КІЧІГ ПАЗА ОРТЫН БИЗНЕСКЕ ЧАХСЫ ХАБАЗЫҒ
24.07.2019
Хабарлар
ПУ ЧЫЛ - МОНОГОРОДТАРҒА
Пресс-конференция. 2019 - 2024 чылларда «Кічіг паза ортын бизнес паза идінҷектiң пастаана хабазары» национальнай проект хоостыра Хакасияа 1 миллиард артиинаң салковай пирілер. Пу чылға 220 миллион салковай кӧріл парған. Пу ахча хайди хорадыларынаңар чарыда чоохтап пиргеннер пу наада ирткен пресс-конференцияда
Хакасияның экономика тилізі министерствозының паза республиканың тиліс фондының устағҷылары паза специалисттері пос киреенең айғасчатханнарға паза аны пастирға сағынчатханнарға пу национальнай проект пирчеткен оңдайлардаңар чоохтап пиргеннер.
Тоғыс нинҷе-де кӧстегҷе апарылча. Иу пастағызы - пос киреенең айғазар ондайларны чахсыландырары. Мында идінҷектерге пос киреен азарына, хазна программаларында аралазарына полызығ иділче. Паза идінҷектернің адын кӧдірері ӧӧн пӧгін полча. Чииттер паза даа пасхазы пос киреен азарға хорыхпасха киректер. Хазна оларның пастағларына хабазарға тимде. Че азынада сизіндір саларға кирек, пу чыл ахчалығ полызығ моногородтардағы ла идінҷектерге пирілер: Абазадағы, Саяногорсктағы, Харатастағы, Тойымдағы паза Сорығдағы. Анзы федеральнай кіннің чахии полча. Моногородтардағы идінҷектерге хабазып, орында кічіг паза ортын бизнес тилиріне ізеніс пар.
СОЦИАЛЬНАЙ ИДӀНҶЕКТЕРГЕ ЧОЛ АЗЫХ
Мының алнында социальнай идінҷектерге, чуға чуртапчатхан сӧбірелерге, кинектерге, ӧкістерге хабасчатханнарны санаҷаңнар. Амды хазнадағы социальнай идінҷектерге кӧріс алыс парарға кирек.
- Кемні социальнай идінҷекке санирға чарир? Ол кинек кізіні, паланы чалғызан ӧскірчеткен іҷені алай пабаны тоғысха аларға кирек. Ідӧк аның предприятиезінде кинек паланың іҷе-пабазы, тынағдағылар алай тынаға сығарға тимненчеткен улуғ частығлар, олған туразында ӧскен чииттер, харибдең сыххан кізілер паза даа пасхалары тоғынзыннар. Идінҷектің пос кирее хазых хайраллир, ӱгредіг, туризм, культура алай чир-чайаанны хайраллир сфераларнаң палғалыстығ поларға кирек. Мындағ идінҷек социальнай идінҷекке саналча. Ағаа национальнай проект хоостыра илееде ахчалығ полызығ алып алар оңдай пар, - чоохтапча Хакасияның экономика тилізі министрі Николай Евдокимов.
Іди социальнай идінҷектерге грант мариинда аралазарға чарир. Пӱӱнгі кӱнде тӧрт муниципальнай пӱдіс араласча: Саяногорск, Харатас, Сорығ городтар паза Тӧӧ пазы поселок. Оларға тиксі 3,5 - 19 миллион салковай пирілер.
- Ахчаны алып алар ӱчӱн, идінҷектің налогтар алымы чох ползын, ідӧк бизнес-планы тимде ползын. Аның пос кирее хайди даа ӱстӱнде адалған моногородтарда апарылзын. Пічіктер хоостыра сурығлар чох полза, ағаа 1,5 миллион салковайға теере грант ахчазы пиріл парарға айабас, - чоохты узаратча Хакасияның экономика тилізі министерствозынын пос кирее паза садығ тилізі департаментінiң пастығы Анастасия Ходько.
Грант чиңісчілеріне ахчаны айландырарға кирек чох полар. Аны тыхтағ тоғыстарына, наа оборудованиелерге хорадарға чарир. Паза амды грант ахчазына чылдырылбинчатхан ис-пайны аларға чарадылча. Мының алнында пу кирекке ахчаны хорадарға чарадылбинчатхан. Мындағ ондайнан грант ахчазын пиріп, пос киреенең айғасчатханнарның тоғызы улам чахсы пар сығарына ізеніс пар. Тиксі салтарлар сентябрьда иділері кӧрілче.
КРЕДИТ АЛАРҒА ООЙ ПОЛАР
Национальнай проект хоостыра, ідӧк ӧдіске алчатхан ахчаны ниик оңдайларча айландырары кӧрілче. «Гарантийный фонд - МКК Хакасии» коммерческай нимес пірігіс кічіг паза ортын бизнеснең айғасчатхан идінҷектерге банктаң кредит аларға полысча. Мында фонд поручитель полча. Ідӧк фонд идінҷектерге микрозайм аларға хабазар. Пу чыл ол моногородтардағы бизнесменнерге ахчанаң полызарға тимде.
- Пӱӱл пістің фондсар 60 миллион салковай ызылар. Ол ахча моногородтардағы идінҷектернің аразында ӱлестірілер. Амды пос киреенең айғасчатханнарның сурыныс пічіктерін чыыры парча. Килчеткен чылда, тізең, пірігістің полызиинаң Хакасияның прай даа идінҷектері тузалан поларлар, - чоохтапча «Гарантийный фонд - МКК Хакасии» коммерческай нимес пірігістiң пастығы Татьяна Крыцына.
3 млн салковайға читчеткен займ пос киреенең айғасчатханнарға 3 чылға пирілер. Аның проценттері дее идінҷектерні хомзындырбас.
Че чир-чайаан ис-пайын аныпчатхан предприятиелерге, ойын бизнезінең айғасчатханнарға андағ хабазығ пирілбес.
Паза национальнай проект хоостыра Хакасияда кӱскӱзін «Минің бизнезім» кін азылар. Анда пір орында ла идінчектің прай сурығлары пӧгілер. Андох аның праволарын хайраллирынҷа полномоченнай кізінің кабинеді полар.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде