ЧИҢІС ТУДАРЫ ООЙ ПОЛБААН
19.12.2018
Хабарлар
Чоннар ынархазы. Россия Федерациязының Конституция кӱнін таныхтап, Хакасияда чуртапчатхан аймах нациялығ чоннар аразында спорт пайрамы ирткен. Анда республикадағы чоннарның читі аймах халыхтар пірігізі араласхан.
Аймах-пасха тілліг чон 16 декабрьда «Ағбан» спорткомплексте чыылысхан. Ортын Азиядаң піссер киліп, хаҷаннаң мында чуртапчатхан чон алынҷа пастырыс чӧрче. Кавказ чирінең килген улус хаҷан даа поохти тудынарға кӧнік парған. Хайзылары даа постарының тӧреен тілінең чоохтасча, пойли тудынча.
Анзы за оңарылыстығ. Россия Федерациязының Конституция кӱніне чарыдылған спорт пайрамы Хакасиядағы аймах тілліг чоннарны піріктірер, ынархастырар ӱчӱн иртірілче нооза. Аннаңар даа прайзы мында ибдегі ле чіли пойли тудынча. Спорттың пірее кӧрімінең хада айғасчатханнар удур-тӧдір чахсы таныстар. Ол даа сылтағнаң, неке, суум-саам ӱр нимеске дее тохтабинчатханға тӧӧй.
- Спорт пайрамына кӧп кізі хығырған полғабыс. Илеедезі кил полбаан, - таныхтапча спорт марығларының ӧӧн чарғыҷызы Николай Свириденко.
Николай Александрович хаҷан даа ачых-чарых кӧңніліг поладыр. Прай чирде маңнанарға харасча. Мына ол кореецтернең чоохтас турча. Оларға ағаснаң тартызар марығның оңдайларынаңар піліп аларға кирек. Аннаңар марығның ӧӧн чарғыҷызы позынзар полысчыларының пірсін хығырып алған, кореецтерге полыс пирерге чахаан. Анзы марығ оңдайларынаңар чоохтапча, кӧзітче. Анаң ікі оолны тренировка иртірерге хығырча. Чахсы даа тимненерге маңнанғалахта, пір кореец нанҷы-зын позынаң азыра тастабысты. Хара пасхаҷыл кирек, оларның хайзы даа ағасты холдаң позытпиндыр.
Спорт ӱлӱкӱні пасталар алнында мині мына ниме чапсытхан - урух тастир орында кізі кӧп чыылыс партыр. Таджиктер, узбектер, хырғыстар сыра пазында ілілген, фанерадаң тимнелген ат пазына урух тастирға ӱгренчелер. Пір дее киліспинче. «Алай ат прай тӱрктернің чағын полысчызы паза нанҷызы нимес пе?!» - теен чіли, хырғыс оол урух тастапча. Че арғамҷызы холындох путхал парған. Аннаңар пірее хакас кізі оларны урух тастирға ӱгредерге кирек полған. Улуғ хомзынысха, чир-суғҷыларыбыс аразынаң андағ ус табылбаан.
Хакас ооллардаңар чоох парыбысханда, пістің чоннын туюх хылиин таныхтирға кирек. Сынап пасха тілліг чоннарның алып-кӱлӱктері «Ағбан» спорткомплекстің істінде ипти ле пастырыс чӧрчеткенде, оларның аразында чир - суғҷыларыбыс кӧрiминчеткеннер дее. Пасхазы, кирек полза, марығ чарғыҷызынаң талазарға тимде турыбысчатса, хакас ооллар сах андох хыйа пастыра халчалар. Піреезін марығда араласчатханын паза кӧрбессің дее.
Таныхтирға кирек, прай даа марығлар пістің чоннын пурунғыдаң хайраллал халған спорт кӧрімнерінче ирткеннер. Аннаңар чир-суғҷыларыбысха прай даа арға-мӧрійде ӧткін аралазарға, постарының соонҷа пасхазын кӧӧктірерге кирек полған. Хакастарның «Аран Чула» паза «Асхыр» халых пірігістері араласханнар.
- Хакас кӱрезiнде паза тобит мариинда кізі кӧп араласхан. Анзын спорттың пасха кӧрiмнeрнең тиңестірзе, - чоохтапча марығның ӧӧн чарғыҷызы Николай Свириденко.
Николай Александровичтің сӧстерінең, спорт пайрамында 110 кізі араластыр. Че оларның илеедезі постарының кӱстерін паза устарын спорттың пасха даа кӧрімнерінде сынаптыр. Ол даа сылтағнаң пірее туста тохтағлар пол парчатханға прайзы даа хайығ айландырған, неке. Анзы пірдеезінің кӧңнін тӱзірбеен. Сынап пастағы туста марығ спорттың 6 кӧрімінҷе иртер тіп чарлалған полза, сала соонаң ағаа арғамҷынаң тартызары хозылған. Пу арға - мӧрійде халыхтар пірігістерінің командалары аралазарға кирек полғаннар. Дартста, тізең, пастыхтар паза халыхтар пірігістерінің устағҷылары ла устарын сынааннар.
Амды, хайдағ спорт кӧрімнерінде аралазып, чиңістер тутханнарнаң таныстырчабыс:
Урух тастиры - Геннадий Матвеев, чуваштарның «Пилеш» халыхтар пірігізі.
Охчаадаң атары - иреннер аразында Эдуард Михайлов, чуваштарның «Пилеш» халыхтар пірігізі; ипчілер аразында Яна Пак, кореецтернің «Чосон» халыхтар пірігізі.
Дартс - Геннадий Матвеев, чуваштарның «Пилеш» халыхтар пірігізі.
Тобит - иреннер аразында Лев Нербышев, хакастарның «Аран Чула» халыхтар пірігізі; ипчілер аразында Галина Киштеева, чуваштарның «Пилеш» халыхтар пірігізі.
Хол пазызары: 80 кг кӧдірімге теере - Роман Климашевский, хакастарның «Асхыр» халыхтар пірігізі; 80 кг кӧдірімнең аар - Алексей Дорин, хакастарның «Асхыр» халыхтар пірігізі.
Арғамҷы тартызары - чуваштарның «Пилеш» халыхтар пірігізі.
Хакас кӱрезі:
48 кг - Камзар Чертыков, хакастарның «Асхыр» халыхтар пірігізі;
52 кг - Илья Чепсараков, хакастарның «Асхыр» халыхтар пірігізі;
58 кг - Семён Пастаев, хакастарның «Асхыр» халыхтар пірігізі;
66 кг - Иван Кышпанаков, хакастарның «Аран Чула» халыхтар пірігізі;
73 кг - Денис Кичеев, хакастарның «Асхыр» халыхтар пірігізі;
81 кг - Михаил Болганов, хакастарның «Асхыр» халыхтар пірігізі;
90 кг - Станислав Денисов, чуваштарның «Пилеш» халыхтар пірігізі;
90 кг аар - Бахтиер Икромов, таджиктернің «Бородари» халыхтар пірігізі.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы