, че гол кир полбинчалар. Аалҷылар уғаа маңат арачыланчалар тиирге сидік, чир-суғҷыларыбысха оң полбин парча. Пірде, меспек хаалха хыринҷа учуға халча, пірде, аны Александр Дубровский тудып алча. Александр Дубровский -«Востоктың» хаалха хадағҷызы.
Евгений Ткачукты «Саяны» команданың капитанына тиктең не таппиндырлар. Пасхазына кӧзідім полып, ол пастағы гол кирібіскен. Кӧрігҷілерібістің ӧрінізі тоозылғалахта, саннар тиңнес чӧрібіскеннер.
Пістіңнерге Максим Бовт гол кирібіскен. Мында иң не ачырғастығ - Максим «Саяны» командада ойнаан. Пірдең, хомай нимес тимненіс кӧзітчеткенін прайзы даа таныхтаҷаң. Аннаңар, «Саяны» команданаң чӧптезіг тоозыл парғанда, аны сала даа ікінҷілес чох «Востоксар» хығырып алғаннар.
Ойынның пастағы чардығы 3:1 саннаң тоозылған. Михаил Селедковнаң Александр Захваткин пірер гол кирібіскеннер. Сынап таа пістіңнерге прай устарын кӧзідер оңдай пирбеділер аалҷылар. Мында сала даа ікінҷілес чох хаалха хадағҷызы Александр Дубровскийні махтирға кирек. Ол кӧп хати командаа туза иткен, саннар кӧптелер оңдай пирбин турған, позынын пӧзік узын кӧзіткен.
Пятница кӱндегі тоғазығ 5:3 саннан тоозылған. Пірдең, аалҷылар халғанҷы голны, ойын тоозылчатханда, кирібіскеннер. Пістіңнер анзына харығ поларға тын даа хараспаан чіли тудынғаннар. Хайдағ даа полза, чиңіс пісти нооза. Саннар паза алыспас тіп сағынған поларлар, неке.
Саңай пасха оңдайнаң ирткен суббота кӱндегі ойын. Кӧрігҷілер дее саны илееде хозылтырҷых. Тынағ кӱні нооза. Аннаңар даа, неке, сӧбірелерінең хада килген кізілер кӧрінчеткеннер. Кічіг палалары анда-мында чӱгӱріс чӧрчеткеннер. Ол туста паба-іҷелері, пістіңнерні чиңіске кӧӧктіріп, оңнығ ла хысхырыспинчатханнар, саңай ӱннері харылғанҷа аахтасчатханнар. Сым турчатхан алай одырчатхан кізіні стадионда кӧр табарға сидік полған.
Хайди ӧрінмес, хаҷан Александр Захваткин пірсі пірсінің соонаң ікі гол кирібіскенде. Ӱзінҷі паза тӧртінҷі минуталарда ол махтаға сыххан. «Че-е, чиңіс пісти... Ойын килісчеткенге тӧӧй...» - чоохтасчалар кӧрігҷілер. Кізілернің кӧңні уламох кӧдірілген, хаҷан «Саяны» команданың хаалха хадағҷызы Сергей Саблин 12 метрдең сабылған пенальти-буллитті тудып алғанда.
Пірдең, хайди сіліг, махалығ сегірді хаалхазын арачылап. Соонаң даа Сергей махтаға сых турған, маңат тимненіс кӧзіткен.
Пістіңнернің ӧктемненчеткенін кӧмес тохтадарға харазып, «Восток» команда тайм-аут алча. Че анзы аалҷыларға сала даа туза ағылбинча, уламох пістіңнернің кӧңнін кӧдірче. Іди айғы ээлері ойынның пастағы чардығы тоозыларына орта сигіс гол кирібіскеннер. Ырах чол тобырған аалчыларзар кӧрерге айастығ пілдірген - саңай алаң асхан осхастар. Кирек піди ле парза, тоғазығ хайдағ ла саннаң тоозылар ни? Александр Захваткин не ӱс гол кирібісті, Михаил Селедков - ікіні. Руслан Гавричков, Константин Жаданов паза Николай Верещагин пірер хати махтаға сыхханнар. Команда капитаны Евгений Ткачук оларға чахсы пас пир турған, улуғ тимнегліг тоғыс апарған. Аны ідӧк махтааннар.
Тоғазығның ікінҷі чардығында «Саяны» команданың ӧӧн тренері Евгений Ерахтин хаалха хадағҷызы Владислав Атапинге ойнап алар оңдай пирген. Ол даа маңат тимненіс кӧзіткен, позының хаалхазынзар пір дее гол кирдірбеен. Хоккеисттер санынаң Михаил Селедков махтаға сыххан. Ол ікі гол кирібіскен. Николай Верещагиннең Руслан Гавричков пірер гол киргеннер. Іди айғы ээлері 12:0 саннаң чиңіс тутханнар. Амды пістіңнернің 21 сан пол парды, олар подгруппада пастағы орындалар.
Аалҷыларны тың на хомайлирға чарабас. «Восток» команда піс-тің подгруппада прайзының улуғ частығ командаа саналча. Ол 1932 чылда тӧстелгеннеңер искірілген. Меспектіг хоккейче Россия чемпионадының пӧзік лигазында сыбыра ойнапча. Мының алнында ол пістің командаа хайдағ-да «изі чох» ыырҷаа» саналҷаң. Позының айғызында полардаң, Ағбанзар даа киліп, пістіңнерні утып алчаң.
Теестегі ойыннарны чир-суғҷыларыбыс ідӧк позының айғызында иртірерге тимненчелер. Ағбанзар «СКА-Нефтяник-2» команда килче. Тоғазығ 18-19 декабрьда иртер. Ойын 19.00 часта пасталар. Кірері тикке.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы